Yelemis 38:14-19
Nqe cim:
“Lawv nyiam kom neeg qhuas lawv heev dua li nyiam kom Vajtswv qhuas lawv” (Yauhas 12:43).
Lus nug rau sawvdaws xav:
- Vajntxwv Xedekiyas xav hnov tus cevlus qhia yam dabtsi rau nws?
- Vim licas vajntxwv xav hnov tej ntawd?
- Tej uas vajntxwv ua tomqab hnov tus cevlus Yelemis tej lus, qhia pom hais tias vajntxwv yog tus neeg zoo licas?
- Zaj no qhuab ntuas peb yam dabtsi?
Tomqab uas tus cevlus Yelemis tau tus nom txawv tebchaws cawm, vajntxwv Xedekiyas coj nws mus ntsib twjywm rau ib qhov chaw, nug txog tej yam yuav tshwm tuaj raug vajntxwv thiab lub nroog Yeluxalees. Thaum pom tus cevlus Yelemis tsis kam hais tawm vim ntshai raug tua lossis ntshai vajntxwv tsis xav mloog, vajntxwv tau coglus twjywm hais tias yuav tsis muab Yelemis tua povtseg. Tej zaum vajntxwv Xedekiyas twb pom txog qhov uas cov Npanpiloos tua yeej cov Iziv, lawv thiaj rov tuaj vij lub nroog Yeluxalees li yav tas los, thiab nws kuj pom tsis muaj tseeb li cov cevlus cuav hais, tsuas yog tus cevlus Yelemis thiaj muaj tus Tswv nyob nrog xwb. Nyob hauv nruab siab, vajntxwv yeej paub hais tias tus uas nws tsimtxom yav tas los thiaj yog tus uas tau Vajtswv qhia txhua yam.
Tej lus tus cevlus Yelemis qhia rau vajntxwv kuj yog tej uas nws ib txwm qhia yav tas los, ntawd yog vajntxwv, tej nomtswv thiab cov Yudais yuav tsum mus thawj cov Npanpiloos thiaj tsis raug tuag thiab lub nroog thiaj tsis raug hlawv. Yog tsis ua li ntawd, vajntxwv yeej yuav khiav tsis dhau cov Npanpiloos thiab lub nroog yuav raug hlawv (nqe 18). Thaum hnov lawm, vajntxwv ntshai tsam thaum nws mus thawj cov Npanpiloos ces yuav raug thuam, raug poob ntsejmuag, raug tsimtxom. Txawm hais tias vajntxwv nyuam qhuav hnov tus cevlus Yelemis qhia paub tus Tswv tej lus cogtseg hais tias yog mus thawj ces vajntxwv thiab tsevneeg yuav tsis raug tuag, lub nroog yuav tsis raug hlawv, los vim tsis muaj lub siab ntseeg thiaj ua rau vajntxwv tsis ua raws li tus Tswv tej lus, thiab lub siab khav ua rau vajntxwv ntshai poob ntsejmuag heev dua qhov uas ua rau Vajtswv tau ntsejmuag (Yauhas 12:43).
Lees hais tias tus kheej raug swb yog ib tes haujlwm tsis yoojyim. Tiamsis yog pheej tawv ncauj tiv qees ua txhaum ces yuav txais tsis tau ib yam dabtsi muaj nqis. Yam uas tus Tswv xav kom vajntxwv thiab cov Yudais ua lub sijhawm ntawd kom tuav tau lub nroog tsis yog yam uas lawv siv lub zog ua tau, tej uas lawv ua tsis muaj nqis dabtsi; yam uas lawv tsimnyog ua yog mus thawj cov Npanpiloos, lees swb, thiaj yog ua raws tus Tswv tej lus qhuab ntuas. Tshaj lwm tus, lawv yuav tsum paub hais tias vim licas tus Tswv thiaj cia lawv raug tej teebmeem no. Laug sijhawm thiab tsis mloog lus tsuas ua rau lawv raug teebmeem ntxiv xwb.
Tus kheej kev khav thiab ntshaw paj plhus, yoojyim ua rau peb tsuas xav txog tus kheej lubmeej mom, nyiam tau neeg qhuas heev dua qhov uas ua neej rau Vajtswv tau koobmeej. Thov tus Tswv pab kom thaum peb tau hnov, tau paub tus Tswv lub siab nyiam lawm, ces yuav tsum tas siab tas ntsws ua raws. Txawm yog qee zaug peb tsis totaub txog tus Tswv lub homphiaj, los peb ntseeg hais tias tus Tswv yeej yuav pub yam uas zoo kawg nkaus rau Nws cov menyuam.
Thov Vajtswv
Vajtswv tus uas muaj kev hlub! Thov pab nyuam yaus xam pom txog tus kheej kev qaug zog, muab siab rau ntseeg thiab ua raws li Koj tej lus qhia, txawm yog tsis tau totaub Koj homphiaj pub rau nyuam yaus. Amees.
Peb puas tas siab tas ntsws ua raws tus Tswv lub siab nyiam kom Nws tau koobmeej lawm tau?
Nyeem Vajluskub hauv peb lub xyoos: Yaxayas 44:24-45:17
Kênh Youtube BHKTHN:
