Jôsuê 24:14-15
“Inh păng hnam inh gô chu yom păng pơm kiơ̆ kơ Kră Yang.” (Jôsuê 24:15b)
Nơ̆r jet tơchĕng pơwao:
– Kơplah ei sơ̆ đei ră roi tơdrong truh ‘bơ̆t layơ?
– ‘Bok Jôsuê pơdah tơdrong pơkăm pơkă tơdrong kiơ, păng nơ̆r pơkă noh đei ‘bơm pơm kơ kon pơlei thoi yơ?
– Pơm thoi yơ lu bơ̆n gơh pơkăm pơkă thoi kơ ‘bok Jôsuê?
Đei roi tơdrong truh kơplah ei sơ̆ kơplah kon pơlei Isơrael mơ̆t tơ Dêh char Pơkă, ‘bok Jôsuê sơnăm đĭ ‘lŏ kră bơih, wă tơklah đơ̆ng ala teh . Sư đei krao akŭm kon pơlei păng lu bơngai pơgơ̆r năm truh tơ Si chem, dêh tŏk bŏk lăm dêh char Palestin wă kơ wơ̆t pơkăm pơkă pơgơ̆p mă tơnăp hăm Kră Yang (Jôsuê 24:1). Adrol kơ’noh, lăm chăl blung a lăm tơdrong tơblah, ‘bok Jôsuê đei krao akŭm đĭ đăng kon pơlei năm tơ tơring âu, pơdơ̆ng chơnang soi kơkuh kơ Kră Yang tơ kơpal kông Êbanh păng pơyơ̆r lu tơmam soi ‘buh păng tơmam soi hiôk hian. Sư đŏk đĭ khôi juăt, đĭ đăng lu nơ̆r sơkat ăn pŭn hiôk tơdah lu sư chu yom pơm kiơ̆ păng nơ̆r hiap pơtê̆ tơdah lu sư ưh kơ pơm kiơ̆ (Jôsuê 8:30-35). Kơplah đei tơ’bơ̆p muh măt kon pơlei năr mă hơtuch, ‘bok Jôsuê đei tơbăt azn kơ kon pơlei Isơrael athei pơkă mă tơpă tŭk lê̆ đĭ lu rup yang mă lu ‘bok yă lu sư đei kơkuh, “athei hli yom kơ Kră Yang păng chu kiơ̆ nơ̆r Sư mă đĭ jơhngơ̆m păng mă tơnăp”. Sư pơma tơpă\t, mă khan lu sư kơkuh kơ lu rup yang thoi ‘bok lu sư, dah lu rup yang dêh char Êyiptơ, lei na sư păng hnam dơnŏ sư oei kơkuh lăp minh Kră Yang đĕch: “Mălei gah inh pa0xng hnam dơnŏ inh gô chu yom păng pơm kiơ̆ kơ Krră Yang” (tr. 14-15). Kon pơlei Isơrael lui tơpă; dôm lu nơ̆r đei pơkă wă chu yom Kră Yang mă ‘bok Jôsuê păng hnam dơnŏ sư đei pơm tơpă, yua kơ lăm đĭ khei ‘năr đei năm hơdai sư đei lĕch hlôi đơ̆ng dêh char Êyiptơ păng mơ̆t lăm Dêh Char Pơkă, kon pơlei păng lu kră pơgơ̆r kon pơlei băt nhen tơdrong arih sư hăm Kră Yang pơm kiơ̆ trŏ ‘blep dôm nơ̆r Kră Yang bơtho pơkă, “Kiơ̆ thoi Kră Yang tơtă ăn kơ Môis đĭch đam Sư, Môis kư̆m tơtă ăn Jôsuê păng Jôsuê pơm kiơ̆ ưh kơ glăi minh tơdrong kiơ, pơm kiơ̆ rim tơdrong Kră Yang tơtă kơ Môis” (Jôsuê 11:15). Adrol kơ sư lôch, ‘bok Jôsuê roi tơbăt nơ̆r sư pơkă đĭ jơhngơ̆m pơm kiơ̆ ưh kơsĭ sư kơdih đĕch mălei hăm hnam dơnŏ sư hai mơ̆n, Mă lei inh păng hnam dơnŏ inh gô chu yom păng pơm kiơ̆ kơ Kră Yang”.
Kơmĭl tơnăp tơpăt đơ̆ng hnam dơnŏ ‘bok Jôsuê đei hơpoh ‘bơm rim jơhnơr lăm kon pơlei,” Lu kon pơlei Isơrael chu yom kơ Kră Yang đĭ lăm chăl arih Jôsuê pă;ng đĭ lăm chăl lu kră arih sot hloh kơ Jôsuê, lu bơngai mă đei ‘bôh păng băt tôm tơdrong Kră Yang đei pơm bơih lăm lu kon pơlei Isơrael” (Jôsuê 24: 31 BTTHĐ). Roi hơ’mon kơ hnam dơnŏ ‘bok Jôsuê đei ‘bai pơhrăm tơgŭm lu bơ̆n, minh hnam dơnŏ đĭ jơhngơ̆m ‘mêm kơ Kră Yang păng tơnăp hăm Kră Yang đei ba ăn hơpoh ‘lơ̆ng kơ đĭ đăng kon pơlei.
Wă kơ lu bơ̆n gơh đei jơhngơ̆m pran pơdah nơ̆r pơkă ‘bơ̆t anăp rim ‘nu bơngai “Mălei gah inh păng hnam dơnŏ inh gô chu yom păng pơm kiơ̆ kơ Kră Yang”, hơdrol hloh kơdih kâu lu bơ̆n ‘noh athei tơnăp hăm Kră Yang păng đĭ jơhngơ̆m awih awăn kơ Kră Yang. ‘Nguaih kơ noh, lu bơ̆n kư̆m athei pŭ iŏk wei rong chăl arih gah bơhngol lu kon sâu bơ̆n wă kơ đĭ lăm hnam dơnŏ oei pơtrơp rok kiơ̆ trong ‘bok yă ‘bă mĕ sư, tơnăp păng đĭ jơhngơ̆m chu yom pơm kiơ̆ kơ Kră Yang .
Ơ Kră Yang ‘mêm mơnat, tơgŭm kơdih kâu inh ling lang đĭ jơhngơ̆m tơnăp kơkuh păng bơ̆jang kơ Ih, pơm kơmĭl ‘lơ̆ng kơ Khul Lui kơ Ih .Yua anăn Kră Yang Yêsu Krist, Amen.
Lu bơ̆n hăm đĭ jơhngơ̆m tơchĕng tơtăm wei rong chăl arih gah bơhngol lu kon sâu bơ̆n ưh?
Đŏk Sơ̆p Hla ar ‘Bok Kei-Dei lăm pêng sơnăm: II Hơ’mon 5.
Kênh Youtube BHKTHN:
