Bơtho Khôi Juăt 32:7-14
“Minh Kră Yang đĕch chông anhăk lu kon pơlei Sư, Ưh kơ đei yang kiơ nai.”
(Bơtho Khôi Juăt 32:12)
Nơ̆r jet tơchĕng pơwao:
– ‘Bok Môis krao kon pơlei Isơrael athei ‘blŏk dơ̆ng kơ dôm tơdrong kiơ?
– Dôm tơdrong gĭt kăl noh đei yua ăn thoi yơ hăm kon pơlei Kră Yang?
– Pơm thoi yơ wă kơ lu bơ̆n oei dơ̆ng kơjăp lăm đon lui gơnang kơ Kră Yang mă tơ’bơ̆p tơdrong gleh truh pơlong lăng lăm chăl arih bơ̆n?
Nơ̆r Môis hơri, pơtrơp dơ̆ng lăm nơ̆r jô̆ tơdrong yoch kon pơlei Israel ưh kơ chu yom Kră Yang noh bơih nơ̆r krao pơtơm athei ‘blŏk dơ̆ng lu tơdrong ‘lơ̆ng tih tin đơ̆ng ‘Bok Kei-Dei đei pơm bơih kơ lu yă ‘bok sư, đei lơ tơdrong tih tin đơ̆ng Kră Yang đei pơm bơih lăm kon pơlei Isơrael. Mă-lei trŏ kơ pơma minh lăm tơdrong ‘lơ̆ng hloh noh đơ̆ng Kră Yang rơih iŏk lu sư jing kon pơlei gah Kră Yang. ‘Bok Kei-Dei rơih iŏk lu sư kơplah lu sư tam mă đei adrĕch adrung kơdih, lu bơ̆n gơh ‘bôh tơdrong ‘nâu lăm trong 8-9. Ưh kơ thoi noh đĕch, pơtrơp lăm trong 10-11, ‘bok Môis đei tơ’blŏk ăn gah tơdrong chông anhăk, wei rong, păng đei ‘Bok Kei-Dei năm hơdai hăm kon pơlei Isơrael kơplah lu sư ‘nao minh khul pơlei tŏ sĕt oei lăm char glă ưh kơ đei mŭk tơmam. Mă-lei, đơ̆ng rŏng kơ lu sư oei lăm dêh Kră Yang pơkă đei tôm mah bơih, na kon pơlei Isơrael tă kơ sơngah kơ Kră Yang.
Dơ̆ng ‘bơ̆t anăp kon pơlei Isơrael ưh kơ chu yom hlôi đơ̆ng oei lăm dêh Kră Yang pơkă, ‘bok Môis đei pơma khan tơpăt thoi âu, minh Kră Yang đĕch Tơ’ngla chông anhăk kon pơlei Sư ưh kơ đei yang kiơ nai (trong 12). Tơdrong trŏ kơ sơ’ngon mă khan nơ̆r pơma tơpăt thoi noh kư̆m ưh kơ gơh kĕ găn trong năm wơ̆l jrok, rok kiơ̆ mă kon pơlei Isơrael chă yang nai đơ̆ng rŏng kơ noh. Trŏ kơ ơh sơ’ngon tơpă, dah pơma khan, hơngah kơ Tơ’ngla mă pơjing păng dŏng pơklaih bơ̆n noh bơih tơdrong mă kon pơlei Isơrael đei ‘blŏk dơ̆ng đơ̆ng Kră Yang đei ăn kơ kon pơlei sư.
Lăm trong oei yak kiơ̆ Kră Yang, ‘blŏk dơ̆ng tơdrong pŭn hiôk ‘lơ̆ng hlĭch chrơp đơ̆ng Kră Yang ăn lăm chăl arih bơ̆n, hnam dơnŏ păng adrĕch adrung lu bơ̆n noh tơdrong mă kăl hloh. Dah ưh kơ ‘blŏk păng ưh kơ lăng tơdrong jang ‘lơ̆ng Kră Yang đei pơm ăn kơ bơ̆n, lu bơ̆n anat kơ wă bơtho dơ̆ng kon sâu gah jơhngơ̆m băt bơnê păng anat wă yak năm tơ anăp ning mônh kơjăp ‘lơ̆ng. yua kơ trong yak kiơ̆ Kră Yang ưh kơsĭ chơt hiôk, pŭn hiôk, mă-lei kư̆m mơ̆n đei tơdrong gleh anat, ơh sơ’ngon hai mơ̆n. đei tơdrong ơh sơ’ngon nhen hloh kơ chơt hiôk bơ̆n đei hlôi bơih, kư̆m đei tơdrong gleh truh wă pơlong lăng pơm kơ đon lui bơ̆n ngĭl ngŭl, noh bơih tơdrong mă lu bơ̆n ‘bôh kơdih akâu nhen thoi roi ưh pă kĕ wă yak kiơ̆ trong Kră Yang. Đơ̆ng đei thoi noh, lăng đêl hlôi bơih tơdrong ‘lơ̆ng tih tin mă Kră Yang ăn lăm chăl arih bơ̆n gô pơm ăn pơthim jơhngơ̆m pran wă kơ rai kơjăp lăm đon lui kơ Kră Yang mă khan pơgăn lăm chăl arih, apinh ‘nĕ kơ bu mă hiơt kơ tơdrong jang Kră Yang pơm.
Lu bơ̆n ngăl tơ’blŏk gah tơdrong jang Kră Yang đei pơm lăm chăl arih bơ̆n, hnam dơnŏ păng Khul Bơngai Lui thoi yơ?
Kơkuh kơ Ih ơ Kră Yang, Ih bơih Tơ’ngla ăn pŭn hiôk hlĭch chrơp ưh kơ kĕ kơ jô̆ lăm chăl arih inh, apĭnh ăn kơ inh ling lang arih băt bơnê kơ Kră Yang păng pơkă rok kiơ̆ trong Ih bơtho tơ’bôh, mă khan đei anat anot, krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 19.
Kênh Youtube BHKTHN:
