Klei Aê Diê Blŭ: Klei Bi Hriêng 18:13, 15
Êlan kliăng: “Snăn klei đăo kbiă hriê mơ̆ng klei arăng hmư̆, leh anăn klei arăng hmư̆ kbiă hriê mơ̆ng klei mtô klei Krist” (Rôm 10:17).
Klei êmuh ksiêm mĭn: Si Mtao Salomôn bi hriăm kơ klei mđing hmư̆? Si klei tŭ dưn mâo mdê kơ klei hmư̆ amâo nik hŏng klei hmư̆ bi nik? Si knuih brei mâo sĭt hmư̆ pô mkăn blŭ?
Mơ̆ng dua êlan 13 leh anăn 15, Mtao Salômôn brei ƀuh hnơ̆ng yuôm bhăn mơ̆ng bruă hmư̆. Hmư̆ jing hdră tŭ mă ênai hŏng klei amâo thâo hngah ôh, ƀiădah mđing hmư̆ jing hdră thâo mđing čiăng thâo săng klei pô mkăn blŭ. Hlăm êlan 13, mtao lač kơ boh jhat mơ̆ng bruă amâo thâo răng mđing hmư̆. Boh blŭ “wĭt lač êlâo kơ dôk hmư̆” jing hmư̆ amâo kluôm ênŭm, ka thâo jih ôh klei blŭ, êlâo kơ mnuih thâo mĭn mjưh mdei pah drăm asăp pô blŭ, pral đei mdah klei blŭ pô. Anăn jing mnuih mluk (dlăng Klei Bi Hriêng 18:2) kyua amâo djŏ knŏng kƀah klei jăk ôh ƀiădah lŏ bi êdah knuih amâo thâo răng mơ̆ng mnuih hmư̆. Boh jhat mơ̆ng klei “wĭt lač êlâo kơ hmư̆” knŏng mă klei hêñ leh anăn mluk (êlan 13). Bi hlăm êlan 15, pô čih lač kơ klei bi mklă, “knga phung thâo mĭn tui duah hmư̆ klei thâo săng”. Pô thâo săng ênưih bi tuôm hŏng klei thâo (Klei Bi Hriêng 14:6), knư̆ thâo răng mđing hmư̆, knư̆ mâo klei thâo mĭn leh anăn klei mpŭ.
Ala ƀuôn đĭ kyar ktŭng ba anak mnuih hlăm klei hdĭp pral. Nao sang kkuh mpŭ phung ƀuôn sang Aê Diê knŏng čiăng hmư̆ klei mtô đŭt čiăng wĭt hnưm. Knga hmư̆ Klei Aê Diê Blŭ mtô ƀiădah klei mĭn bi mbha, amâo mđing, bi mĭn kơ bruă mkăn. Tơdah amâo mđing hmư̆ snăn si thâo săng jih Klei Aê Diê Blŭ čiăng klei đăo hriê kơ prŏng. Hlăm gŏ sang, lu blư̆ anak čô amâo hmư̆ aduôn aê, amĭ ama blŭ ka jih pruê̆ ôh hlŏng đuê̆ hĕ yơh. Lu blư̆ lŏ ênguôt ƀuah ăl kơ amĭ ama blŭ lu, blŭ nanao leh anăn lač pô thâo mĭn hĭn, djŏ ênuk hĭn kơ aduôn aê, amĭ ama, leh anăn lĕ hlăm klei soh amâodah amâo tŭ jing hlăm klei hdĭp kơh lŏ hƀlŏk kyua êlâo adih amâo gĭr mđing hmư̆. Lu phung anak leh hriê kơ prŏng lŏ hƀlŏk kyua amâo lŏ dưi mđing hmư̆ klei mtô thâo mĭn, klei mtă bŏ hŏng klei khăp mơ̆ng aduôn aê, amĭ ama.
Akâo kơ Khua Yang brei kơ drei thâo gĭr hiu hưn Klei Aê Diê Blŭ čiăng đru kơ lu mnuih dưi mđing hmư̆ Klei Mrâo Mrang jăk, kyua tơdah amâo hiu hưn snăn si arăng thâo hmư̆ leh anăn đăo kơ Khua Yang čiăng mâo klei bi mtlaih. Phung amĭ ama brei jih ai tiê đru kơ anak čô mđing hmư̆ klei Khua Yang mtô, thâo gĭr leh anăn hưn si ngă čiăng tŭ dưn, ênưih iêô jak phung anak hmư̆. Grăp čô phung anak Aê Diê brei pioh lu mông mđing hmư̆ asăp Khua Yang hlăm bruă hriăm Klei Aê Diê Blŭ leh anăn bi mguôp hŏng Ñu grăp hruê, ăt kăn lui rei klei aduôn aê, amĭ ama bi hriăm jing phung nao êlâo leh anăn mâo lu klei thâo hlăm hdră êlan tui hlue Khua Yang.
Diih thâo gĭr mđing hmư̆ Klei Aê Diê Blŭ leh anăn asăp blŭ phung thâo mĭn leh mơ̆ amâodah ka ?
Wah lač: Ơ Khua Yang, jing Ama hlăm adiê, kâo bi mni kơ Ih kyua brei leh Klei Aê Diê Blŭ kơ kâo. Akâo kơ Ih đru kâo thâo gĭr mđing hmư̆ Klei Aê Diê blŭ leh anăn amâo lui ôh klei mtô phung thâo mĭn. Akâo kơ Ih đru kâo thâo gĭr hiu hưn Klei Aê Diê Blŭ kơ grăp čô mnuih čiăng kơ diñu dưi hmư̆ leh anăn mâo klei bi mtlaih.
Dlăng klei Aê Diê Blŭ hlăm tlâo thŭn: Y‑Êsai 40:27‑41:16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
