Mathais 6:19-21
Nqe cim:
“Nej tsis txhob khaws nyiaj txiag thiab qhov txhia chaw rau nej hauv ntiajteb no, rau qhov hauv ntiajteb no muaj ntsaum kabrwg thiab xeb noj, thiab muaj tubsab nyiag.” (Mathais 6:19).
Lus nug rau sawvdaws xav:
– Khoom qhov txhia chaw nyob hauv ntiajteb yog dabtsi?
– Tswv Yexus tej lus qhia txog khoom qhov txhia chaw hauv ntiajteb muaj lub ntsiablus li cas?
– Tej zaus peb kuj ua txhaum rau tus Tswv tej lus qhia licas?
Nyob rau ncua sijhawm uas tsis tau muaj tuamtxhab, tibneeg muaj peb lub tswvyim khaws qhov txhia chaws cia. Qhov xubthawj, yog nqis peev yuav tej khaubncaws thiab tej ntaub kim nyiaj uas zoo tshaj plaws khaws cia (Yausuas 7:21). Qhov nqis peev no tsi ruaj tsi khov vim yuav raug “ntsaum kabrwg” noj. Qhov tim ob, khaws tej qoob loo tseg cia txog thaum muaj kev tshaib nqhis, mam muag yuav pajlaum. Lolus “xeb (rust)” hauv lub ntsiab yog “noj (eating)”. Vim li ntawd tej qoob loo uas muab khaws tseg yuav muaj kab ntsaum, muaj nas noog rhuav kom puas tsuaj, lossis yuav piam zuj zus raws lub caij nyoog mus. Qhov tim peb, khaws nyiaj, khaws kub los ntim rau hauv tej hub thiab muab faus cia rau hauv nruab av. Txawm li ntawm los, tej zaus yuav muaj tubsab tuaj tsoo thiab khawb nyiag tau tej muab zais cia ntawd.
“Khoom qhov txhia chaw” yog ib lolus muaj lub ntsiab dav heev, tsi yog tej tsoos tsho, qoo loos, nyiaj txiag xwb tiamsis yog tas nrho txog txhua yam uas ib tus tibneeg muaj hauv lub neej. “Khoom qhov txhia chaw” tej zaus kuj yog meej mom, suab npe, lossis yog kev zoo nkauj, zoo nraug ntawm yus tus txiv, yus tus pojniam lossis yus tej menyuam … Yog li ntawd, “Khoom qhov txhia chaw hauv ntiajteb” no txawm yog yuav muaj nqis li cas los nws yuav txawj puastsuaj thiab ploj mus.
Tswv Yexus lo lus txwv qhia hais tias “tsis txhob khaws qhov txhia chaw rau hauv ntiajteb”. Lo lus “khaws” hauv lus Kilis txhais hais tias muab tib ua tshooj nce lossis tib phiaj tav, yog xav hais txog kev txhawj txhua yam tseg cia ua kom npluanuj thiab luag hwm. Yog ua zoo saib, Tswv Yexus yeej tsis tawmtsam kev muaj txiag npluanuj, tiamsis Nws tawmtsam peb tus cwjpwm uas ntshaw ua kom muaj txiag npluanuj hauv lub ntiajteb no. Lo lus tseeb ntsiab hnub thaud Tswv Yexus hais yog li no: “Nej tsi txhob khaws qhov txhia chaw tseg cia RAU YUS hauv ntiajteb no”. Teebmeem yog qhov uas khaws tseg cia RAU YUS thiab tsi yog tseg rau yus ib leeg xwb, tseem tseg rau yus tsev neeg, yus tej kwvtij neejtsa sawvdaws huv tibsi. Tsi tas li ntawd xwb, tseg cia RAU YUS tseem txhais hais tias, yog yus siv txhua yam uas yus muaj raws li yus kev ntshaw.
Heev tshaj qhov ntawd, Tswv Yexus qhia yog yuav tsum tswj tus kheej, txhob pheej rau siab mus nrhiav qhov txhia chaw, nyiaj txiag lossis txhua yam uas yog ntiajteb li thiab saib tej ntawm yog yam uas tseemceeb, txhob pheej xav hais tias tej khoom ntawd pab tau yus, muaj nqis rau yus thiab ua rau yus txaus siab. Qhov tseemceeb tsis yog peb muaj dab tsi tiamsis peb xav li cas thiab muaj tus cwjpwj li cas rau tej khoom uas peb muaj. Vajtswv Txojlus qhia hais tias, qhov uas peb muaj nyiaj txiag thiab qhov txhia chaw tsi yog kev txhaum, tiamsis peb tus cwjpwj uas saib xyuas tej khoom qhov txhia chaw ntawm tej zaus yuav txawj yuam kev ua txhaum, tsis xav mloog tus Tswv lus.
Thov Vajtswv
Vajtswv, thov Koj qhia kom nyuam yaus nco ntsoov hais tias nyuam yaus yug los li cas mas yuav rov mus li ntawm thiab yuav nqa tsis tau ib yam dab tsi hauv ntiajteb no mus, kom nyuam yaus txhob tso siab rau txhua yam ua nyob ib pliag hauv ntiajteb no. Amees.
Peb muaj tus cwjpwj li cas rau tej khoom nyiaj txiag thiab qhov txhia chaw uas Vajtswv pub?
Nyeem Vajluskub hauv peb lub xyoos: Yauhas 11:1-44.
Kênh Youtube BHKTHN:
