Klei Aê Diê Blŭ: Y-Mathiơ 5:6
Êlan kliăng: “Jăk mơak yơh phung êpa leh anăn mhao kơ klei kpă ênô, kyuadah Aê Diê srăng bi hrăp diñu.” (Y‑Mathiơ 5:4)
Klei êmuh ksiêm mĭn: Si mblang êpa mhao klei kpă ênô? Si ngă čiăng êpa mhao klei kpă ênô? Ya klei jăk mơak dưi mă tŭ? Klei jăk mơak anei đru drei thâo kral ya klei kơ mngăt ai tiê drei?
Boh hră “êpa” leh anăn “mhao” tinei lač kơ klei êpa sa čô mnuih giăm djiê kyua êpa leh anăn mhao êa êjai dôk êbat ti krah kdrăn tač. Diñu hmăng hmưi, êpa mhao tơl hnơ̆ng leh anăn kdjuôt djiu tơl dưi mâo klei hrăp, amâo djŏ knŏng jing klei bi ƀuh găn bhiâo ôh. Êngao kơnăn, boh hră “êpa” leh anăn “mhao” ăt lač kơ klei “čiăng jih jang”, msĕ si sa čô êpa čiăng ƀơ̆ng jih sa đrông bêñ mi amâo djŏ knŏng sa kdrêč ôh. Anei jing klei drei amâo đei hmăng hmưi ôh kyua drei knŏng čiăng sa kdrêč klei kpă ênô đuč leh anăn hrăp leh hŏng mta drei dưi mâo.
Si mblang “Êpa mhao klei kpă ênô”? Kdrêč êlâo hĭn kơ klei kpă ênô jing klei yap kpă ênô. Anak mnuih ngă soh amâo dưi dôk ti anăp Aê Diê kpă ênô leh anăn doh jăk ôh. Pô đăo mâo klei yap kpă hŏng klei đăo kơ klei Khua Yang Yêsu djiê leh anăn kbiă lŏ hdĭp (Rôm 8:1‑4). Ƀiădah leh mâo klei yap kpă, phung đăo ăt lŏ êpa mhao hĭn mơh kơ klei kpă ênô kyua lŏ adôk sa kdrêč mkăn, jing klei doh jăk. Anei jing bruă Yang Mngăt Jăk ngă hlăm grăp čô pô đăo, čiăng kơ grăp hruê pô đăo êpa mhao klei jing doh jăk hlăm klei hdĭp, grăp hruê dưi jing msĕ si Khua Yang Yêsu hĭn.
Čiăng “êpa mhao klei kpă ênô”, êlâo hĭn, brei bi knal klei lŏ kkiêng mrâo, kyua klei lŏ kkiêng mrâo yơh ba kơ drei klei dlăng hŏng klei mrâo kơ Khua Yang, kơ drei pô, kơ ênoh yuôm, klei kƀah leh anăn mơ̆ng anăn drei thâo săng klei mblang kơ klei hdĭp (II Kôrantô 5:17). Boh hră “êpa mhao” lač kơ klei mtrŭt mơ̆ng lam ai tiê amâo djŏ mơ̆ng êngao ôh, kyuanăn, knŏng ai tiê mâo klei mlih mrâo yơh mâo klei êpa mhao klei kpă ênô Aê Diê. Tal dua, brei mdơ̆ng hnơ̆ng čuăn kơ klei kpă ênô ti dlông tur Klei Aê Diê Blŭ (Rôm 12:1‑2). Tơdah knŏng mkă drei pô hŏng arăng amâodah ƀuh mơak leh hŏng drei pô, drei srăng dluh lĕ hlăm klei êpa mhao klei kpă ênô. Brei knang kơ Klei Aê Diê Blŭ đru drei dưi gao dua mta klei anăn. Tal tlâo, brei hdĭp nanao hlăm klei bi mguôp hŏng Khua Yang kyua giăm kơ Khua Yang hĭn, drei thâo kral Khua Yang hĭn, pral hĭn thâo kral klei soh. Kyuanăn, brei êlâo hĭn mkŏ mjing klei bi mguôp hŏng Khua Yang hlăm mmông pioh wah lač hjăn (Klei Mmuñ Hđăp 16:7‑8). Tal pă, đăm tui duah klei bi hrăp kơ klei kđeh čiăng ôh kyua klei anăn ƀrư̆ ƀrư̆ srăng bi luč klei êpa mhao čiăng bi mơak kơ Khua Yang (I Y‑Yôhan 2:15‑17).
Pô “êpa mhao klei kpă ênô” srăng mâo klei “hrăp” mơ̆ng Aê Diê pô, “hrăp” klei bi mơak kơ Aê Diê, “hrăp” klei guh kơang Khua Yang hlăm klei hdĭp pô. Pô “êpa mhao klei kpă ênô” srăng mâo klei hrăp hlăm klei hdĭp mngăt myang, mâo djŏ kyua mơ̆ng bruă ngă kpă ênô ôh, ƀiădah klei Aê Diê thiê brei kyuadah Ñu jing phŭn klei kpă ênô.
Si ngă drei sĭt êpa mhao klei kpă ênô mơ̆?
Wah lač: Bi mni kơ Khua Yang Yêsu kyua Ih yơh kâo mâo klei dưi bi grăng hŏng Aê Diê, dưi jing anak Ih. Akâo Khua Yang brei kâo êpa mhao klei hdĭp kpă ênô čiăng bi guh kơang kơ Anăn Ih.
Dlăng Klei Aê Diê Blŭ hlăm tlâo thŭn: Klei Mmuñ Siam Hĭn 5:3 – 6:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
