Mathais 10:1-7
Nqe cim:
“Nej cia li mus qhia hais tias, Ntuj Ceebtsheej twb los ze lawm!” (Mathais 10:7)
Lus nug rau sawvdaws xav:
– Tswv Yexus pub yam dabtsi rau cov thwjtim thiab txib lawv mus qhov twg?
– Nws kom lawv yuav tsum qhia yam dabtsi?
– Peb tau tus Tswv hu mus ua dabtsi rau Nws?
Tom qab uas Tswv Yexus hu cov thwjtim “Nej cia li los saib” (Yauhas 1:39) thiab “Nej cia li nrog Kuv mus” (Malakaus 1:17; 2:14), Nws xav kom cov thwjtim tawm mus tshaj qhia txojlus tseemceeb rau txhua tus tibneeg. Tus Tswv twb siv sijhawm los coj thiab cob qhia Nws cov thwjtim. Thiab twb txog lub sijhawm, lawv yuav tau tawm mus ua tes haujlwm qhia Txojmoo Zoo. Hauv ntu Vajluskub no, tus Tswv pub hwjchim rau lawv tawm mus qhia, ntiab dab thiab kho mob (nqe 1).
Lub sijhawm no, Tswv Yexus twb muaj 12 tug thwjtim. Lawv yog cov uas muaj meej mom thiab kev kawm txawj kawm ntse sib txawv (nqe 2-4) tiamsis lawv muaj tib txojkev xav, yog hnov tus Tswv hu ces sawv tsees thiab nrog tus Tswv mus. Lawv nrog tus Tswv nyob ua ke, mus ua ke thiab tau tus Tswv cob qhia ua thwjtim tau peb lub xyoo thaum tus Tswv los yug ua neeg nyob ntiajteb. Zaum no twb txog lub sijhawm tus Tswv txib mus ua tej haujlwm uas Nws twb qhia rau lawv lawm. Thawj yam, tus Tswv xav kom lawv mus nrhiav “cov neeg Yixalayees, zoo li pab yaj uas ploj lawm” thiab qhia txojlus “Ntuj Ceebtsheej twb los ze lawm” kom sai sai (nqe 5-7).
“Nej cia li tso plhuav nej tej kev txhaum tseg rau qhov Ntuj Ceebtsheej twb los ze lawm!” yog txojlus uas Yauhas Npatitus twb qhia (Mathais 3:2). Tom qab uas Yauhas raug ntes coj mus kaw thiab tua povtseg, Tswv Yexus ua tes haujlwm qhia txojlus ntawd. Muaj 7 zaug tus Tswv qhia txog “Ntuj Ceebtsheej twb los ze” lossis twb “los lawm” (Mathais 4:17, 10:7; Malakaus 1:15; 12:34; Lukas 10:9, 11; 21:31). Yog li qhov tseeb yog txojlus tseemceeb thiab cheemtsum qhia kom sai uas tus Tswv twb qhia. Nws xav kom cov thwjtim hnub thaud thiab peb cov tamsim no yeej meem qhia ntxiv txojlus no mus rau cov neeg yuam kev lawm paub.
Los ntawm tej xwmtxheej tabtom tshwm muaj nyob hauv lub ntiajteb no, peb yim huab pom tej cim ntawm lub sijhawm kawg. Hnub uas Tswv Yexus rov los tshuav tsis ntev lawm thiab Ntuj Ceebtsheej tabtom los ze. Yog Tswv Yexus thwjtim, peb txhua tus cia li siv txhua lub sijhawm los nqua hu kom txhua tus tso kev txhaum tseg, rau qhov Vajtswv lub Tebchaws tabtom los ze. Yeej yuav muaj tej kev sim siab thaum peb mus raws li Yexus lo lus samhwm, vim tej neeg“yuav tsis nyiam mloog Vajtswv Txojlus lawm. Lawv tsuas nyiam mloog tej dabneeg xwb.” (II Timautes 4:4). Cia kom tiv dhau kev sim siab thiab sawv khov kho qhia Txojmoo Zoo, peb yuav tsum paub tias Ntuj Ceebtsheej twb los ze lawm. Thiab kuj yuav tau vamkhom lub qhov muag siab ntsia pom cov neeg ibncig tabtom taug txojkev tuag ibtxhis. Tsuas yog thaum peb ntsia pom thiab zeem paub txojlus yuav tau qhia kom sai mas peb thiaj paub rau siab ua tes haujlwm qhia Txojmoo Zoo.
Thov Vajtswv,
Tus Tswv, thov Koj pab kom nyuam yaus muaj lub siab hlub zoo ib yam li Koj hlub cov neeg puastsuaj, nyuam yaus thiaj tiv taus dhau tej kev sim siab thaum mus qhia txojlus hais tias Vajtswv Koj lub tebchaws los ze lawm! Nyuam yaus tuav Tswv Yexus lub npe thov, Amees.
Peb puas zeem paub hais tias Ntuj Ceebtsheej twb los ze lawm? Peb rau siab ntso tawm mus qhia txog zaj no li cas?
Nyeem Vajluskub hauv peb lub xyoo: I Xamuyees 10
Kênh Youtube BHKTHN:
