2 Xwmtxhwwj 29:20-24
Nqe cim:
“Tej pa khoom fij no yuav tsw qab ntxiag ua rau tus TSWV txaus siab.” (Levis Kevcai 1:9b)
Lus nug rau sawvdaws xav:
– Vajntxwv Hexekiyas tau ua dabtsi tom qab lub Tuamtsev tau ntxuav huv?
– Tes haujlwm no qhia tshwm vajntxwv muaj lub siab zoo li cas?
– Niaj hnub nimno, peb fij dabtsi rau tus Tswv los pauj Nws txojkev hlub?
Tom qab lub Tuamtsev tau ntxuav huv, tes haujlwm fij lub Tuamtsev dua tshiab yuav tsum tau ua tamsim ntawd. Yog li ntawd, Vajntxwv Hexekiyas “sawv ntxov” mus hu tagnrho cov thawjcoj hauv lub nroog tuaj sib sau thiab lawv uake mus rau hauv tus Tswv lub Tuamtsev, qhov no qhia tshwm vajntxwv muaj lub siab kub lug xav txhim kho kev pehawm tus Tswv. Lawv coj nyuj, menyuam yaj thiab tshis, ib yam xya tug, qhia tshwm kev puv ntoob (zoo kawg nkaus) vim lawv xav ntxuav kev txhaum kom tagnrho. Lawv muab cov tsiaj no los tua fij ua kev daws txim rau lawv lub tebchaws, rau vajntxwv, rau lub Tuamtsev dawbhuv uas yog cov neeg ua haujlwm hauv lub Tuamtsev thiab rau lub Tuamtsev uas raug ua qias, dua li ntawd kuj yog cia daws cov Yudas uas yog tej pejxeem tej kev txhaum.
Cov povthawj fij ob yam khoom fij los mus fij lub Tuamtsev dua tshiab. Tim ib, tej khoom fij hlawv (nqe 24, 27) uas yog heev nyuj, laug yaj thiab menyuam yaj. No yog yam khoom fij uas tus tsiaj ntawd yuav tsum tau muab hlawv tagnrho rau tus Tswv, piv txog kev fij tagnrho thiab kev hwm tus Tswv kawg siab ntawm tus neeg pehawm tus Tswv. Yam khoom fij no kuj muaj lub ntsiab tias ua kom huv thiab dawbhuv (Levis Kevcai 16:19). Tim ob, tej khoom fij daws txim tau fij dhau los ntawm cov laug tshis (nqe 23) kom tej pejxeem tej kev txhaum tau tshem tawm ntawm tus Tswv lub qhovmuag mus. Vajntxwv thiab tej pejxeem sawvdaws tsa tes rau saum cov tshis kom lawv tej kev txhaum hla mus rau cov tshis. Lawv tej kev txhaum tau tshem mus thiab hla mus rau cov tshis uas muab fij ntawd.
Tej khoom fij tiam Vajluskub Qub yog tus duab piv txog Yexus Khetos thiab tej uas Nws ua rau peb saum ntoo khaublig. Niaj hnub nimno, cov ntseeg Yexus tsis tas yuav fij tej khoom fij daws txim ntxiv lawm, vim Yexus Khetos tau tuag theej peb tej kev txhaum lawm. Peb tsis tas fij tej tsiaj ua khoom fij hlawv xyeem ntxiv, tiamsis kuj zoo ib yam li lub thaj tiam Vajluskub Qub yuav tsum ceev kom hluavtaws tsis txhob tuag (Levis Kevcai 6:8-13) ces peb kev fij tus kheej thiab hwm tus Tswv ntawm cov ntseeg kuj yuav tsum tsis txhob tu. Timthawj Paulus ntuas cov ntseeg, “Cov kwvtij, Vajtswv hlub peb kawg nkaus li, yog li ntawd kuv thiaj ntuas nej hais tias thaum nej tseem ua neej nyob no, nej yuav tsum muab nej lub cev fij rau Vajtswv kom dawbhuv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam” (Loos 12:1). Tus Tswv tsis taij kom peb yuav tsum tuag sab nqaij tawv zoo li cov tsiaj muab fij thaum ub tiamsis Nws taij kom peb yuav tsum ciaj ua neej rau tus Tswv. Txhua hnub, txhua lub sijhawm nyob hauv lub neej, peb yuav tsum fij yus tus kheej rau tus Tswv zoo ib yam li tej khoom fij uas ciaj sia thiab dawbhuv dhau los ntawm kev qaij deb kev ua neej li neeg ntiajteb, kom ua tau lub neej tshiab uas tus Tswv pub (Loos 12:2; Filipis 4:18). Tagnrho tej ntawd yuav zoo li tej pa khoom fij uas tsw qab ntxiag ua rau tus Tswv txaus siab.
Thov Vajtswv,
Tus Tswv, nyuam yaus ua koj tsaug vim koj txojkev hlub, nyuam yaus thiaj tau txais kev zam txim. Thov pab kom nyuam yaus txiav txim siab paub muab nyuam yaus lub neej fij rau tus Tswv kom zoo li tej khoom fij uas cia sia thiab dawbhuv kom haum koj siab. Nyuam yaus tuav Yexus Khetos lub npe thov, A-mees.
Peb lub neej puas yog ib qhov khoom fij uas ciaj sia thiab dawbhuv haum tus Tswv siab lawm tau?
Nyeem Vajluskub hauv peb lub xyoo: 2 Xamuyees 12
Kênh Youtube BHKTHN: