Klei Aê Diê Blŭ: Klei Bi Êdah 2:1-7
Êlan kliăng: “Ƀiădah anei klei Kâo mâo hŏng ih, ih lui leh klei khăp ih mâo tal êlâo.” (Klei Bi Êdah 2:4)
Klei êmuh ksiêm mĭn: Ya klei Phung Sang Aê Diê Êphêsô mâo klei mni leh anăn klei ƀuah? Ya tlâo knhuang Khua Yang iêô mthưr Phung Sang Aê Diê brei lŏ wĭt? Si klei hưn anei ăt dôk kluôm ênoh yuôm wăt kơ Phung Sang Aê Diê hruê anei?
Êphêsô jing sa ƀuôn prŏng leh đĭ kyar hlăm bruă mnia blei, ktuê hang êa ksĭ Địa Trung Hải, anôk khua ƀĭng kna Y-Pôl mă bruă leh hlăm brô tlâo thŭn mâo lu boh tŭ dưn. Hlăm Klei Bi Êdah 2:1-7, mâo dŭm mta rup bi knăl đru drei thâo săng klei Khua Yang lač: Khua Yang Yêsu jing Pô mơĭt hră čih; “dĭng buăl jăk” jing phung khua kiă kriê Phung Sang Aê Diê; “jơ̆ng diăn” bi hmô kơ Phung Sang Aê Diê mtrang mngač kơ lăn ala. Bruă Khua Yang djă kjuh asăr mtŭ leh anăn êbat ti krah kjuh jơ̆ng diăn brei ƀuh Ñu jing Khua kiă kriê, dôk mbĭt nanao leh anăn thâo săng jih djăp mta bruă ngă hlăm Phung Sang Aê Diê.
Êlâo hĭn, Khua Yang Yêsu mni Phung Sang Aê Diê Êphêsô kyua klei diñu sĭt suôr. Diñu ngă bruă suăi, gĭr, amâo tŭ ôh klei ƀai, leh anăn thâo kral klei sĭt nik hŏng klei luar. Diñu dôk kjăp hlăm klei mtô klei đăo, kjăp klă hlăm klei doh jăk, leh anăn jhŏng bi kdơ̆ng hŏng klei soh wê. Anei jing dŭm knuih yuôm brei mâo hlăm sa Phung Sang Aê Diê sĭt suôr. Klei kpă ênô, klei sĭt nik leh anăn klei dôk gĭr jing klei bi mơak kơ Khua Yang. Ƀiădah lĕ, Khua Yang ăt ƀuah diñu kơ sa mta klei yuôm snăk: Diñu lui leh klei khăp diñu mâo tal êlâo. Wăt tơdah djă pioh kjăp klei sĭt nik leh anăn klei kpă ênô, diñu kƀah hĕ mta phŭn jing klei khăp: klei khăp kơ Khua Yang leh anăn klei bi khăp hdơ̆ng pô. Klei đăo diñu ƀrư̆ ƀrư̆ ktrŏ tĭng kơ bruă klam hĭn kơ klei myơr jih ai tiê, ktrŏ kơ klei djŏ soh hĭn kơ klei khăp. Klei anei mñă snei, klei kpă ênô ƀiădah amâo mâo klei khăp srăng jing êăt hriêt, leh anăn klei sĭt nik ƀiădah amâo mâo klei khăp srăng jing khăng ktang.
Khua Yang iêô mthưr Phung Sang Aê Diê lŏ wĭt kơ tlâo knhuang klă mngač: hdơr bĕ, kmhal bĕ, leh anăn lŏ ngă bruă tal êlâo (êlan 5). Brei diñu lŏ hdơr wĭt klei khăp leh anăn klei hur har tal êlâo, kmhal kơ klei hroh trŭn klei hdĭp myang, leh anăn lŏ wĭt kơ jih bruă ngă kbiă hriê mơ̆ng klei khăp sĭt. Anei amâo djŏ knŏng bi mlih bruă ngă ti êngao ƀiădah wăt bi mlih mơ̆ng lam ai tiê. Klei blŭ hưn mjưh ruê̆ hŏng klei hưn êlâo brei răng leh anăn klei ƀuăn. Tơdah amâo kmhal ôh, Phung Sang Aê Diê srăng luč klei myang hưn bi sĭt leh anăn klei bi hmăi lar. Ƀiădah bi phung mâo klei dưi srăng dưi dưn klei hdĭp hlŏng lar mbĭt hŏng Aê Diê (êlan 7). Anei jing klei iêô mthưr kjăp ktang amâo knŏng hlăm klei sĭt nik ƀiădah wăt hlăm klei khăp.
Klei hưn anei ăt dôk kluôm ênoh yuôm kơ Phung Sang Aê Diê hruê anei. Năng ai drei suăi hlăm bruă ngă, sĭt suôr hlăm klei mtô klei đăo, leh anăn tui tiŏ klei kpă ênô ƀiădah ăt mâo klei huĭ hyưt bi luč hĕ klei khăp. Klei hdĭp phung đăo kơ Krist amâo knŏng ngă klei djŏ, ƀiădah brei ngă hŏng ai tiê khăp kơ Khua Yang. klei khăp brei jing klei mtrŭt kơ jih jang bruă ngă. Tơdah amâo djŏ snăn, jih jang klei suăi gĭr srăng jing hơăi mang (I Kôrantô 13:1-3).
Ya klei brei drei bi mlih hĕ leh anăn đru mnuih mkăn bi mlih čiăng kơ Phung Sang Aê Diê đĭ kyar?
Wah lač: Ơ Khua Yang, pap brei kơ kâo tơdah kâo mă bruă ƀiădah kƀah klei khăp. Lŏ bi mrâo hlăm kâo klei mơak klei khăp tal êlâo. Bi hriăm kâo dôk hdĭp kpă ênô hŏng ai tiê thâo pap, djă pioh klei sĭt nik hŏng klei pap leh anăn khăp kơ Khua Yang hŏng jih ai tiê, khăp kơ mnuih mkăn msĕ si kơ kâo pô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôp 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
