I Yôhan 3:14-18
“Dah iĕm đei đon ‘mêm mơnat dih băl, lei đĭ đăng bơngai băt kơ iĕm lui kơ Inh.” (Yôhan 13:35)
Nơ̆r jet tơchĕng pơwao:
– Tơdrong kiơ tơbăt ăn kơ bơ̆n băt kơ Kră Yang tơpă păng bơ̆n gah Sư bơih?
– Yôhan bơtho ‘bar tơdrong ayơ athei pơm wă tơ’bôh tơdrong ‘mêm kơ ‘nhŏng oh?
– Thoi yơ wă khan ‘mêm pơm tơ’bôh hăm tơdrong jang păng pơm tơpăt tơpă?
Lăm dôm kơthơ Yôhan bơngai mă Kră Yang ‘mêm, pơma hơđăl tơdrong ‘mêm ưh kơ sĭ lăp noh minh tơdrong arih na noh tơm kăl, tơdrong arih bơngai lui. Lăm âu, sư pơma hơđăl tơdrong ‘mêm lăm khul bơngai lui noh tơ’bôh tơdrong bơ̆n pơm, băt kơ Kră Yang tơpă păng gah Sư bơih: “Bơ̆n băt bơ̆n jăk đơ̆ng tơdrong lôch boih wă arih ling lang kơlih kơ bơ̆n ‘mêm mơnat kơ ‘nhŏng oh bơ̆n. Bơngai bu ưh kơ ‘mêm mơnat kơ ‘nhŏng oh sư, bơngai ‘noh oei kiơ̆ gah tơdrong lôch.” (trong 14). Sư pơma hơđăl tơdrong ‘nâu yua kơ tơdrong ‘mêm ưh kơ đơ̆ng kon bơngai na đơ̆ng Kră Yang: “Bơngai bu ưh kơ ‘mêm mơnat kơ ‘nhŏng oh sư, bơngai ‘noh ưh kơ băt kơ ‘Bok Kei-Dei ôh, yua kơ ‘Bok Kei-Dei Sư gah tơdrong ‘mêm mơnat đĕch.” (I Yôhan 4:8). Thoi noh, tơdrong ‘mêm lăm tơdrong arih khul bơngai lui dah lăm hnam akŭm noh, ‘bĕnh blai tơdrong ‘mêm mă Kră Yang đei ‘măn lê̆ kơ bơ̆n adrol đơ̆ng sơ̆. Bơ̆n arih ngăl pơm glăi yua kơ bơ̆n ‘mêm kơ bơngai mă ‘mêm kơ bơ̆n đĕch, pơm ‘lơ̆ng kơ bơngai pơm ‘lơ̆ng kơ bơ̆n đĕch, pơm ‘lơ̆ng kiơ̆ kơ kon bơngai lăm teh đak. Kră Yang Yêsu ‘mêm kơ bơ̆n, tơ’bôh kơmĭl bơ̆jang, chu pơmat lôch păng athei bơ̆n ‘mêm băl thoi noh.
Pơtrơp dơ̆ng noh, Yôhan bơtho hơđăl tơdrong kăl kơ pơm wă tơ’bôh tơdrong ‘mêm kơ ‘nhŏng oh. Mă minh, ưh kơ gơh hil areh kơ ‘nhŏng oh sư (trong 15). Sư tơ’blŏk ming nơ̆r Kră Yang Yêsu bơtho khan bơngai bu blĕk, hil kơ ‘nhŏng oh sư noh pơm yoch pơlôch bơngai (Mathiơ 5:22). Tơdrong ‘mêm pơtơm đơ̆ng tơdrong tơplih jơhngơ̆m păng tơdrong tơchĕng kơplah bơ̆n đei tơdrong arih ‘nao, tơdrong arih ling lang Yang Bơhngol ‘Lơ̆ng, lei na ưh kơ đei tơdrong hil areh lăm jơhngơ̆m. Mă ‘bar, ‘mêm mơnat ưh kơ sĭ dơ̆ng ‘bơ̆t nơ̆r pơma mălei athei pơm tơ’bôh tơgŭm, chu lôch, ưh kơ đei tơchĕng tơdrong wă kơ đe pơm tơwih (trong 16-17). Hơđăl hloh, tơdrong ‘mêm ‘nhŏng oh pơchŭt kơ bơ̆n wă klah asong dôm tơdrong kiơ bơ̆n đei ăn kơ lu ‘nhŏng oh mă oei kơ’bah. Klah asong kư̆m tơdrong tơm kăl lăm arih wă kơ bơ̆n huay kơ pơ̆k huŏng lăm kơplah jơ bơ̆n tôm mah. Trŏ thoi ei, bơ̆n kăl kơ apinh Yang Bơhngol ‘Lơ̆ng chông anhăk bơtho tơ’bôh wă kơ bơ̆n huay kơ đei tơdrong đe pơhlŭ wă kơ đei yua kơ lu sư.
Tuch luch, Yôhan kư̆m tơ’blŏk kơ bơ̆n athei ‘mêm mơnat mă tơpă (trong 18). Tơdrong ‘mêm bơ̆n ưh kơ wă “‘bơ̆r bơ̆n đĕch ôh ‘mêm mơnat” na bơ̆n pơm tơ’bôh đơ̆ng tơdrong jang păng tơdrong tơpăt tơpă Kră Yang. ‘Mêm mơnat tơpă wă khan ưh kơ sĭ khan dŏng ôn tơdrong glăi lu ‘nhŏng oh, pơ̆n yua iŏk nơ̆r Kră Yang wă bơtho tơ’bôh, tơ’blŏk kơ ‘nhŏng oh kơplah lu sư năm jrok trong, kơnhăm wă tơgŭm kơ lu sư rai ‘lơ̆ng hloh. Tơdrong ‘mêm pơtrŭt kư̆m athei tơpăt tơpă. ‘Mêm kơ bơngai nai ưh kơ sĭ wă kơ đe pơư bơnê, ưh kơ wă đei yua kơdih dah wă lu sư chu kiơ̆ kơ bơ̆n, na yua kơ jơhngơ̆m hli yom kơ Kră Yang păng tơdrong hiơ̆k tơgŭm tơpă đơ̆ng gah bơhngol đei tơplih.
Ơ Yang ‘Bă mă ‘mêm, inh bơnê kơ Ih yua kơ Ih bơih tơdrong ‘mêm. Apinh Ih tơplih bơhngol inh hăm tơdrong ‘mêm păng tơdrong jang Ih wă kơ inh kư̆m ‘mêm kơ ‘nhŏng oh hăm tơdrong ‘mêm noh. Krao khan yua anăn Kră Yang Yêsu Krist, Amen.
Bơ̆n oei arih ‘mêm mơnat hăm rim ‘nu lăm khul bơngai lui thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Jop 3
Kênh Youtube BHKTHN:
