Klei Aê Diê Blŭ: Klei Mphŭn Dơ̆ng 11:1-9
Êlan kliăng: “Diñu lač, “Bơ drei, brei drei ngă sa boh ƀuôn prŏng, leh anăn sa boh sang êñan, kŏ ñu sô̆ ti adiê. Brei drei duah klei hing ang, huĭdah drei srăng klah đuĕ hiu tar ƀar lăn ala” (Klei Mphŭn Dơ̆ng 11:4)
Klei êmuh ksiêm mĭn: Leh êa lip, ya klei anak mnuih ngă leh? Ya klei hriăm drei mă kơ hruê anei? Si Aê Diê ngă leh hŏng klei soh anak mnuih?
Leh êa lip, phung mnuih ti lăn ala mâo lu anôk msĕ: mâo mbĭt sa aê aduôn, sa klei blŭ, leh anăn dôk ti čar ngŏ sơăi. Tơdah ênoh mnuih đĭ lar, diñu dơ̆ng đuĕ nao leh anăn čuăn dôk ti lăn dap čar Sinar (êlan 2). Diñu bi lač hdơ̆ng diñu: “Bơ drei, brei drei ngă sa boh ƀuôn prŏng, leh anăn sa boh sang êñan, kŏ ñu sô̆ ti adiê. Brei drei duah klei hing ang, huĭdah drei srăng klah đuĕ hiu tar ƀar lăn ala” (êlan 4). Dlăng ti êngao, jih jang bruă diñu ngă msĕ si mâo klei bi mguôp leh anăn mâo klei tŭ dưn snăk. Ƀiădah grăp mta bruă anăn dôk bi kdơ̆ng hŏng Khua Yang sơăi. Klei Khua Yang mtă kơ phung anak čô Y-Nôê jing: “Brei diih jing lar êngŭm leh anăn bi bŏ lăn ala” (Klei Mphŭn Dơ̆ng 9:1). Khua Yang čiăng anak mnuih bra đuĕ bi bŏ tar ƀar rŏng lăn leh anăn kiă kriê lăn ala anei, bi diñu knŏng čiăng bi kƀĭn dôk sa anôk hŏng klei hơĭt đuč. Hrô kơ klei mpŭ kơ kơ Khua Yang diñu ktưn ngă sa boh sang êñan đĭ sô̆ ti adiê čiăng bi êdah kơ diñu jing mđơr hŏng Khua Yang. Hrô kơ klei bi guh kơang kơ Anăn Khua Yang snăn diñu bi guh kơang kơ diñu pô.
Hruê anei, tăp năng drei msĕ mơh dôk mdơ̆ng “sang êñan Ƀaƀel” tơdah drei tui duah klei hing ang kơ drei pô hrô kơ klei duah êlan bi guh kơang kơ Anăn Khua Yang, tơdah hdĭp knŏng mĭn kơ drei pô hrô kơ klei gưt tui si klei Khua Yang čiăng. Năng ai drei ăt srăng bi kƀĭn mbĭt leh anăn bi mguôp mơh hdơ̆ng drei, ƀiădah knŏng čiăng bi hrăp klei drei pô čiăng amâo djŏ čiăng bi guh kơang kơ Khua Yang ôh. Klei bi mguôp jing sa djŏ jing klei mă bruă sa ai tui si klei atăt gai mơ̆ng Yang Mngăt Jăk.
Ti anăp klei anak mnuih bi kdơ̆ng, Aê Diê bi lŭk leh klei diñu blŭ, čiăng kơ diñu amâo dưi thâo săng ôh klei diñu blŭ hdơ̆ng diñu (êlan 7). Klei amâo thâo bi săng klei blŭ yơh jing mnơ̆ng bi kgăn anak mnuih hlăm jih jang ênuk. Anăn jing klei Aê Diê bi kmhal, ƀiădah anăn mơh jing êlan đru anak mnuih lŏ wĭt kơ Ñu. Kyua amâo thâo bi săng klei blŭ kyuanăn diñu lui hĕ klei mdơ̆ng sang êñan Ƀaƀel, klei diñu mđĭ diñu pô Aê Diê mtrŭn hĕ, čiăng kơ diñu thâo diñu amâo dưi đĭ sô̆ ti adiê ôh. Kyuanăn, diñu bra đuĕ mdê mdê leh anăn nao dôk tar ƀar rŏng lăn, hŏng klei anăn diñu ngă klei Aê Diê mtă leh. Ƀiădah klei yuôm bhăn hĭn jing, tơdah anak mnuih ktưn čiăng mdơ̆ng sang êñan Ƀaƀel đĭ sô̆ ti adiê amâo jing ôh, snăn Anak Aê Diê mơ̆ng adiê bi luă gŭ Ñu pô, čŏng čiăng hriê jing mnuih, tŭ klei djiê ti kyâo bi kal čiăng bi tui mnuih soh. Amâo djŏ Khua Yang knŏng phat kđi klei soh ôh, ƀiădah wăt knŏng hjăn Ñu yơh jing hdră êlan bi tui klei soh.
Si ngă drei dôk mdơ̆ng sang êñan Ƀaƀel kơ drei pô hĕ amâodah bi guh kơang kơ Anăn Khua Yang?
Wah lač: Ơ Khua Yang, pap brei kơ kâo kyuadah mâo lu blư̆ kâo hdĭp tui si klei mĭn kâo pô, knŏng mĭn kơ kâo pô leh anăn duah êlan bi hing ang kơ kâo pô. Bi mni kơ Ih Khua Yang Yêsu djiê leh ti kyâo bi kal čiăng pap brei klei soh kâo leh anăn lŏ bi kơrŭ kâo. Brei klei hdĭp kâo srăng hdĭp kơ klei guh kơang Ih, amâo atăt pô mkăn hriê kơ sang êñan Ƀaƀel kâo pô ôh, ƀiădah hriê kơ kyâo bi kal Khua Yang Yêsu. Kâo wah lač hlăm Anăn Khua Yang Yêsu Krist. Amen
Dlăng Klei Aê Diê Blŭ hlăm tlâo thŭn: Y-Nêhêmi 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
