Klei Aê Diê Blŭ: Rôm 12:1-8
Êlan kliăng: “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê.” (Rôm 12:1)
Klei êmuh ksiêm mĭn: Ya mnơ̆ng khua ƀĭng kna Y‑Pôl iêô mthưr phung ƀĭng kna Khua Yang Yêsu brei myơr kơ Ñu? Si klei bi êdah kơ klei kkuh mpŭ djŏ? Ya mta klei brei drei mă tŭ leh anăn si drei dôk yua?
Kyua klei pap prŏng snăk Aê Diê pioh brei kơ drei, khua ƀĭng kna Y‑Pôl mtă mtăn kơ phung đăo kơ Krist myơr asei mlei pô jing mnơ̆ng ngă yang hdĭp leh anăn doh jăk, bi mơak kơ Aê Diê. Asei mlei drei tuôm jao leh kơ klei soh kyuanăn ară anei ti anăp Khua Yang, ñu djiê leh, amâo mâo klei bi mguôp hŏng Khua Yang ôh. Dơ̆ng mơ̆ng mmông đăo kơ Khua Yang Yêsu, Ñu brei leh kơ drei sa klei hdĭp mrâo, klei hdĭp mâo Yang Mngăt Jăk kiă kriê. Kyuanăn, asei mlei drei jing sang yang hdĭp leh anăn doh jăk. Klei bi mơak kơ Aê Diê jing klei kkuh mpŭ djŏ, jing klei dôk hdĭp bi mguôp sĭt suôr hŏng Khua Yang.
Klei kkuh mpŭ djŏ brei mâo knhuah hdĭp amâo ngă tui si lăn ala anei ôh. Blŭ mdê hĭn, amâo lŏ hdĭp tui si knuih hđăp ôh, amâo ngă tui si klei pô tluh čiăng ôh, ƀiădah brei Yang Mngăt Jăk bi mlih klei mĭn drei. Phung đăo kơ Krist êbat hlăm klei đăo knang kơ Khua Yang leh anăn gưt hlue tui si klei Ñu atăt gai, čiăng kơ thâo kral ya jing klei Aê Diê čiăng jăk, mơak leh anăn klă. Brei drei thâo săng djŏ ênoh yuôm sĭt drei hlăm Yang Krist, đăm mĭn kơ pô êgao hnơ̆ng djŏ kơ pô ôh, ƀiădah brei mâo ai tiê luă gŭ, hdĭp djŏ tui si hnơ̆ng klei đăo Aê Diê brei leh kơ grăp čô.
Khua ƀĭng kna Y‑Pôl bi êdah rup jih jang kdrêč mdê mdê hlăm sa asei mlei, čiăng kơ drei ênưih bi ƀuh anôk drei hlăm găp djuê prŏng Khua Yang. Hlăm asei mlei mâo lu kdrêč leh anăn jih jang kdrêč amâo ngă bruă msĕ ôh. Mbĭt tui si klei mblang anăn, jih jang drei jing kdrêč mdê mdê, ƀiădah bi mguôp dôk mbĭt hlăm sa asei mlei Yang Krist. Grăp čô mâo klei brei mdê mdê; pô mâo klei brei hưn êlâo, pô mâo klei iêô djă bruă, pô mâo klei brei bi hriăm, pô mâo klei brei bi mđĭ ai, pô mâo klei brei bi čung, pô mâo klei brei jing khua kiă kriê, pô mâo klei brei ngă bruă klei pap, đa đa mkăn… tui si klei brei mă tŭ leh, grăp čô drei hrăm mbĭt bi mguôp kdrêč pô mă bruă kơ Aê Diê. Snăn tơdah sa čô mnuih dưi ngă lu bruă hlăm Phung Sang Aê Diê ăt đăm mĭn êgao hnơ̆ng kơ pô mơh. Grăp čô brei thâo ya klei pap Aê Diê brei kơ pô leh anăn si drei yua leh bi tŭ dưn klei brei anăn. Grăp kdrêč mdê mdê hlăm asei mlei Khua Yang Yêsu jing yuôm bhăn msĕ sơăi. Ti anăp Khua Yang, pô hưn êlâo, jing pô mtô Klei Aê Diê Blŭ, ăt yuôm msĕ si pô mâo klei brei nao čuă čhưn, đru dŏng phung ƀun ƀin dleh knap mơh. Kyuanăn brei drei hŏng jih ai tiê ngă kdrêč bruă drei, mpŭ kơ ayŏng amai adei hlăm Khua Yang leh anăn bi đru hdơ̆ng pô tơl truh kơ hnơ̆ng Khua Yang hmăng hmưi.
Si ngă drei dôk myơr kơ Khua Yang mnơ̆ng ngă yang hdĭp leh anăn doh jăk, amâodah mnơ̆ng ngă yang djiê leh anăn čhŏ?
Wah lač: Ơ Khua Yang, bi mni lač jăk kơ Khua Yang brei leh kơ kâo sa klei hdĭp mrâo, sa asei mlei hdĭp leh anăn doh jăk. Bi mni kơ Ama brei leh kơ kâo klei pap leh anăn mmông găl čiăng mă bruă kơ Ih. Akâo Khua Yang đru kâo thâo luă gŭ, hŏng jih ai tiê kkuh mpŭ kơ Khua Yang grăp hruê hŏng klei djŏ, bi mơak kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Bruă Mtao 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
