I-Kauleethaus 16:19-23
Nqe cim:
“Kuv hlub nej txhua tus, rau qhov peb puavleej ntseeg Yexus Khetos” (I-Kauleethaus 16:24).
Lus nug rau sawvdaws xav:
- Timthawj Paulus sau cov lus xaus li cas hauv nws tsab ntawv no?
- “Ib tug hlub ib tug, lossis sib fim ntawm txoj cai nwj uas dawbhuv” yog li cas?
- Lo lus raug foom tsis zoo thiab Malanathas lub ntsiab yog li cas?
- Xaus lus hauv tsab ntawv, Paulus muaj nplooj siab zoo li cas?
- Qhov ntawd ntuas peb sawvdaws txog yam dab tsi?
Timthawj Paulus cov lus xaus hauv tsab ntawv I-Kauleethaus qhia paub hais tias, peb cov kwvtij uas koom ib txoj kev ntseeg thiab cov pawg ntseeg nyob cheeb tsam Axias nrog rau cov ntseeg uas tuaj koom pehawm hauv Akilas nkawd ob niam txiv lub tsev xa lus noj qab nyob zoo rau cov ntseeg hauv nroog Kauleethaus. Tej yam hais los saud yog qhia tshwm kev sib hlub sib raug zoo ntawm cov kwvtij uas koom tib txoj kev ntseeg, uas tau yug rau hauv Vajtswv tsev neeg los ntawm Tswv Yexus cov ntshav tsimtxiaj. Timthawj Paulus sau hais tias, “Nej ib tug hais noj qab nyob zoo rau ib tug thiab ib tug hlub ib tug” muaj lwm phau hais tias, “Cia li sib fim ntawm txoj kevcai nwj uas dawbhuv” (nqe 20). Txoj cai nwj dawbhuv thaum sib fim lossis sib ntsib, tsis yog ib txoj cai hauv kev ntseeg tiamsis yog kevcai uas cov neeg sib swm heev lawv ib tug ua rau tug thaum sib ntsib, qhia tshwm lawv kev sib hlub sib tshua thiab kev sib raug zoo hauv cov neeg uas yog Vajtswv tug lawm yuav tsis sib cais tau.
Hauv nqe 21, Timthawj Paulus lees paub hais tias, yog nws txhais tes sau cov lus ntawd ntag, kom sawvdaws paub meej txog nws tsab ntawv tsis yog cuav, kom cov ntseeg yuav tsum ua raws li nws tej lus ntuas hauv tsab ntawv. Leejtwg yog tus hlub Vajtswv ces thaum hnov txog Paulus cov lus ntuas lawv txais yuav, tiamsis cov tsis hlub Vajtswv ces lawv tsis quav ntsej tej lus ntuas ntawd, lawv ua lub neej tawm tsam Vajtswv kev hlub thiab pheej ua txhaum ntxiv. Paulus hais tawv qhawv txog cov neeg tsis txais yuav tej lus ntuas yeej yuav raug foom tsis zoo uas raug muab tshem tawm ntawm Vajtswv mus. Lo lus Malnathas txhais hais tias; “Tus Tswv! Koj cia li los” yog lo lus ceebtoom sawvdaws hais tias, tus Tswv yuav ntxov los txiav txim rau txhua tus tibneeg, leejtwg tsis hlub tus Tswv ces yuav raug cais tawm ntawm Nws mus.
Pawg ntseeg hauv nroog Kauleethaus kuj ib yam li txhua pawg ntseeg niaj hnub nimno, yuav tau los kho yam uas yuam kev ntawm ib tug ua rau ib tug thiab kev ua haujlwm ua ke, vim tus Tswv twb yuav los. Ib yam uas txhua pawg ntseeg yuav tau los xyuas thiab kho yog kev sib faib ua pab ua pawg, sib ntxub sib thuam. Yog peb txhua tus ua Vajtswv haujlwm los ntawm saib sawvdaws yog tib pab kwvtij, sib hlub sib txhawb tas siab, ces paub tseeb hais tias yuav tsis muaj qhov uas sib haum ntawm ntsejmuag tiamsis hauv lub siab tsis yib thiab tsis muaj kev sib cais hauv pawg ntseeg. Paulus cov lus ntuas kom txhua tus ntseeg yuav tsum ib tug sib taus ib tug vim sawvdaws yog kwvtij hauv kev ntseeg thiab sawvdaws muaj tib seem xav txog hnub uas tus Tswv rov los thiab sawvdaws yuav koom tau ua ib siab thov Vajtswv hais tias; Tus Tswv! Thov Koj cia li los!
Paulus lo lus xaus ua rau sawvdaws los kuamuag, nws hais tias;“ Kuv hlub nej txhua tus, rau qhov peb puavleej ntseeg Yexus Khetos”. Txawm hais tias Paulus ua nruj tsiv heev thaum sau tsab ntawv no, tiamsis nws hlub cov ntseeg txhua tus los ntawm tus Tswv txojkev hlub. Thov tus Tswv pab kom peb txhua tus xyaum Paulus tus qauv ntawm kev ua lub neej nrog sawvdaws thaum sawvdaws koom siab ua tus Tswv haujlwm.
Yam dab tsi ua rau peb muaj chaw vam nyob tos hnub uas tus Tswv los?
Thov Vajtswv,
Vajtswv tus uas tsimnyog hlub! Thov Koj cia li los tos Koj pawg ntseeg. Thov Koj pab nyuam yaus ua raws li Koj tej lus qhia thaum tseem nyob tos hnub uas koj rov los. Amees.
Nyeem Vajluskub hauv peb lub xyoo: II.Xwmtxheej Vajntxwv 32:2-31
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
