Klei Aê Diê Blŭ: I Kôrantô 16: 19-23
Êlan kliăng: “Klei kâo khăp dôk mbĭt hŏng jih jang diih hlăm Krist Yêsu” (I Kôrantô 16:24)
Klei êmuh ksiêm mĭn: Ya klei Khua ƀĭng kna Y‑Pôl čih hlăm knhal tuč hră anei? Ya jing “brei bi kkuh čhưn hdơ̆ng hŏng klei čŭm doh jăk”? Ya jing boh blŭ Anathem leh anăn Maranatha? Si drei ƀuh ai tiê Khua ƀĭng kna Y‑Pôl hlăm kdrêč knhal tuč hră čih anei? Ya klei mñă kơ drei mơ̆ng klei anăn?
Hlăm kdrêč knhal tuč hră čih, Khua ƀĭng kna Y‑Pôl brei thâo phung ayŏng adei sa klei đaŏ leh anăn dŭm boh Sang Aê Diê ti čar Asi, mbĭt hŏng Sang Aê Diê dôk bi kƀĭn hlăm sang Y‑Akilas leh anăn H’Prisil mơĭt klei kkuh čhưn kơ phung đaŏ hlăm Sang Aê Diê Kôrantô. Klei anei bi êdah klei bi mguôp plah wah ayŏng adei hlăm gŏ sang sa klei đaŏ, jing phung Aê Diê bi mrâo hlăm êrah bi mtlaih Khua Yang Yêsu. Khua ƀĭng kna Y‑Pôl lŏ čih, “Brei diih bi kkuh čhưn hdơ̆ng diih hŏng klei čŭm doh jăk” (êlan 20). Klei čŭm doh jăk sĭt bi kkuh čhưn amâo djŏ jing klei bhiăn klei đaŏ ôh ƀiădah jing klei bi kkuh čhưn sĭt suôr, bi êdah klei khăp, klei bi mguôp plah wah phung jing dŏ Aê Diê, amâo kah mbha ôh.
Hlăm êlan 21, Khua ƀĭng kna Y‑Pôl bi mklă klă ñu pô čih hră anei čiăng bi mklă hră anei amâo djŏ mgưt ôh, ƀiădah ñu pô čih kyua anăn phung đaŏ brei mâo bruă klam hlue ngă dŭm klei ñu mtă leh hlăm hră. Hlei jing phung khăp kơ Aê Diê, sĭt hmư̆ klei mtrŭt mơ̆ng hră ñu čih brei mâo bruă ngă jăk, ƀiădah tơdah hlei pô amâo huĭ mpŭ kơ Aê Diê, dlăng klei ktrâo lač jing hơăi mang, hngah kơ klei pap Aê Diê čiăng lŏ dơ̆ng êbat hlăm klei soh snăn Khua ƀĭng kna Y‑Pôl bi êdah klei mĭn klă mngač phung anăn tŭ Anathem, anei jing sa klei tăm pah jing bi ktlah hŏng Aê Diê. Boh blŭ Maranatha jing “Ơ Khua Yang! Akâo kơ Ih hriê!” hưn brei răng Khua Yang jing Pô srăng hnưm hriê čiăng phat kđi grăp čô mnuih, hlei pô amâo djă pioh klei huĭ mpŭ kơ Aê Diê srăng bi ktlah hŏng Ñu!
Sang Aê Diê Kôrantô ăt msĕ si Sang Aê Diê hruê anei brei ƀư̆ mkra dŭm klei soh hlăm klei blŭ bruă ngă leh anăn knuih mă bruă kyua hruê Khua Yang giăm truh, sa hlăm dŭm klei brei ƀuah mkra jing mbha êpul, kah ana mbha djuê. Tơdah grăp čô mnuih mă bruă kơ Aê Diê leh anăn hdơ̆ng bi blŭ tlao ngă bruă hŏng klei kpă ênô snăn klă sĭt amâo lŏ mâo ôh klei amâo ư ai, kah mbha hlăm Sang Aê Diê. Klei Khua ƀĭng kna Y‑Pôl mñă hŏng klei čang hmăng grăp čô đaŏ kơ Krist srăng hdơ̆ng mpŭ nanao sĭt thâo pô jing ayŏng adei sa gŏ sang hlăm klei đaŏ, boh nik hrăm mbĭt mđing ai tiê kơ hruê knhal tuč hŏng klei akâo Maranatha! Ơ Khua Yang! Akâo kơ Ih hriê!
Klei knhal tuč khua ƀĭng kna čih mgei ai tiê snăk, “Klei kâo khăp dôk mbĭt hŏng jih jang diih hlăm Krist Yêsu”. Wăt tơdah kjăp snăk hlăk čih hră anei, ƀiădah ñu ăt khăp kơ digơ̆ hŏng klei khăp mơ̆ng Aê Diê. Akâo kơ Aê Diê brei drei tui hlue Khua ƀĭng kna Y‑Pôl hlăm knuih hdĭp mbĭt hŏng ayŏng adei leh anăn hlăk êjai hrăm mbĭt mă bruă kơ Ñu.
Ya klei mđĭ ai phung drei čang guôn hruê Khua Yang pral truh?
Wah lač: Ơ Khua Yang pô khăp! Akâo kơ hruê Ih pral truh čiăng drông Sang Aê Diê Ih. Akâo kơ Ih đru kâo hdĭp hluê si Klei Aê Diê Blŭ hlăk êjai dôk čang guôn hruê jăk mơak anei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 32:1-31
Kênh Youtube BHKTHN:
