Klei Aê Diê Blŭ: Y‑Đaniel 6:10
Êlan kliăng: Tơdah Y‑Đaniel thâo mtao čih anăn leh kơ hră anăn, ñu mŭt hlăm sang ñu ƀăng bhă điêt hlăm adŭ tal dlông ñu pŏk jih phă ƀuôn Yêrusalem; leh anăn tlâo blư̆ grăp hruê ñu čuôn kơŭt wah lač leh anăn bi mni kơ Aê Diê ñu msĕ si ñu bhiăn ngă leh.(Y‑Đaniel 6:10)
Klei êmuh ksiêm mĭn: Ya klei Y‑Đaniel ngă tơdah hmư̆ klei mtrŭn kăm ghă wah lač kơ yang mkăn êngao kơ mtao? Hlăm êlan 10 brei drei ƀuh si knhuah hdĭp Y‑Daniel hlăm klei wah lač? Si drei ngă čiăng kơ klei wah lač amâo dưi kƀah ôh hlăm klei hdĭp drei?
Tơdah thâo klei mtrŭn kăm ghă mbĭt hŏng klei bi kmhal bhĭr hlăm ƀăng êmông gu hlei pô amâo gưt hlue, Y‑Đaniel “mŭt hlăm sang ñu ƀăng bhă điêt hlăm adŭ tal dlông ñu pŏk jih phă ƀuôn Yêrusalem” (êlan 10). Si ngă kdrêč điêt dhiêt adŭ tal dlông hŏng ƀăng bhă điêt pŏk jih phă ƀuôn Yêrusalem jing hĕ klei yuôm? Hlăm I Bruă Mtao 8, hlăk knăm myơr Sang Yang, mtao Y‑Salômôn wah lač tơdah phung ƀuôn sang Aê Diê bi blah hŏng phung roh, tơdah klei ư̆ êpa truh, tơdah arăng mă jing mnă… tơdah diñu wir ƀô̆ phă čar, phă ƀuôn prŏng Aê Diê ruah leh, leh anăn phă Sang Yang wah lač, hlăk anăn Aê Diê srăng pap brei leh anăn mđing hmư̆ klei diñu kwưh akâo. Kyua hŏng klei đăo anăn yơh, wăt tơdah tlă anăp hŏng klei mtrŭn kăm ghă, Y‑Đaniel amâo đuĕ dăp hlăm anôk hgăm huĭ arăng ƀuh ñu wah lač ôh. Ñu amâo dlăng kơ klei wah lač hŏng Aê Diê jing bruă soh amâodah jing klei hêñ bi huĭ ñu ôh. Ñu dlăng klei bi mguôp hŏng Aê Diê jing yuôm hĭn kơ bruă “ kiă kriê jih ƀuôn ala mtao” mtao mĭn čiăng jao kơ ñu (êlan 3), yuôm hĭn kơ asei mlei ñu pô.
Ti anôk adŭ tal dlông anăn, “leh anăn tlâo bliư̆ grăp hruê ñu čuôn kơŭt wah lač leh anăn bi mni kơ Aê Diê ñu msĕ si ñu bhiăn ngă leh” (êlan 10). Knhuah ñu čuôn kơŭt wah lač jing knhuah luă gŭ leh anăn huĭ mpŭ. Boh phŭn klei ñu wah lač amâo djŏ knŏng akâo ôh, wăt tơdah klei ngă anăn jing djŏ hŏng klei truh ñu dôk găn, ƀiădah ăt ñu duah ƀuh lu mta klei čiăng bi mni kơ Aê Diê. Ênoh blư̆ ñu wah lač tlâo blư̆ sa hruê, ñu ngă nanao msĕ snăn grăp hruê. Mpŭ mni kơ Aê Diê, wah lač leh anăn wah lač lu blư̆ grăp hruê jing sa klei mưng hdĭp nanao hlăm klei hdĭp ñu. Sĭt nik kyua hŏng klei anăn yơh, ñu ăt êđăp ênang ti anăp klei arưp aram arăng bhĭr hwiê hlăm ƀăng êmông gu, ăt dưi ha blŭ klei bi mni kơ Aê Diê amâo djŏ klei rŭng ênguôt, ƀuah ăl ôh. Sĭt nik kyua hŏng klei anăn yơh, ñu mâo thiăm klei ktang hĭn dưi dôk êđăp ênang ti krah klei arăng keh nač, duah lu mnêč čiăng ngă jhat kơ ñu.
Sa anôk pioh hjăn, sa knuih hdĭp djŏ, sa knhuah ngă djŏ, ênoh blư̆ bhiăn ngă nanao đru kơ Y‑Đaniel mâo klei hdĭp wah lač bŏ hŏng klei myang leh anăn hdĭp. Si ngă gơ̆ng bruă klei wah lač mâo hlăm klei hdĭp drei? Akâo kơ Khua Yang brei drei hriăm tui klei bi hmô mơ̆ng Y‑Đaniel hlăm knuih kpă sĭt, luă gŭ leh anăn thâo hdơr knga tơdah myơr klei wah lač kơ Ama drei hlăm adiê.
Ya mta klei brei bi mlih hĕ čiăng kơ klei wah lač dưi jing klei bhiăn ngă hlăm klei hdĭp mngăt ai tiê, kyua klei anăn ba klei myang đru drei tlă anăp hŏng klei dleh dlan hlăm klei hdĭp?
Wah lač: Ơ Khua Yang, akâo kơ Ih brei kâo thâo ƀuh klei wah lač hŏng Mtao kơ jih jang mtao jing klei pap prŏng snăk. Akâo kơ Ih đru kâo brei mâo klei mtrŭt djŏ, knhuah ngă djŏ, hdră êlan djŏ leh anăn pioh anôk jăk čiăng kơ klei hdĭp wah lač kâo mâo klei hdĭp sĭt.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y‑Nêhêmi 2:11-3:19
