Pajlug 18:13, 15
Nqe cim:
“Yog li ntawd, twb yog lawv hnov txojmoo zoo, lawv thiaj ntseeg, thiab txojmoo zoo uas lawv hnov ntawd yog Yexus Khetos tej lus” (Loos 10:17).
Lus nug rau sawvdaws xav:
- Vajntxwv Xalumoos qhia licas txog kev mloog lwm tus hais?
- Qhov kawg ntawm tus tsis ua tib zoo mloog thiab tus ua tib zoo mloog sib txawv licas?
- Peb yuav tsum muaj tus cwjpwm zoo licas thaum mloog lwm tus hais?
Dhau ob nqe 13 thiab 15, vajntxwv Xalumoos qhia pom txog qhov tseemceeb ntawm kev mloog lwm tus hais. Mloog yog qhov uas siv pobntseg txais kom hnov tej suab sab, tiamsis ua tib zoo mloog yog qhov uas tus hnov txhob txwm mloog kom totaub tej uas lwm tus hais. Nyob hauv nqe 13, vajntxwv hais txog teebmeem ntawm qhov uas tsis ua tib zoo mloog. Lo lus“ua tib zoo mloog ua ntej tso koj mam teb”, lwm phau txhais hais tias: “Yog leejtwg teb ua ntej uas nws tsis tau hnov” lo lus no muaj lub ntsiab hais tias, hnov tsis tau tas lus, tsis tau totaub meej lub ntsiab, ua ntej tus muaj tswvyim xaus lus twb maj nroos teb lawm. Tus zoo li ntawd yog tus neeg ruam (saib Pajlug 18:2) vim tsis yog tsis paub cai xwb, tseem ua tshwm tus ntawd tus cwjpwm tsis xyuamxim. Tus uas “teb ua ntej nws tsis tau hnov” yuav raug luag thuam thiab poob ntsejmuag (nqe 13). Tiamsis, nyob hauv nqe 15, tus sau nqe pajlug hais txog ib zaj txawv, “Cov neeg ntse nrhiav kev txawj ntse thiab muab siab rau kawm”, lwm phau txhais hais tias “Lub siab uas txawj xav yeej tau kev txawj ntse, thiab tus uas muaj tswvyim lub qhov ntsej nrhiav kev txawj ntse”. Cov neeg txawj ntse kawm tau yoojyim heev (Pajlug 14:6), yim ua tib zoo mloog, ces yim muaj tswvyim thiab tau luag hwm.
Ntiajteb kev vammeej rub tibneeg mus ua lubneej ceev nrooj. Thaum tuaj pehawm, tus Tswv cov menyuam muaj coob tug tsuas xav mloog tej zaj lus qhuab qhia luv luv kom tau los tsev ntxov. Lub pob ntseg hnov Vajtswv Txojlus tiamsis lub hlwb hau xav mus rau lwm yam lawm. Yog tsis ua tib zoo mloog yuav ua cas totaub Vajtswv Txojlus kom loj hlob hauv sab kev ntseeg? Nyob hauv lub cuabyig, ntau zaug cov menyuam hnov pog yawg, niam txiv tej lus hais tsis tau tas twb chim thiab khiav lawm. Ntau zaug tseem cem niam txiv hais tias ntau ncauj, hais mus hais los thiab xav hais tias tus kheej txawj ntse dua, paub ua neej tshiab dua, txog thaum poob rau kev txhaum lossis ntsib teebmeem mam hnov khuv xim xav txog thaum ub ua cas tsis ua tib zoo mloog lus. Muaj coob leej thaum loj hlob tuaj mam khuv xim, rau qhov tsis tshuav sijhawm los ua tib zoo mloog niam txiv tej lus nyiaj lus kub, tej lus hlub lus tshua lawm.
Thov tus Tswv pab peb ua siab ntev qhia Vajtswv Txojlus, kom coob leej tau hnov Txojmoo Zoo cawmdim, vim yog tsis qhia lawv yuav ua cas hnov tau thiab los ntseeg tus Tswv kom tau cawmdim. Cov laus yuav tsum nrhiav kev pab cov menyuam kom tau mloog tus Tswv tej lus qhuab ntuas, yuav tsum ua siab ntev thiab piav qhia kom cov menyuam yooj yim nkag siab totaub. Tus Tswv cov menyuam txhua tus yuav tsum tseg sijhawm los mloog tus Tswv tej lus dhau ntawm kev kawm Vajluskub thiab nrog Nws sib txuas lus txhua hnub, kuj txhob hnov qab pog yawg, niam txiv tej lus qhuab ntuas, vim lawv yog cov nyob ua ntej thiab lawv paub ntau yam hauv lubneej raws tus Tswv qab.
Thov Vajtswv
Tus Tswv uas yog nyuam yaus Leej Txiv, ua Koj tsaug uas Koj tau pub Txojlus rau nyuam yaus. Thov pub rau nyuam yaus muaj lub siab ntev ua tib zoo mloog Koj Txojlus thiab tej lus qhuab ntuas txawj ntse. Thov pub rau nyuam yaus ua siab ntev qhia Koj Txojlus rau lwm tus, lawv thiaj hnov thiab tau cawmdim. Amees.
Peb puas ua siab ntev mloog Vajtswv Txojlus thiab tej lus qhuab ntuas txawj ntse lawm tau?
Nyeem Vajluskub hauv peb lub xyoos: Yaxayas 40:27-41:16
Kênh Youtube BHKTHN:
