Rôm 10:18-21
“Lu bơngai mă ưh kơlah krao apinh Inh, na Inh pơdah akâu kơ lu sư bơih. Lu bơngai mă ưh kơlah chơchă Inh na tơ’bơ̆p Inh bơih. Inh khan hăm minh adrĕch adrung kon pơlei nai ưh kơ đei krao chă anăn Inh: “Inh tơ âu, Inh tơ âu!” (Êsai 65:1)
Nơ̆r jet tơchĕng pơwao:
– Tơdrong đei truh tơpă lăm kon pơlei Isơrael đei chih roi thoi yơ?
– Lu bơ̆n ‘bôh tơdrong kiơ gah jơhngơ̆m đon Kră Yang ‘Bok Kei-Dei hăm lu bơngai Isơrael păng kon pơlei tơmoi?
– Lu bơ̆n gô pơm kiơ̆ thoi jơhgơ̆m Yang ‘Bă tơ kơpal plĕnh thoi yơ?
Lăm trong 17, ‘Bok Pôl đei pơtôch nơ̆r: “Gah lu bơ̆n, bơ̆n lui bơih, noh đơ̆ng đe năm bơtho Tơdrong ‘Nao ‘Lơ̆ng Yêsu Krist na bơ̆n lui”. Tơpă sư kon pơlei Isơrael ưh kơ wă lui. “Lu bơngai Isơrael tam kơtơ̆ng Tơdrong ‘Bok Kei-Dei .” (trong 18) Ưh ôh! Lu sư kơtơ̆ng păng đei kơtơ̆ng lơ wơ̆t bơih. Lăm kơplah lu bơngai mă Kră Yang wơh năm chă bơtho kơtơ̆ng jơ̆p jang kơ teh đak, păng nơ̆r lu bơngai chă bơtho đei bơtho jơ̆p kơ dêh char, mălei lu bơngai Isơrael oei ưh kơ băt. Tơdrong âu pơsĭt kơ nơ̆r Kră Yang “đe năm bơtho Tơdrong ‘Nao ‘Lơ̆ng ưh kơsĭ đe lui đĭ hloi ôh.” (trong 16)
Hloh kơ adrĕch adrung nai, kon pơlei Isơrael đei Kră Yang ăn lu bơngai khan lê̆ adrol gah ‘Bok Mêsi. Lu sư oei chang gô ‘Bok Mêsi, mălei kơplah ‘Bok ei đe tơpŭ kơ Sư, arih wơ̆ ‘lŏ tơ lăm lu sư, mălei lu sư ưh kơ băt. Mă khan hlôi juăt păng nơ̆r khan lê̆ adrol gah ‘Bok Mêsi đei ‘bôh trŏ ‘blep lăm tôm tơdrong lăm chăl arih păng tơdrong jang Kră Yang Yêsu, lu sư đei ‘bôh păng măt dôm tơdrong hlĭch chrơp păng tơdrong mơsêh mơyang Kră Yang Yêsu đei pơm mălei lu sư oei sơngah kuă kơ lui kơ Sư. Kră Yang khan tơpăt lu sư noh kon pơlei mă ưh kơ chu yom păng arăng kơ̆l dêh (trong 21). Mă khan kon pơlei Isơrael tơblơ̆ hăm Kră Yang, ưh kơ pơm kơmĭl pơm jŭk kơ kon pơlei nai, mălei jơhngơ̆m ‘Bă mă oei tơ plĕnh ti oei ‘mêm mơnat, kĕ chơ̆n oei răp gô lu sư. “Inh oei chang gô lu bơngai Isơrael ling lang wă kơ lu sư jah wih tơ Inh, mălei lu sư oei arăng kơ̆l ưh kơ wih ôh.” (trong 21). Tơdrong ‘mêm mơnat Kră Yang jrŭ să dêh!
Ưh kơsĭ lu bơngai Isơrael đĕch ôh, tơdrong ‘mêm păng tơdrong mơnat đơ̆ng Yang ‘Bă tơ kơpal plĕnh kư̆m ‘măn ăn kơ rim adrĕch adrung nai kơjung hloh kư̆m thoi Sư ‘mêm kơ lu bơngai Isơrael. Đơ̆ng rŏng kon bơngai pơm yoch, kon bơngai rai weh ataih đơ̆ng Kră Yang, ayăt hăm Kră Yang, mălei Kră Yang đei tơdă hơmet lê̆ tơdrong dŏng pơklaih kon bơngai, kơplah kon pơlei Kră Yang “Ưh kơ băt tơdrong kiơ” lei tơdrong mơnat Kră Yang gơh kơtơ̆ng jơ̆p jang teh đak (trong 18). Kră Yang rơih krao kon pơlei tơmoi, lăm noh đei lu bơ̆n, pơm kon pơlei gah bơhngol lăm Sư. Lu bơ̆n kăl kơ băt ưh kơ đei bu lăm teh đak âu khan đơ̆ng kơdih băt chă Kră Yang, mălei Kră Yang đei tơ’bôh ăn kơ lu bơ̆n, tơ’bưh juăt hăm lu bơ̆n, wei rong lu bơ̆n thoi mĕ ‘bă wei rong kon hơ’lơ̆p oei ‘lơ̆p iĕ “…Ih tơ âu, Inh tơ âu.” (Êsai 65:1) Bơnê kơ Kră Yang gah tơdrong ‘mêm mơnat Sư. Rim ‘nu lu bơ̆n dang ei kăl kơ băt nhen tơdrong ‘mêm păng mơnat Kră Yang ‘măn ăn kơ bơ̆n wă kơ kơjăp kiơ̆ Kră Yang truh năr tôch.
Lu bơ̆n pơm kiơ wă kơ gơh ‘mong ăn tơdrong ‘mêm păng tơdrong mơnat mă Kră Yang ‘măn ăn kơ bơ̆n?
Ơ Kră Yang, inh bơnê kơ Ih, yua tơdrong ‘mêm mơnat Ih gom krôp đĭ đăng bơngai! Bơnê kơ Ih ‘Bă đei chă păng dŏng pơklaih inh. ăn kơ inh gơh jing kon Ih, lăm hnam dơnŏ Ih! Ô tơdrong ‘mêm ‘Bă tơtŏ dêh păng jrŭ să ưh kơ băt dang yơ! Apinh Ih ăn kơ inh oei lăm tơdrong tơ’bưh juăt hăm Ih păng băt ‘mêm kơ Ih hăm đĭ jơhngơ̆m. Krao khan yua anăn Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 8.
Kênh Youtube BHKTHN:
