Teev Npe 11:1-3
Nqe cim:
“Ib puas tsav yam uas nej ua, nej tsis txhob yws thiab tsis txhob sib cav sib ceg” (Filipis 2:14)
Lug nug rau sawvdaws xav:
– Cov pejxeem tau ua txhaum dabtsi? Vajtswv tau ua licas rau qhov kev txhaum no?
– Vim licas Vajtswv thiaj tsis chim ntxiv lawm?
– Peb tau ceebtoom dabtsi txog qhov kev txhaum no?
Kws xibhwb Warren W. Wiersbe sau hais tias: “Vim kev txhaum tibneeg lub siab pheej hnov qab tus Tswv tej koob hmoov, tsis quavntsej txog Nws tej lus cogtseg, thiab lawv tsuas pom hais tias tus Tswv npaj tsis txaus rau lawv”. Nqe lus no phim heev rau tej xwm muaj nyob hauv ntu Vajluskub hnub no thaum cov Yixalayees nyuam qhuav tawm ntawm roob Xinais mus tau peb hnub kev, lawv twb ua txhaum yws rau Vajtswv lawm.
Peb tsis paub lub keebtiv ua rau cov pejxeem yws li ntawd, Vajluskub tsuas hais tias, “Thaum tus TSWV hnov lawv tej lus yws, nws chim rau lawv heev”. Lo lus “yws” muaj lub ntsiab hais tias nroo, cem, hais luj loos, quaj taug (Nkauj Quaj Ntsuag 3:39) thiab qhia tshwm kev tsis txaus siab, tsis nco txiajntsig nrog rau kev chim. Coob tug xav hais tias “yws” ib yam pheej tshaj xwb, tiamsis qhov kev txhaum no ua rau Vajtswv chim rau cov Yixalayees. Vim kev yws taus tsis yog tsuas cem tus kheej, cem lwm tus xwb, tiamsis tseemceeb yog cem tus Tswv. Vajtswv tau rau txim rau cov pejxeem los ntawm qhov uas “tso hluavtaws los hlawv lawv, thiab lawv tej tsev kub hnyiab tas ib tog yeej” (nqe 1). Dhau ntawm tej hluav taws no, tus Tswv xav kom cov pejxeem nco ntsoov hais tias, tauv huab hluav taws yog lubcim ntawm tus Tswv txojkev saibxyuas thiab tiv thaiv lawv (Teev Npe 9:15-16), thaum lawv yws ces yog lawv tsis lees yuav tus Tswv txojkev ua zoo, kev saibxyuas thiab tiv thaiv lawv lawm, thiab yog Nws tsis tiv thaiv lawv ces lawv yuav raug cov hluav taws ntawd hlawv kub hnyiab.
Thaum raug tus Tswv rau txim, cov Yixalayees tau tuaj “quaj mus thov Mauxes pab; Mauxes thiaj thov tus TSWV ces hluavtaws txawm tuag tas lawm” (nqe 2). Cov pejxeem ua txhaum rau Tus Tswv tiamsis lawv tsuas tuaj quaj thov Mauxes vim lawv tsis paub hais tias qhov uas lawv yws yog kev txhaum, thiab qhov ntawd ua rau lawv rov ua txhaum ntau zaug tomqab.
Thaum ntsib tej kev txomnyem, tej uas tsis txaus siab, peb pheej hnov qab ob yam tseemceeb. Thib ib, tej uas peb tabtom ntsib tsuas yog ib ntus thiab yeej cheemtsum ntsib kom peb kawm xyaum cia siab rau Vajtswv thiab kawm paub Nws lub homphiaj zoo uas tseg rau peb. Thib ob, peb pheej hnov qab hais tias tej yam zoo yog Vajtswv muab pub rau peb, thiab peb yuav raug teebmeem yog hais tias nws rub tej yam zoo ntawd rov qab. Vajtswv yog tus uas hnov peb tej lus thov, yog li ua cas peb ho tsis qhia peb tej kev cheemtsum rau Nws tiamsis ho pheej yws? Yuav tsum ceevfaj tej lus yws vim Vajtswv yog tus hnov thiab paub huv tibsi. Kev yws tau ua rau coob tug ntseeg ua tsis haum tus Tswv siab, lawv tsis ua timkhawv zoo rau lwm tus, thiab vim pheej saib mus rau tej teebmeem, saib mus rau tus kheej, lawv thiaj tsis paub txaus siab thiab ua tsis tiav tes haujlwm rau tus Tswv thiab rau lwm tus.
Thov Vajtswv,
Tus Tswv, thov hlub tshua zam txim rau nyuam yaus vim ntau zaug nyuam yaus tsis paub nco Koj txiajntsig thiab ua rau Koj nyuaj siab vim tej lus yws ruam. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb yuav tsum ua dabtsi kom tsis poob mus rau kev txhaum yws taus?
Nyeem Vajluskub hauv peb lub xyoos: Cov Thawjtswj 18
Kênh Youtube BHKTHN:
