Klei Aê Diê Blŭ: II Bruă Mtao 19:14-19
Êlan kliăng: “Iêô wah lač bĕ kơ Kâo, leh anăn Kâo srăng lŏ wĭt lač kơ ih, leh anăn srăng hưn kơ ih mnơ̆ng prŏng leh anăn hgăm, mnơ̆ng ih amâo tuôm thâo ôh.’” (Y‑Yêrêmi 33:3)
Klei êmuh ksiêm mĭn: Ya klei dleh dlan mtao Y‑Hêsêkia tuôm? Si mtao wĭt ngă leh anăn si boh tŭ dưn mâo? Ya klei hriăm kơ drei mơ̆ng ai mĭn wah lač ti anăp klei dleh dlan truh kơ mtao Y‑Hêsêkia?
Leh mtao Y‑Salômôn djiê, čar Israel bi kah mbha jing dua. Pluh djuê ana tĭng phă dưr mkŏ mjing čar Israel. Dua djuê ana Yuđa leh anăn Benjamin tĭng phă dhŭng mjing čar Yuđa. Mtao Y‑Hêsêkia jing mtao tal pluh dua kơ čar Yuđa. Mâo klei hing mni kơ mtao snei “…Ñu knang kơ Yêhôwa Aê Diê Israel, tơl amâo mâo pô msĕ si ñu hlăm jih jang phung mtao Yuđa êdei kơ ñu, kăn mâo rei hlăm phung êlâo kơ ñu. Kyuadah ñu dôk kjăp hŏng Yêhôwa, ñu amâo klah đuĕ ôh mơ̆ng klei tui hlue Yêhôwa, ƀiădah djă pioh klei mtă Yêhôwa brei leh kơ Y‑Môis.” (II Bruă Mtao 18:5-6). Mtao mdlưh bi rai jih rup yang, lŏ mkŏ mjing klei kkuh mpŭ kơ Yêhôwa hlăm Sang Yang ti Yêrusalem.
Hlăm ênuk anăn, čar Asiri đĭ hriê jhŏng ktang, hiu nao plah mă lu čar mkăn. Thŭn tal pluh pă ênuk mtao Y‑Hêsêkia, mtao Asiri jing Y Sênakêrip ba kahan nao ksŭng blah lu boh ƀuôn hlăm čar Yuđa leh anăn wang jŭm ƀuôn prŏng Yêrusalem. Mtao Y‑Sênakêrip čih hră mơĭt kơ mtao Y‑Hêsêkia brei ñu tŭ klei ñu amâo lŏ dưi ôh, leh anăn lač kơ Yêhôwa Aê Diê ăt jing msĕ si phung yang tue mkăn mơh, amâo dưi bi mtlaih čar Yuđa mơ̆ng kngan mtao Asiri ôh.
Dôk ti anăp klei dleh dlan prŏng prĭn msĕ snăn, ya klei mtao Y‑Hêsêkia ngă leh? Êlâo hĭn, mtao tiŏ nao phung khua nao hưn hŏng khua pô hưn êlâo Y‑Êsai thâo, leh anăn akâo kơ ñu wah lač hŏng Aê Diê. Bi mtao pô, nao kơ Sang Yang Yêhôwa, mblang hră anăn ti anăp Yêhôwa. Mtao đăo kjăp kơ Yêhôwa jing Aê Diê hdĭp, Pô hrih mjing jih jang mnơ̆ng, adiê leh anăn lăn ala, Pô mâo klei dưi kơ jih jang ƀuôn ala mtao ti lăn ala. Amâo dưi bi msĕ Yêhôwa hŏng phung rup yang hơăi mang mkra mjing hŏng kngan mnuih ôh. Mtao kwưh akâo kơ Aê Diê ngă bruă bi mtlaih čiăng kơ jih jang ƀuôn ala mtao ti rŏng lăn ala thâo kral knŏng hjăn Yêhôwa yơh jing Aê Diê sĭt. Boh tŭ dưn jing mlam anăn mtam, mâo sa čô dĭng buăl jăk Yêhôwa bi mdjiê 185.000 čô kahan hlăm kđông phung kahan Asiri, snăn mtao Y‑Sênakêrip lŏ hrui wĭt jih kahan ñu. Dơ̆ng mơ̆ng anăn, hlăm ênuk mtao Y‑Hêsêkia, čar Yuđa mâo klei êđăp ênang, đĭ kyar.
Hdruôm hră Klei Yăl Dliê brei ƀuh, mtao Y‑Hêsêkia huĭ mpŭ kơ Aê Diê jih klei hdĭp ñu, hur har kkuh mpŭ leh anăn mă bruă kơ Aê Diê. Tơdah tuôm hŏng ya klei lông dlăng prŏng, mtao amâo wĭt ngă hjăn păn ñu pô ôh, ƀiădah êlâo hĭn tui duah klei Khua Yang čiăng hŏng khua pô hưn êlâo Y‑Êsai, leh anăn mtao pô yơh nao kơ Sang Yang čiăng wah lač hŏng jih ai tiê leh anăn myơr klei dleh dlan kơ Yêhôwa Aê Diê. Hŏng mtao, klei tŭ jing leh anăn klei dưi hĭn amâo djŏ knang kơ klei ktang phung lĭng kahan ôh ƀiădah jing klei wah lač yơh. Tơdah “Yêhôwa dôk mbĭt hŏng ñu. Ti anôk ñu kbiă nao, ñu mâo klei dưi.” (II Bruă Mtao 18:7). Klei hdĭp phung anak ƀuôn sang Aê Diê ti lăn ala amâo tlaih ôh mơ̆ng klei dleh dlan. Phung roh dôk kăp nanao čiăng ksŭng ngă kơ drei. Klei tŭ jing mơ̆ng mtao Y‑Hêsêkia bi mđĭ ai drei djă pioh bi kjăp klei đăo kơ Khua Yang, hŏng jih ai tiê wah lač leh anăn dôk hdĭp tui si klei Khua Yang čiăng grăp hruê. Yêhôwa Aê Diê Pô yơh srăng bi blah brei kơ drei.
Tơdah tuôm hŏng klei dleh dlan hlăm klei hdĭp, drei wĭt ngă hjăn păn drei pô, amâodah myơr hưn klei dleh dlan hŏng Khua Yang?
Wah lač: Ơ Khua Yang, akâo Khua Yang đru kâo kkuh mpŭ leh anăn mă bruă kơ Khua Yang hŏng klei sĭt suôr. Tơdah tuôm hŏng klei lông dlăng, akâo Khua Yang mtrang mngač kơ kâo hŏng Klei Ih Blŭ leh anăn đru kâo gĭr bi blah hlăm klei wah lač nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Êsai 63
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
