Klei Aê Diê Blŭ: Klei Kbiă 32: 21-24
Êlan kliăng: “Hlei pô mdăp klei soh ñu amâo srăng mâo klei đĭ kyar ôh, ƀiădah hlei pô hưn leh anăn lui klei soh anăn srăng mâo klei pap” (Klei Bi Hriêng 28:13).
Klei êmuh ksiêm mĭn: Klei êmuh Y-Môis hŏng Y-Arôn lač kơ ya klei kơ bruă klam khua gĭt gai? Klei Y-Arôn wĭt lač brei ƀuh si klei hdĭp mngăt ñu? Si Aê Diê čiăng drei tlă anăp hŏng klei soh?
Y-Môis êmuh khua gĭt gai Y-Arôn: “Ya phung ƀuôn sang anei ngă leh kơ ih tơl ih bi truh klei soh prŏng kơ diñu?” (êlan 21). Klei êmuh brei ƀuh Y-Môis klah čŭn Y-Arôn jing pô klam hlăm bruă jih jang phung ƀuôn sang kkuh kơ rup yang. Phung khua gĭt gai brei jing phung tŭ bruă klam kơ klei soh pô ngă leh anăn phung jing mnuih pô ngă leh.
Ti anăp klei Y-Môis êmuh; Y-Arôn tuh leh klei soh kơ mnuih ƀuôn sang (êlan 22‑23). Ñu wơr hĕ Aê Diê mjing leh ñu jing khua ngă yang kơ Aê Diê, kyua anăn ñu mâo bruă klam hlue ngă klei Aê Diê blŭ đăm hmư̆ ôh amâodah bi mơak ai tiê mnuih ôh. Năng ai Y-Arôn čiăng kơ Y-Môis thâo săng kơ pô kyua phung ƀuôn sang Israel jing phung ƀuôn sang khăng kŏ, lu blư̆ bi kdơ̆ng hŏng Aê Diê, lu blư̆ ngă dleh kơ Y-Môis (êlan 22). Khădah snăn, hdră Y-Môis msir mgaih klei mâo hlăk phung ƀuôn sang Aê Diê nao lač ñu ngă bruă anei bruă adih jing wah lač leh anăn hlue ngă hlue si klei Aê Diê ktrâo amâo djŏ hlue si klei phung ƀuôn sang čiăng ôh.
Leh anăn amâo djŏ hĭn, Y-Arôn msĕ si tuh klei soh kơ pui (êlan 24)! Ñu lač ñu knŏng iêô phung ƀuôn sang jao mah, leh anăn plĕ mah hlăm pui, snăn čŏng jing êmô mah! Djŏ mơ̆ Y-Arôn bi mĭn Y-Môis srăng đăo kơ klei ñu blŭ? Klei Y-Arôn mgang amâo djŏ brei ƀuh klei hdĭp mngăt ñu dôk toh hroh, ba truh klei bi mklă soh leh anăn păt čiăng ngă kơ ñu hŏng phung ƀuôn sang nao kơ klei rai luč. Khua gĭt gai hlăm mngăt Aê Diê brei mâo klei đăo knang ktang hlăm Khua Yang, păn kjăp klei đăo čiăng dưi đru phung mkăn; tơdah amâo ngă snăn pô anăn srăng ba phung biăp Aê Diê jao leh kơ diñu kơ phung asâo tan mă.
Tuh klei soh kơ pô mkăn jing klei mâo hlăm anak mnuih mơ̆ng leh klei soh mŭt hlăm klei hdĭp anak mnuih. Sa čô hđeh dua tlâo thŭn thâo tuh klei soh kơ asâo, miêu bi mčah mngan, čhiên hlăm sang. Lu blư̆ drei ăt ngă msĕ si Y-Arôn, mgang klei soh hŏng klei amâo djŏ kơ klei soh pô, amâodah tuh kơ boh klei, kơ pô mkăn. Ƀiădah Aê Diê čiăng drei jhŏng dlăng bruă klam, jih ai tiê hưn klei soh pô, akâo kơ Aê Diê leh anăn phung djŏ tuôm pap brei. Anei jing sa hlăm klei phŭn Aê Diê mtô hlăm klei đăo kơ Krist čiăng tŭ klei pap brei (I Y‑Yôhan 1:9; Klei Bi Hriêng 28:13).
Sĭt ngă soh, drei klam mơ̆ klei soh pô amâodah tuh klei soh kơ pô mkăn?
Wah lač: Ơ Khua Yang, akâo kơ Ih đru kâo klam kơ klei soh kâo ngă, amâo mgang mdăp amâodah tuh klei soh kơ pô mkăn ôh. Akâo kơ Ih đru kâo hdĭp kpă ênuah ti anăp Aê Diê pô thâo jih jang ăt msĕ mơh ti anăp anak mnuih čiăng kơ kâo mâo klei pap leh anăn klei Ih hơêč hmưi.
Dlăng Klei Aê Diê Blŭ hlăm tlâo thŭn: Y‑Êsai 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
