Mathais 5:6
Cov uas xav ua raws li Vajtswv lub siab nyiam, cov ntawd tau koob hmoov; Vajtswv yuav muab rau lawv kom txaus nkaus li lawv lub siab xav.
Phau txhais tshiab Hmowsv hais tias: “Cov uas tshaib nqhis txojkev ncaj ncees, tau nyob kaj siab lug, rau qhov lawv yuav tsau npo”.
Lus nug rau sawvdaws xav: Tshaib nqhis txojkev ncaj ncees txhais tau li cas? Yuav ua li cas kom tshaib nqhis txojkev ncaj ncees? Txoj koob hmoov tau txais yog dabtsi? Txoj koob hmoov pab tau peb paub dabtsi hais txog yus lub neej sab ntsujplig?
Lo lus “tshaib” thiab “nqhis” hauv nqe Vajluskub no hais txog txojkev tshaib ntawm tus neeg yuav tuag tshaib thiab txojkev nqhis ntawm tus neeg tabtom nyob hauv tiaj suabpuam. Lawv xav tau noj, nqhis qhawv mus txog thaum tau noj tau haus, nws tsis yog ib qho kev xav. Dua li ntawd, lo lus “tshaib” thiab “nqhis” tseem hais txog qhov uas “xav tau tagnrho” zoo ib yam li tus neeg tshaib plab xav noj tagnrho ib lub ncuav tsis yog noj ib nrab xwb. Qhov no yog yam uas peb tsis tau xav txog, vim peb pheej xav tias tsuav yog tau ib feem kev ncaj ncees xwb ces txaus siab rau yam yus muaj lawm.
“Tshaib nqhis txojkev ncaj ncees” txhais tau li cas? Thawj yam ntawm txojkev ncaj ncees yog tau suav hais tias yog neeg ncaj ncees. Tus neeg txhaum sawv tsis tau tabmeeg ntawm Vajtswv tus uas ncaj ncees thiab dawbhuv. Tus uas ntseeg hais tias Yexus tuag thiab sawv rov qab los tau suav hais tias yog neeg ncaj ncees (Loos 8:1-4). Tiamsis thaum uas twb tau suav tias ncaj ncees lawm, tus ntseeg ntawd tseem tshaib nqhis txojkev ncaj ncees uas yog lub neej dawbhuv. Qhov no yog Vaj Ntsujplig tes haujlwm hauv txhua tus ntseeg, kom txhua hnub cov ntseeg nqhis nqhawv lub neej dawbhuv, kom ua tau lub neej zoo li Yexus Khetos lub.
Cia kom“tshaib nqhis txojkev ncaj ncees”, Tim ib, yuav tsum yug dua tshiab vim qhov uas yug dua tshiab yuav ua rau peb muaj kev xav tshiab txog tus Tswv, yus tus kheej, yam tseemceeb, kev cheemtsum thiab txij ntawd mus peb paub ua neej (II. Kauleethaus 5:17). Lo lus “tshaib nqhis” hais txog qhov kev txhib sab hauv tuaj tsis yog ua sab nraud, yog li ntawd, tsuas yog thaum lub siab hloov tshiab lawm thiaj muaj qhov kev tshaib nqhis Vajtswv txojkev ncaj ncees xwb. Tim ob, yuav tsum ua raws li tus qauv ntawm txojkev ncaj ncees hauv Vajtswv Txojlus (Loos 12:1-2). Yog pheej muab yus piv rau lwm tus lossis txaus siab rau yus tus kheej lawm ces peb yuav tsis muaj qhov kev tshaib nqhis txojkev ncaj ncees. Yuav tsum vamkhom tus Tswv Txojlus pab peb zam dhau ob yam no. Tim peb, niaj hnub ua neej nrog tus Tswv sib raug zoo, rau qhov yim nyob ze tus Tswv, peb yim paub Nws, thiab paub qaij tej kev txhaum. Yog li ntawd, cia li muab qhov uas nrog tus Tswv sib raug zoo saib tseemceeb, siv sijhawm thov Vajtswv (Phau Ntawv Nkauj 16:7-8). Tim plaub, tsis txhob nrhiav yam uas ua raws li yus nyiam, ua li ntawd yuav poob zuj zus qhov kev tshaib nqhis yam uas ua haum tus Tswv siab (I. Yauhas 2:15-17).
Tus neeg “tshaib nqhis txojkev ncaj ncees” yuav tau Vajtswv pub kom “tsau npo”, “tsau npo” yam uas haum tus Tswv siab, “tsau npo” tus Tswv lub tshwjchim hauv lub neej. Tus neeg “tshaib nqhis txojkev ncaj ncees” sab ntsujplig yuav tsau npo, tsis yog nws ua haujlwm zoo tau, tiamsis yog Vajtswv pub, vim Nws yog lub hauvpaus ncaj ncees.
Thov Vajtswv,
Nyuam yaus ua Tswv Yexus tsaug, Koj coj nyuam yaus los nrog Vajtswv sib raug zoo, tau uas tus Tswv menyuam. Thov Koj ua rau nyuam yaus lub neej paub tshaib nqhis txojkev ncaj ncees uas ua rau Koj tau ntsejmuag. Amees.
Peb puas tau tshaib nqhis txojkev ncaj ncees?
Nyeem Vajluskub hauv peb lub xyoos: Xalumoos Tej Nkauj 5:3-6:13
Kênh Youtube BHKTHN:
