Klei Aê Diê Blŭ: Bruă Phung Khua Ƀĭng Kna 2:42-47
Êlan kliăng: “Diñu gĭr hlăm klei hriăm klei phung khua ƀĭng kna mtô, hlăm klei bi mguôp, hlăm klei kjoh kpŭng, leh anăn hlăm klei wah lač.” (Bruă Phung Khua Ƀĭng Kna 2:42)
Klei êmuh ksiêm mĭn: Si phung đăo tal êlâo ngă leh bruă klei đăo digơ̆? Si klei diñu dôk hdĭp kpă ênô leh anăn thâo pap? Si boh tŭ dưn digơ̆ mă tŭ leh ? Si klei lông dlăng kơ drei dôk hdĭp?
Phung Sang Aê Diê tal êlâo hưn mdah jing sa êpul êya mâo klei bi mlih sĭt. Leh Yang Mngăt Jăk trŭn hriê, phung đăo amâo knŏng bi kƀĭn kkuh mpŭ kơ Aê Diê ôh, ƀiădah wăt dôk hdĭp hdơ̆ng pô msĕ si sa găp djuê myang. Klei hdĭp diñu bi êdah klă sĭt klei kpă ênô leh anăn klei pap Aê Diê.
Phung đăo tal êlâo hŏng jih ai tiê dôk hdĭp bi êdah klei đăo hŏng klei kriăng hriăm Klei Aê Diê Blŭ, djă pioh klei bi mguôp hdơ̆ng pô leh anăn wah lač (êlan 42). Atur klei hdĭp kpă ênô kčưm dơ̆ng mơ̆ng Klei Aê Diê Blŭ. Diñu amâo dôk hdĭp hơăi mang ôh ƀiădah dưm Klei Aê Diê Blŭ jing phŭn, jing êlan čuăn kơ klei mĭn, bruă ngă leh anăn knhuah dôk dơ̆ng ƀơ̆ng huă hdơ̆ng pô. Tơdah sa Phung Sang Aê Diê hdĭp sĭt tui si Klei Aê Diê Blŭ, klei hdĭp ƀrư̆ ƀrư̆ srăng mâo klei bi mlih tui si hnơ̆ng čuăn Aê Diê. Thiăm mbĭt anăn, diñu dôk hdĭp hlăm klei bi mguôp sĭt kpă hdơ̆ng pô. Amâo djŏ blŭ hrăm bhiăn yang đar arăng êgar, ƀiădah suôr tliêr hŏng ai tiê sĭt, bi đru rŭ, bi mđĭ ai hdơ̆ng pô hlăm klei đăo. Diñu êbat nao hrăm mbĭt, bi kah mbha klei mơak wăt klei ktrŏ, leh anăn hrăm mbĭt mđing phă Khua Yang, jing akŏ phŭn anôk diñu knang.
Klei yuôm mdê hĭn, diñu bi êdah klei thâo pap sĭt êmĭt êdi. Phung đăo bi mguôp mbĭt leh anăn yap jih jang mnơ̆ng mnuă jing dŏ mbĭt, hmiêt mkăp čhĭ ngăn dŏ pô čiăng đru kơ phung mnuih dôk kƀah (êlan 44-45). Bruă ngă anei brei ƀuh ai tiê thâo pap amâo djŏ knŏng klei djhưng ai, ƀiădah jing bruă ngă bi êdah săn asei kyua klei khăp. Diñu amâo hdĭp čuôt klih ôh, ƀiădah yap klei kƀah mnuih mkăn ăt jing klei brei drei uêñ mĭn. Tơdah Phung Sang Aê Diê hdĭp msĕ snăn, klei khăp Aê Diê jing klă mngač hĭn. Anei yơh jing klei mĭn Klei Mrâo Mrang Jăk: Drei mă tŭ leh klei pap, kyuanăn brei drei lŏ mbha brei kơ mnuih mkăn msĕ mơh. Pô čih hră Y-Luk lŏ hưn mdah snei: “Grăp hruê diñu bi kƀĭn hlăm sang kkuh mpŭ, leh anăn kjoh kpŭng hlăm sang diñu pô, hŏng ai tiê hơ̆k mơak leh anăn luă gŭ” (êlan 46). Sa pŏk rup bi êdah sa êpul êya mâo klei đăo hdĭp sĭt. Phung anak ƀuôn sang Aê Diê “gĭr” hlăm klei bi mguôp hŏng klei khăp, klei mơak, klei sĭt kpă. Klei hdĭp huĭ mpŭ kơ Aê Diê amâo jing klei klam ktrŏ ôh, ƀiădah jing klei hơ̆k mơak kbiă hriê mơ̆ng ai tiê sĭt kpă.
Boh tŭ jing mơ̆ng sa Phung Sang Aê Diê msĕ snăn “bi mơak kơ jih jang phung ƀuôn sang. Leh anăn grăp hruê Khua Yang lŏ thiăm kơ Phung Sang Aê Diê phung mă tŭ klei bi mtlaih.” (êlan 47). Sa êpul êya hdĭp kpă ênô leh anăn bi khăp srăng jing sa klei hưn bi sĭt ktang kjăp. Mnuih mkăn amâo knŏng hmư̆ Klei Mrâo Mrang Jăk, ƀiădah wăt dlăng ƀuh Klei Mrâo Mrang Jăk mơ̆ng knhuah hdĭp Phung Sang Aê Diê mơh. Klei Aê Diê Blŭ hruê anei lông dlăng drei, Phung Sang Aê Diê amâo knŏng jing anôk phung anak ƀuôn sang Aê Diê nao grăp hruê kăm ôh, ƀiădah wăt jing anôk grăp čô phung anak ƀuôn sang Aê Diê hrăm mbĭt mâo klei bi mlih, hdĭp kpă ênô, bi khăp.
Si drei bi êdah rup Khua Yang kơ êpul êya?
Wah lač: Ơ Khua Yang, akâo Khua Yang mñă brei kâo thâo bi mguôp rŭ mdơ̆ng Phung Sang Aê Diê Ih jing anôk klei kpă ênô bi êdah, ai tiê thâo pap bi lar, leh anăn klei mâo Aê Diê dôk mbĭt dưi ƀuh klă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
