Blŭng a 11:1-9
“Na khan thoi âu: ‘Nâu bơ̆n athei pơjing minh pôm pơlei tih păng pơm hnam Thôt tŏk-bŏk pơlei, kơjung truh tơ plĕnh;a bơ̆n athei pơm ư-ang kơ bơ̆n; hli kơ bơ̆n tơklah tơklang tơ jơ̆p-jang kơpal teh đak âu.” (Blŭng a 11:4)
Nơ̆r jet tơchĕng pơwao:
– Đơ̆ng rŏng kơ đak lơ̆p ei sơ̆, kon bơngai pơm kiơ bơih?
– Bơ̆n hŏk iŏk kơ bơ̆n dang ei tơdrong kiơ?
– Kră Yang tơwih thoi yơ ‘bơ̆t anăp tơdrong yoch kon bơngai?
Kon bơngai oei kơpal teh đak sơ̆, lu sư noh lơ bơngai,mă-lei đei pêng tơdrong tơ ala âu lu sư hơdai, lu sư minh hơbĭ, ’noh lu tơdrong ‘nâu: Minh ‘bok kơdră, minh nơ̆r pơma, oei hơdai tơ minh dêh char gah Hơlĕch. Kơplah kơ̆l bơngai lu sư rai lơ, đơ̆ng dêh noh, lu sư pơtơm jăk tơ teh dơnă tơ dêh Sinar (trong 2). Lu sư pơtơm dih băl: “’Nâu bơ̆n athei pơjing minh pôm pơlei tih păng pơm hnam Thôt tŏk-bŏk pơlei, kơjung truh tơ plĕnh; bơ̆n athei pơm ư-ang kơ bơ̆n, hli kơ bơ̆n tơklah tơklang tơ jơ̆p jang kơpal teh đak” (trong 4). Lu sư ‘nâu bơ̆n lăng gah ‘nguaih rŏ kơ pôm jơhngơ̆m đon păng rŏ kơ đei yua dêh.Mă-lei bơ̆n hơlen sele dôm tơdrong lu sư pơm noh tă kơ lu sư hơtai oei blah Kră Yang ngăl. Nơ̆r Kră Yang tơtă athei adrĕch Nôê pơm noh tơdrong ‘nâu: “Athei pơjing adrĕch adung hrôh ngôh rai lơ dĭng ‘bĕnh ‘bang kơpal teh” (Blŭng a 9:1). Kră Yang wă kơ kon bơngai tơklah wă kơ oei jơ̆p jang’bĕnh kơpal teh âu păng pơgơ̆r tôm tơdrong,tôm tơmam lăm teh đak âu, na kon bơngai kơplah ei sơ̆ ‘maih pơpôi minh ‘bôt đĕch wă kơ hiôk hơđơ̆ng. Ưh kơ yom kơkuh kơ Kră Yang, lu sư tă tơ adrin nŏng kơ man pơdơ̆ng minh pôm hnam Thôt kơjung truh tơ plĕnh wă kơ tơ’bôh khan lu sư atŏ hăm Kră Yang. Ưh kơ pơm kơ anăn Kră Yang đei ư-ang, tă tơ ‘maih pơư-pơang kơ anăn lu sư kơdih.
Dang ei phŏ bơ̆n kư̆m dang hơtai “pơdơ̆ng hnam thôt ‘Ba’bel” ‘noh mơ̆n mưh bơ̆n chơchă dêh wă kơ đe ư-ang kơ anăn bơ̆n, ưh kơ chơchă pơm thoi yơ wă ư-ang kơ Anăn Kră Yang. Mưh bơ̆n arih pơpôi tơdrong tơchĕng, nơ̆r pơma, tơdrong bơ̆n pơm noh pơpôi ăn kơ bơ̆n kơdih đĕch ưh kơ chu pơm kiơ̆ kơ Kră Yang wă, lei noh bơ̆n pơgơ̆p pơpôi pôm ‘bơ̆r đon dih băl mă-lei noh wă kơ hreh breh kơ tơdrong hưch ham, ‘maih wă kiơ̆ kơ kơdih bơ̆n đĕch ưh kơ pơư-pơang Anăn Kră Yang. Tơdrong pơgơ̆p jing minh trŏ thoi Kră Yang wă noh bơ̆n pôm jơhngơ̆m đon awih awăn kiơ̆ kơ Yang Bơhngol ‘Lơ̆ng chông anhăk bơtho tơ’bôh.
Kơplah kon bơngai blah Kră Yang, Kră Yang ‘Bok Kei-Dei hlôi pơm kơ nơ̆r pơma lu sư tơsŭl đĭ ưh pă tơproh pơm kơ lu sư pơma dơnuh ưh kơ gơh hlôh dih băl bơih (trong 7). Pha ra nơ̆r pơma ‘nâu jing thoi dur găn sơlam bơngai âu hăm bơngai to rim kơ jơhnơr đơ̆ng sơ̆ khơ̆ kơ dang ei. ‘Noh bơih tơdrong ‘Bok Kei-Dei sek tơlang, mă-lei tơdrong sek tơlang ‘noh Kră Yang kư̆m chă trong wă kơ kon bơngai hơlơ̆k wih tơ Sư dơ̆ng.
Yua kơ đơ̆ng lu sư pha ra kơ nơ̆r pơma noh bơih na tơdrong jang man hnam Thôt noh dơ̆ng hloi bơih,ưh pă jang hloi bơh, jơhngơ̆m lu sư pôk atŏk kơdih noh Kră Yang kư̆m tơjruh lê̆ wă kơ lu sư băt kơ lu sư ưh kơ kĕ kơjung truh tơ plĕnh. Yua kơ ‘noh bơih na lu sư khŏm mă tơklah tơklang na oei tơ jơ̆p jang kơpal teh. Đơ̆ng tơdrong lu sư tơklah ‘nei bơih lu sư pơkeh đêl nơ̆r Kră Yang tơtă athei noh.Păng đei minh tơdrong pha ra kơ hmă, pha ra kơ đĭ-đăng, kơplah kon bơngai adrin man hnam Thôt ‘Ba’bel wă mă kơjung truh tơ plĕnh ră mă-lei jor ưh kơ keh jing, na Kon ‘Bok Kei-Dei đơ̆ng plĕnh tă tơ tơjur akâu, pơrơ̆ng jur tơ teh đak yoch, oei hăm kon bơngai, chu iŏk pơmat, lôch tang tơ ‘long pơglang wă huai iŏk kon bơngai đơ̆ng tơdrong yoch. Kră Yang Sư ưh kơ pôm Tơ’ngla sek tơlang bơngai yoch đĕch ôh, kư̆m lăp minh ‘nu Sư đĕch Tơ’ngla gơh pơklaih kon bơngai đơ̆ng tơdrong yoch.
Ơ Kră Yang, apinh Ih mơnat, pă jô̆ yo kơ inh yua kơ lơ ‘măng inh arih kiơ̆ kơ kơdih akâu wă, pơpôi tơdrong tơchĕng, nơ̆r pơma,tơdrong inh pơm, pơpôi ăn kơ inh kơdih đĕch, păng chă trong wă ư-ang anăn inh kơdih. Bơnê kơ Kră Yang Yêsu hlôi chu lôch tơ ‘long pơglang wă pơklaih yoch inh,Ih huay pă jô̆ yo, păng tơiung hơmet ming tơdrong tơ’bưh inh jing ‘lơ̆ng hăm Ih. Apinh Ih tơgŭm inh đơ̆ng âu tơ anăp arih ư-ang kơ Anăn Ih, ưh kơ ba lu bơngai nai năm tơ hnam Thôt ‘Ba’bel inh ôh, mă-lei ba lu sư năm tơ ‘long pơglang Kră Yang Yêsu. Inh krao khan yua Anăn Kră Yang Yêsu Krist, Amen!
Bơ̆n dang ei tŏk-bŏk oei man tơiung hnam Thôt ăn kơ bơ̆n kơdih dah mă bơ̆n arih ư-ang kơ Anăn Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 9
Kênh Youtube BHKTHN:
