Mathais 19:23-26
Nqe cim:
“Yexus tsa qhovmuag saib lawv thiab teb hais tias, neeg ua tsis tau, tiamsis Vajtswv ua tau ib puas tsav yam huv tibsi.” (Mathais 19:26)
Lus nug rau sawvdaws xav:
– Tswv Yexus hais li cas txog tus neeg npluanuj?
– Tus Tswv xav qhia dabtsi txog tus duab “ntxhuav” thiab “qhov koob”?
– Peb kawm tau zaj no rau yus tus kheej li cas?
Tom qab uas tus hluas npluanuj nyuaj siab thiab tawm mus, Tswv Yexus hais rau cov thwjtim hais tias tus “neeg npluanuj yuav mus Ntuj Ceebtsheej mas nyuaj kawg li” (nqe 23). Tus Tswv xav qhia hais tias tsis txhob cia siab rau tej khoom txhua yam, tej ntawd coj tsis tau peb mus Ntuj Ceebtsheej. Tus Tswv muab tus duab ntxhuav uas yog yam tsiaj loj thiab lub qhov koob me los piv, Nws siv tus duab uas cov neeg Yudais swm no los hais txog qhov uas tus neeg npluanuj yuav vam khom tsis tau tes hauj lwm zoo uas tus kheej ua kom tau mus Ntuj Ceebtsheej.
Peb yuav xav hais tias ua li cas Tswv Yexus tsuas hais txog tus neeg npluanuj xwb, thiab puas yog cov neeg muaj txhua yam ntau puavleej mus tsis tau saum Ntuj Ceebtsheej? Tswv Yexus tsis yog hais li ntawd, tiamsis Nws xav hais txog tej kev khwv loj kawg uas thaiv tus hluas npluanuj ntawd thiab cov neeg uas npluanuj tso tsis taus lawv tus kheej mus rau tus Tswv tebchaws. Ob yam kev khwv rau tus neeg npluanuj, thib ib yog lub siab ntshaw txhua yam; lub siab ntshaw yuav ua rau tus neeg npluanuj tsis kam tso txhua yam nrog tus Tswv, lub siab ntshaw yuav tsis muaj qhov xaus, thiab lub siab ntshaw yuav ua rau tibneeg xav tau txhua yam thiab ua txhua yam, hloov tus neeg ntawd mus ua nyiaj, koob npe qhev (I Timautes 6:6-10). Qhov kev khwv thib ob yog cia siab rau tej khoom thiab nyiaj txiag xwb; cov neeg npluanuj yoojyim ntseeg hais tias tej khoom nyiaj txiag yuav ua tabpov rau txhua yam thiab sab ntsujplig huvsi, zoo xws li zaj lus hais txog tus neeg npluanuj hauv Lukas 12:16-21, yog li lawv tsis quav ntsej txog Vajtswv, tsis cheemtsum txojkev zam txim kom tau txojsia ntev.
Tswv Yexus cov lus qhia no ua rau cov thwjtim uas yog neeg Yudais xav tsis thoob, rau qhov lawv tau kawm hais tias cov neeg npluanuj yog tau Vajtswv foom koob hmoov tshwjxeeb rau, tiamsis ua cas tseem tsis tau mus Ntuj Ceebtsheej thiab ces cov neeg pluag hajyam tsis muaj kev cia siab, tsis tau dim li? Tswv Yexus teb rau cov thwjtim “Neeg ua tsis tau, tiamsis Vajtswv ua tau ib puas tsav yam huv tibsi.” (nqe 26). Thaum ib tug neeg los cuag Vajtswv, Nws yuav hloov tus neeg ntawd lub siab, txojkev xav thiab tes haujlwm lawv ua. Lawv yuav zeem paub tias yus muaj kev txhaum thiab nrhiav tus Tswv, thov Nws zam txim los ntawm qhov uas lees kev txhaum, kom lawv tau txojsia ntev dhawv mus ibtxhis nyob saum Ntuj Ceebtsheej nrog tus Tswv. Txojkev cawm dim uas tus Tswv pub yog nyob ntawm lawv txojkev ntseeg, tsis yog nyob ntawm qhov lawv npluanuj lossis lawv pluag.
Thov Vajtswv pab kom peb nco ntsoov Nws Txojlus qhia hauv I Timautes 6:6-10, peb thiaj tsis ntshaw nyiaj thiab kuj tsis cia siab rau tej khoom nyiaj txiag ntawd, tiamsis cia siab rau Vajtswv tus uas pub txhua yam rau peb (Phau Ntawv Nkauj 54:4).
Thov Vajtswv,
Tus Tswv, thov pab kom nyuam yaus niaj hnub ua li Koj hais, kom Koj hloov nyuam yaus sab ntsujplig, txojkev xav thiab kev ua tshiab. Thov pab kom nyuam yaus kovyeej tej kev nyuaj thaiv kev, nyuam yaus thiaj nrog tau Koj mus txog thaum kawg. Nyuam yaus tuav Tswv Yexus lub npe thov, Amees.
Puas muaj qhov nyuaj twg tabtom ua rau peb tsis kam ua raws li Vajtswv hais, tsis cia siab rau Nws?
Nyeem Vajluskub hauv peb lub xyoo: I Vajntxwv 16
Kênh Youtube BHKTHN:
