Chivkeeb 11:1-9
Nqe cim:
“Lawv hais tias, nimno peb cia li tsim ua ib lub nroog thiab puab ib tug pejthuam kom siab nto ntuj, peb thiaj muaj koob muaj npe nyob nto moo lug thiab tsis tawg khiav mus nyob ua sab ua sua thoob ntiajteb” (Chivkeeb 11:4)
Lus nug xav:
– Tom qab uas dej nyab ntiajteb, tibneeg ua dabtsi?
– Peb kawm tau zaj kawm twg rau peb tiam no?
– Vajtswv tau ua li cas thaum tibneeg ua txhaum?
Tom qab uas dej nyab ntiajteb, tej neeg sawvdaws nyob hauv ntiajteb muaj ntau qhov koom: koom pogyawg, koom lus hais, thiab koom nyob sab hnubtuaj. Thaum tibneeg coob zuj zus tuaj, lawv pib tawm mus thiab txiav txim siab mus ua neej nyob ntawm lub tiaj nrag Npanpiloos (nqe 2). Lawv tau sablaj li no: “Nimno peb cia li tsim ua ib lub nroog thiab puab ib tug pejthuam kom siab nto ntuj, peb thiaj muaj koob muaj npe nyob nto moo lug thiab tsis tawg khiav mus nyob ua sab ua sua thoob ntiajteb” (nqe 4). Saib sab nraud, tej uas lawv ua zoo nkaus li yog lawv muaj kev koom tes thiab muaj nqis. Tiamsis txhua yam uas lawv ua puavleej yog tabtom tawmtsam Vajtswv. Vajtswv samhwm rau Nau-es cov xeebntxwv li no: “Nej yuav muaj tub muaj ki coob, kom nej thiaj muaj xeebntxwv huamvam mus nyob puv ntiajteb” (Chivkeeb 9:1). Vajtswv xav kom tibneeg khiav mus nyob thoob qab ntuj thiab tswj lub ntiajteb no, tiamsis lawv xav kom lawv nyob ua ke ib qhov chaw xwb. Tsimnyog hwm tus Tswv, los lawv cia li npaj siab puab ib tug pejthuam kom siab nto ntuj qhia tias lawv ua tau li tus Tswv ua. Twb tsimnyog ua kom Vajtswv lub npe tau qhuas los lawv cia li ua kom lawv tau ntsejmuag.
Nimno, peb kuj muaj qhov tabtom “puab pejthuam Npanpees” thaum peb nrhiav koob npe rau yus hloov qhov kev ua rau Vajtswv tau ntsejmuag, hloov qhov ua neej raws Vajtswv nyiam. Peb kuj muaj qhov koom tes, koom siab tau tiamsis txhob muab qhov ntawd los ua kom txaus yus siab, ua rau Vajtswv lub npe raug thuam. Kev koom siab tiag yog koom siab ua haujlwm raws li Vaj Ntsujplig qhia.
Thaum tibneeg muaj kev tawmtsam, Vajtswv ua rau neeg nyias hais nyias ib yam lus kom lawv tsis sib totaub (nqe 7). Qhov uas hais lus tsis sib totaub dhau los ua qhov nyuaj ntawm tibneeg nyob txhua tiam. Qhov ntawd yog Vajtswv txojkev txiav txim, tiamsis kuj yog qhov uas pab tibneeg tig rov los cuag Nws. Vim hais lus tsis sib thooj, yog li tes haujlwm puab pejthuam thiaj nres, lub siab khav txiv raug txo qis, kom lawv paub tias yus mus tsis tau nto ntuj. Yog li ntawd, lawv thiaj khiav mus rau txhua qhov thiab nyob thoob qab ntuj, raws nraim li Vajtswv tau samhwm tseg. Thiab yam tshwjxeeb dua, thaum tibneeg siv zog puab pejthuam Npanpees mus kom nto ntuj tiamsis ua tsis tiav, ces Vajtswv tus Tub saum ntuj los yug, Nws xub los cuag tibneeg, kam tuag txhiv tibneeg saum ntoo khaublig. Vajtswv tsis yog rau txim rau kev txhaum xwb, tiamsis Nws tseem npaj kev pab rau qhov teebmeem kev txhaum.
Thov Vajtswv,
Vajtswv, thov Koj zam txim rau nyuam yaus vim ntau zaus ua neej raws siab nyiam, saib tus kheej tseemceeb thiab nrhiav kev ua kom tus kheej tau koob npe. Ua tsaug Tswv Yexus tau los tuag saum ntoo khaublig cawm nyuam yaus dim thiab tau los ua tus Tswv neeg. Thov cia nyuam yaus lub neej ua rau Vajtswv tau ntsejmuag, tsis coj lwm tus mus rau tus pejthuam, tiamsis coj mus rau ntawm Tswv Yexus tus ntoo khaublig. Nyuam yaus tuav Tswv Yexus lub npe thov, Amees.
Peb tabtom puab pejthuam Npenpees rau yus los yog ua rau Vajtswv lub npe tau qhuas?
Nyeem Vajluskub hauv peb lub xyoo: Nehemis 9
Kênh Youtube BHKTHN:
