Klei Aê Diê Blŭ: Y‑Yêrêmi 38:14‑19
Êlan kliăng: “Kyuadah diñu khăp kơ klei mnuih mpŭ mni lu hĭn kơ klei Aê Diê mpŭ mni.” (Y‑Yôhan 12:43).
Klei êmuh ksiêm mĭn: Ya klei Mtao Sêdêkia čiăng hmư̆ khua pô hưn êlâo lač kơ hjăn pô? Ya ngă mtao čiăng hmư̆? Klei mtao ngă leh hmư̆ Klei Yêhôwa blŭ hưn hŏng Khua pô hưn êlâo Y‑Yêrêmi brei ƀuh si mtao jing? Ya klei hriăm hruê anei mñă kơ drei?
Leh Khua pô hưn êlâo Y‑Yêrêmi mâo dĭng buăl arăng mkriâo bi mtlaih, Mtao Sêdêkia brei iêô ñu nao čiăng êmuh hjăn kơ klei hdĭp mtao leh anăn ƀuôn Yêrusalem. Leh ƀuh Khua pô hưn êlâo Y‑Yêrêmi amâo jhŏng lač ôh kyua huĭ mtao mdjiê amâodah lač mtao ăt kăn hmư̆ rei, mtao ƀuăn hgăm srăng amâo djiê ôh ñu. Năng ai mtao Sêdêkia ƀuh leh phung kahan Ƀaƀilôn bi blah phung kahan Êjip, diñu lŏ wĭt kwang dar ƀuôn Yêrusalem msĕ si êlâo, leh anăn ăt ƀuh klă phung khua pô hưn êlâo lač soh jih, knŏng Khua pô hưn êlâo Y‑Yêrêmi jing mâo Yêhôwa dôk mbĭt. Hlăm lam ai tiê, mtao thâo mnuih pô ngă jhat anăn mâo Aê Diê bi êdah klei Ñu čiăng.
Klei Khua pô hưn êlâo Y‑Yêrêmi hưn hŏng mtao ăt jing klei ñu hưn leh sui hŏng anei, anăn jing mtao, phung khua leh anăn phung ƀuôn sang Yuđa jao Ƀaƀilôn snăn kơh dưi răng mgang klei hdĭp pô leh anăn arăng amâo čuh ôh ƀuôn prŏng. Bi tơdah amâo ngă snăn, klă sĭt mtao srăng amâo dưi tlaih ôh mơ̆ng phung Kaldê leh anăn arăng srăng čuh ƀuôn prŏng (êlan 18). Leh hmư̆, mtao lŏ huĭ luč knuih pô kyua tŭ klei amâo dưi kơ phung Kaldê, diñu srăng tlao mưč, ngă jhat. Wăt tơdah mtao mrâo hmư̆ Khua pô hưn êlâo Y‑Yêrêmi brei thâo Yêhôwa lač tơdah tŭ klei amâo dưi snăn mtao leh anăn gŏ sang srăng dưi hdĭp, arăng amâo čuh ôh ƀuôn prŏng, ƀiădah ai tiê amâo đăo ngă kơ mtao wăt tơdah thâo Klei Aê Diê lač ƀiădah ăt kăn hlue ngă, leh anăn klei mgao ngă kơ mtao mđing kơ klei hing ang pô hĭn kơ klei guh kơang Aê Diê (Y‑Yôhan 12:43).
Tŭ ư klei amâo dưi mơ̆ng pô jing bruă dleh snăk. Ƀiădah tơdah ngă klei soh snăn klă sĭt amâo srăng dưi mâo klei tŭ dưn kơ klei hdĭp ôh. Klei Yêhôwa čiăng leh anăn phung Yuđa hlue ngă hlăm wưng anei čiăng pioh ƀuôn prŏng amâo djŏ jing klei diñu dưi gĭr hŏng ai pô ôh, kyua klei anăn amâo ba klei tŭ dưn kơ diñu pô ôh leh anăn ăt kăn dưi krơ̆ng rei, ƀiădah grăp čô mnuih brei tŭ klei amâo dưi, yap pô amâo dưi ôh, čiăng hlue ngă klei Aê Diê ƀuah mkra. Hĭn kơ pô mkăn, brei diñu thâo mta phŭn ngă kơ Yêhôwa jao diñu hlăm klei truh anei. Bi sui hruê mmông amâodah lŏ dơ̆ng amâo hlue ngă klei mtă ngă kơ diñu luč liê thiăm đuč.
Klei mĭn mgao leh anăn klei hing ang ăt ênưih ngă kơ drei mđing kơ klei guh kơang pô, khăp klei hing ang anak mnuih hĭn kơ hdĭp bi guh kơang Anăn Aê Diê. Akâo kơ Aê Diê brei drei sĭt hmư̆, thâo leh klei Aê Diê čiăng snăn jih ai tiê hlue gưt. Wăt tơdah sĭt drei amâo thâo săng ôh klei Aê Diê čiăng ƀiădah brei drei đăo Aê Diê čiăng brei nanao klei jăk hĭn kơ anak Ñu.
Drei jih ai tiê gưt asăp Aê Diê čiăng bi guh kơang Anăn Ñu mơ̆?
Wah lač: Ơ Aê Diê Pô Khăp! Akâo kơ Ih đru kâo gưt hlue ngă klei Ih čiăng hlăm klei hdĭp kâo. Akâo kơ Ih đru kâo thâo klei êdu awăt pô, jih ai tiê đăo leh anăn gưt asăp wăt tơdah lu blư̆ kâo amâo thâo săng ôh klei Ih čiăng.
Dlăng klei Aê Diê Blŭ hlăm tlâo thŭn: Y‑ Êsai 44:24‑45:17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
