Klei Aê Diê Blŭ: Y‑Mathiơ 19:23-26
Êlan kliăng: “Ƀiădah Yêsu dlăng kơ digơ̆ leh anăn lač, “Klei anăn mnuih amâo dưi ngă ôh, ƀiădah Aê Diê dưi ngă sơăi jih jang klei” (Y‑Mathiơ 19:26)
Klei êmuh ksiêm mĭn: Ya klei Khua Yang Yêsu lač leh kơ phung mdrŏng? Ya klei Khua Yang čiăng bi hriăm mơ̆ng rup “aseh samô” leh anăn “ƀăng êrŭm”? Ya klei bi hriăm drei mă tŭ kơ drei pô?
Leh êkei hlăk ai mdrŏng đuĕ bŏ hŏng klei ênguôt, Khua Yang Yêsu lač kơ phung ƀĭng kna Ñu “jing dleh snăk kơ sa čô mdrŏng mŭt hlăm ƀuôn ala mtao adiê (êlan 23). Khua Yang čiăng lač amâo dưi yua dŏ dô, ngăn drăp bi mlih mă sa anôk hlăm ƀuôn ala mtao Aê Diê ôh. Ñu mă klei bi hmô hŏng sa drei aseh samô jing hlô mnơ̆ng prŏng leh anăn ƀăng êrŭm jing ƀăng điêt dhiêt, jing dŏ mưng ƀuh hŏng phung Yuđa, čiăng kñăm kơ klei phung mdrŏng amâo dưi knang kơ bruă jăk diñu pô ôh čiăng mŭt hlăm ƀuôn ala mtao adiê.
Drei mâo klei êmuh ya ngă Khua Yang Yêsu knŏng lač kơ phung mdrŏng, leh anăn djŏ mơ̆ jih jang phung mdrŏng mâo lu dŏ ngăn amâo dưi mŭt sơăi hlăm ƀuôn ala mtao Aê Diê? Khua Yang amâo čiăng lač snăn ôh, ƀiădah Ñu čiăng lač mâo mnơ̆ng bi gun prŏng ghă êkei hlăk ai anăn leh anăn jih jang phung mdrŏng mkăn hriê kơ ƀuôn ala mtao adiê. Mâo dua mnơ̆ng bi gun phŭn hŏng phung mdrŏng, tal sa jing klei khăp kơ dŏ ngăn; klei khăp anăn ngă kơ phung mdrŏng amâo jhŏng lui jih jang čiăng tui hlue Khua Yang ôh, klei khăp kơ dŏ ngăn amâo mâo anôk mjưh ôh, leh anăn klei khăp anăn gai jih klei čiăng leh anăn bruă anak mnuih ngă. Mjing anak mnuih jing hlŭn kơ prăk, kơ klei hing ang (I Y‑Timôthê 6:6-10). Mnơ̆ng bi gun tal dua jing klei knang kơ dŏ ngăn leh anăn prăk mah, ênưi snăk phung mdrŏng đăo kơ ngăn dŏ, prăk mah srăng ƀuăn rơ̆ng djăp mta klei wăt kơ mngăt diñu, msĕ si klei yăl dliê kơ êkei mdrŏng mluk (Y‑Luk 12:16-21), kyuanăn diñu amâo uêñ mĭn ôh kơ Aê Diê, kăn čiăng mâo klei pap brei kơ klei soh čiăng mâo klei hdĭp hlŏng lar rei.
Klei Khua Yang mtô bi kngăr snăk kơ phung ƀĭng kna jing phung Yuđa arăng bi hriăm leh digơ̆ phung mdrŏng jing phung Aê Diê brei lu klei jăk jĭn, ƀiădah kăn dưi mŭt ƀuôn ala mtao adiê rei, snăn bi phung ƀun ƀin ƀai êjai hĭn srăng luč klei čang hmăng, hlei pô srăng tlaih lĕ? Khua Yang Yêsu wĭt lač kơ phung ƀĭng kna: “Klei anăn mnuih amâo dưi ngă ôh, ƀiădah Aê Diê dưi ngă sơăi jih jang klei” (êlan 26). Tơdah sa čô mnuih gưt kơ Aê Diê, Ñu pô srăng bi mlih ai tiê, klei mĭn leh anăn bruă ngă digơ̆. Digơ̆ srăng thâo kơ digơ̆ jing mnuih soh leh anăn duah Aê Diê akâo kơ Ñu pap brei hŏng klei kmhal kơ klei soh, digơ̆ srăng mă tŭ klei hdĭp hlŏng lar leh anăn dưi dôk mbĭt hŏng Ñu hlăm Ƀuôn Jăk. Klei bi mtlaih Khua Yang brei tui si klei đăo amâo djŏ tui si klei ƀun mdrŏng ôh.
Akâo Khua Yang đru drei djă pioh Klei Ñu Blŭ hlăm I Y‑Timôthê 6:6-10 čiăng kơ drei amâo khăp kơ prăk ôh, kăn knang kơ dŏ ngăn rei ƀiădah knang kơ Aê Diê jing Pô đru drei (Klei Mmuñ Hđăp 54:4).
Mâo mơ̆ mnơ̆ng bi gun ghă drei gưt kơ Khua Yang leh anăn knang kơ Ñu?
Wah lač: Ơ Khua Yang, đru kâo gưt kơ Ih nanao čiăng Ih bi mlih ai tiê, klei mĭn leh anăn bruă ngă kâo. Đru kâo dưi hŏng mnơ̆ng bi gun ngă kơ kâo amâo dưi tui hlue Ih kluôm ênŭm ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
