Klei Aê Diê Blŭ: Klei Mtô Mñă Klei Bhiăn 25:11-12
Êlan kliăng: “Tơdah dua čô êkei bi čĭk, leh anăn mô̆ sa čô hriê giăm čiăng dŏng ung ñu mơ̆ng kngan pô dôk čăm gơ̆, leh anăn yơr kngan mă djŏ ti kuang êkei anăn, snăn diih srăng khăt hĕ kngan mniê anăn; đăm dlăng kơ ñu hŏng klei pap ôh” (Klei Mtô Mñă Klei Bhiăn 25:11-12).
Klei êmuh ksiêm mĭn: Ya ngă klei mniê “yơr kngan djŏ mă ti kuang” sa čô êkei jing klei ngă amâo dưi tŭ ôh? Ya ngă klei bhiăn Aê Diê bi kmhal ktrŏ bruă ngă anei? Hruê anei si ngă ih mă yua klei mtă mơ̆ng klei bhiăn anei?
Pruê̆ blŭ “yơr kngan djŏ mă ti kuang” boh blŭ phŭn hlăm klei Hêbrơ arăng yua čiăng lač kơ sa bruă ngă hŏng klei măk ƀai, čŏng čiăng ngă. Snăn yơh, hlăm klei ngă tui si čih hlăm klei bhiăn anei, čiăng lač kơ sa čô mô̆ hrô kơ klei ñu akâo kơ pô mkăn đru bi grăng brei klei bi mneh msao,ƀiădah čiăng kơ ung ñu mâo klei dưi, snăn ñu pô hriê dŏng ung ñu hŏng klei mnêč leh anăn klei krêñ, ngă klei boh êbeh leh anăn ngă klei hêñ. Hlăm Klei Aê Diê Blŭ, arăng yap asei mlei mnuih jing dŏ Aê Diê hrih mjing hŏng klei jăk klă tui si rup Aê Diê pô. Kyuanăn bruă sa čô mniê ngă klei jhat kơ asei mlei sa čô êkei hŏng klei čŏng čiăng mă ti kuang gơ̆ jing sa klei amâo dưi tŭ ôh.
Arăng yap bruă mniê anei ngă jing soh kyua lu mta klei: tal sa, mniê anei ngă jhat kơ asei mlei pô mkăn; tal dua, klei đru dŏng ung ñu jing bruă ngă hŏng klei krêñ leh anăn klei knhông amâo guôp ôh hŏng klei jing sa čô mniê Israel; tal tlâo, bruă ngă anei srăng bi hmăi jhat kơ klei êkei srăng mâo anak; hŏng phung Israel, klei kkiêng anak bi lar êngŭm djuê ana jing sa bruă ngă yuôm bhăn snăk. Wăt tơdah pô jing mô̆ ngă hŏng klei djŏ jing čiăng bi mtlaih ung ñu dưn mơh, ƀiădah amâo djŏ ôh kyua klei kñăm čiăng djŏ anăn ñu čuăn ngă sa mta bruă amâo djŏ leh anăn gao klei bhiăn msĕ snăn. Čiăng gang bruă msĕ snăn truh ti krah phung Israel, Aê Diê kruak čua sa klei bi kmhal ktrŏ snăk, brei arăng khăt hĕ kngan mniê anăn hŏng klei amâo pap ôh.
Hruê anei, klei bhiăn anei amâo lŏ yua ôh, ƀiădah mâo dua mta klei brei drei hdơr anăn jing, đăm drei ngă jhat kơ asei mlei pô mkăn leh anăn đăm yua hdră soh pioh mă bruă kơ klei kñăm čiăng djŏ ôh. Hlăm internet, facebook leh anăn hlăm hră klei mrâo grăp hruê, ênưih snăk drei ƀuh klei yăl dliê kơ klei bi trih gao klei bhiăn hŏng bruă ngă êgao hnơ̆ng čiăng bi hêñ, bi knap pô tlĕ piu. Mâo lu mnuih mâo klei hơ̆k leh anăn tŭ ư kơ bruă ngă anăn. Jing phung đăo kơ Krist, brei drei hdơr wăt tơdah amâo tlaih ôh kơ klei bi mneh msao hdơ̆ng găp hlăm klei hdĭp grăp hruê, ƀiădah đăm drei msir mkra ôh klei bi mneh msao anăn hŏng klei măk ƀai leh anăn ngă jhat kơ asei mlei hdơ̆ng găp. Boh nik nak, đăm ôh kyua klei kñăm čiăng jăk snăn yua hdră êlan soh ngă jhat kơ asei mlei leh anăn knuih kơhưm pô mkăn.
Hŏng ya êlan hdră drei khăng msir mkra klei bi mneh msao?
Wah lač: Ơ Khua Yang, jing Pô hrih mjing kâo tui si rup Ih pô. Bi hriăm kâo thâo mpŭ kơ asei mlei Ih brei leh, đru kâo amâo ngă klei jhat kơ asei mlei leh anăn kơ knuih kơhưm pô mkăn ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
