Klei Aê Diê Blŭ: Y‑Mathiơ 6:19-21
Êlan kliăng: “Đăm mkăm pioh kơ diih pô ôh ngăn drăp yuôm ti lăn ala anei, anôk mâo muôr leh anăn bring bi rai, leh anăn mâo phung mnuih knĕ ƀoh mtih mŭt tlĕ.” (Y‑Mathiơ 6:19)
Klei êmuh ksiêm mĭn: Ya jing ngăn drăp ti lăn ala? Ya klei yuôm mơ̆ng klei Khua Yang Yêsu mtô mtă kơ drei kơ ngăn drăp ti lăn ala? Ya klei drei ngă jing soh hŏng klei Khua Yang mtă?
Hlăm ênuk gưl tal sa hlăk ka mâo ôh anôk hjiê pioh prăk, arăng khăng mâo tlâo ênhă êlan pioh răng kriê ngăn drăp. Tal sa, duh kơ čhiăm ao jăk mâo ênoh yuôm (Y‑Yôsuê 7:21). Mta klei duh pioh anei huĭ hyưt kơ “muôr” riŏ bi rai. Tal dua, mkăm pioh mnơ̆ng dhơ̆ng hrui wiă mơ̆ng bruă buh pla, guôn tơl truh yan luč liê kăp čhĭ ƀơ̆ng mnga. Boh blŭ “bring bi rai (rust)” hlăm klei blŭ phŭn, čiăng lač jing “klei ƀơ̆ng (eating)” djŏ hŏng boh klei truh anei, kyuadah mnơ̆ng êrui êbat đơ điêt, kkuih dưi ngă bi rai mnơ̆ng dhơ̆ng mdiê kuê mkăm pioh, amâodah pioh mkăm sui hruê đei mơ̆ng anăn ăt srăng jhat mơh. Tal tlâo, blei mah prăk pioh mdăp hlăm êbŭ mluê, dơr mdăp hlăm pưk sang. Ƀiădah ăt huĭ hyưt kơ phung knĕ yua mnơ̆ng ƀơ̆ng mta srăng “ƀoh mtih”, khăng mkra hŏng lăn lŭ, srăng tlĕ mă.
“Ngăn drăp” jing sa boh blŭ kluôm, amâo djŏ knŏng lač kơ čhiăm ao, mdiê kuê, prăk mah ôh, ƀiădah jih jang ngăn dŏ sa čô mnuih mâo. “Ngăn drăp” dưi lač kơ anôk bruă, klei hing ang, klei kƀăt siam, sa čô ung, sa čô mô̆, anak aneh, klei hrui ksiêm, klei mpŭ kơ pô, klei hing jăk… Snăn, “ngăn drăp ti lăn ala” čiăng lač kơ jih jang mnơ̆ng yap yuôm, ƀiădah dưi rai luč tui si lu êlan mdê mdê.
Klei Khua Yang Yêsu mtă “Đăm mkăm pioh kơ diih pô ôh ngăn drăp yuôm ti lăn ala anei”. Boh blŭ “mkăm pioh” hlăm klei Grek čiăng lač kơ klei dăp mnơ̆ng mdơ̆ng amâodah mgăn, leh anăn hlăm trăn Klei Aê Diê Blŭ anei lač kơ klei mdrŏng sah leh anăn ênoh yuôm pô mâo dŏ ngăn. Mta klei brei drei mđing, Khua Yang Yêsu amâo tuôm phat kđi kơ klei mdrŏng sah, ngăn drăp amâodah prăk kăk ôh, ƀiădah Ñu phat kđi kơ knhuah drei hŏng klei mdrŏng sah, ngăn drăp, prăk kăk, amâodah blŭ kluôm hĭn jing knhuah drei hŏng lăn ala. Hlăm klei blŭ phŭn, Khua Yang Yêsu lač: “Đăm mkăm pioh KƠ DIIH PÔ ÔH ngăn drăp yuôm ti lăn ala anei”. Mta phŭn čiăng lač jing KƠ PÔ. Kơ pô amâo djŏ ôh knŏng kơ hjăn pô, ƀiădah wăt kơ gŏ sang amâodah kơ ya klei jing dŏ pô, leh anăn wăt čiăng lač kơ klei yua ngăn drăp drei mâo anăn knŏng tui si klei pô kñăm čiăng.
Hĭn mơh, klei mtă anei ăt phat kđi kơ knhuah hdĭp knŏng čhĭn mĭn kơ ngăn drăp prăk kăk, amâodah ya mta klei hlăm lăn ala, dlăng klei anăn yơh jing phŭn, jing klei rơ̆ng, jing ênoh yuôm kơ pô, jing klei bi hrăp klei hdĭp pô. Blŭ mdê, mta phŭn amâo djŏ ôh kyua mnơ̆ng mnuă drei mâo, ƀiădah si klei mĭn drei, knhuah hdĭp drei hŏng dŏ ngăn drei mâo anăn. Klei Aê Diê Blŭ mtô mñă kơ drei, klei mâo prăk kăk dŏ ngăn amâo jing soh ôh, ƀiădah kơ knhuah hdĭp drei, huĭdah drei ngă soh hlăm klei kiă kriê dŏ ngăn anăn.
Si knhuah hdĭp ih hŏng dŏ ngăn, prăk kăk Aê Diê brei?
Wah lač: Ơ Khua Yang, brei kâo hdơr nanao si kâo hriê ti lăn ala anei ăt msĕ snăn mơh kâo srăng lui lăn ala anei, kâo amâo dưi djă ba mnơ̆ng ti lăn ala anei ôh, čiăng kơ đăm kâo dưm ai tiê kâo kơ mnơ̆ng dôk bhiâo êjai ti lăn ala anei.
Dlăng Klei Aê Diê Blŭ hlăm tlâo thŭn: Y‑Yôhan 11:1-44
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
