Klei Aê Diê Blŭ: II Têsalônik 2:13-14
Êlan kliăng: “Ƀiădah Ơ phung ayŏng adei Khua Yang khăp, hmei čiăng bi mni kơ Aê Diê nanao kyua diih, kyuadah Aê Diê ruah leh diih mơ̆ng mphŭn pioh kơ klei bi mtlaih hŏng klei Yang Mngăt Jăk bi doh jăk leh anăn hŏng klei đăo kơ klei sĭt nik” (II Têsalônik 2:13)
Klei êmuh ksiêm mĭn: Klei Khua ƀĭng kna Y-Pôl bi mni kơ Aê Diê đru phung đăo ti ƀuôn Têsalônik lŏ hdơr hlei digơ̆ jing? Ya ngă digơ̆ mâo klei Khua Yang ƀuăn rơ̆ng? Si klei bi mđĭ ai drei mâo tơdah mâo Aê Diê pô ƀuăn rơ̆ng?
Pŏk kŏ kơ kdrêč 2, Khua ƀĭng kna Y-Pôl čih hưn klei bi knăl kơ “hruê Khua Yang giăm truh leh”, anăn jing hruê pioh kơ jih jang phung arăng lui leh Khua Yang pŭ ba Phung Sang Aê Diê. Êjai lŏ bi mni kơ Aê Diê, ñu ăt lŏ čiăng kơ phung đăo ti ƀuôn Têsalônik hdơr mơh kơ digơ̆ jing sa čô hlăm phung kăp mă tŭ klei Aê Diê khăp, jing “phung ayŏng adei Khua Yang khăp.” Klei Khua ƀĭng kna Y-Pôl čiăng kñăm, digơ̆ jing phung hlăm gŏ sang Aê Diê hlăm klei hdĭp myang, mâo klei Khua Yang ƀuăn rơ̆ng sĭt nik srăng tlaih mơ̆ng klei bi kmhal hlăm hruê Khua Yang, Khua Yang amâo srăng lui ôh tơdah pŭ ba Phung Sang Aê Diê.
Kyua klei khăp leh anăn klei pap, Aê Diê brei leh hdră bi mtlaih kơ jih jang mnuih, phung đăo ti ƀuôn Têsalônik pô tuôm hmư̆ leh Klei Mrâo Mrang Jăk phung khua ƀĭng kna mtô, đăo kơ Khua Yang Yêsu čiăng dưi mă tŭ klei Ñu bi mtlaih. Mơ̆ng anăn, Khua Yang brei kơ phung đăo klei dưi jing phung ayŏng adei Khua Yang khăp, Khua Yang bi doh jăk leh digơ̆, leh anăn grăp hruê Yang Mngăt Jăk srăng lŏ bi doh jăk hŏng jih jang klei digơ̆ găn hlăm klei hdĭp mbĭt hŏng Khua Yang. Kyuanăn yơh, klei dưi jing phung ayŏng adei Khua Yang khăp, dưi dôk hlăm klei Ñu ruah, mâo klei Khua Yang bi doh jăk, jih jang kbiă mơ̆ng klei digơ̆ “đăo kơ klei sĭt nik”, mă tŭ klei bi mtlaih Aê Diê brei sơăi.
Amâo djŏ drei ôh ruah Aê Diê ƀiădah Aê Diê yơh ruah drei (Êphêsô 1:4). Ƀiădah lĕ, đăm drei lač ôh Aê Diê mâo mkăp leh phung srăng Ñu ruah, kyuanăn amâo guôn drei lŏ wah lač leh anăn nao hưn ôh. Tinei, Khua ƀĭng kna Y-Pôl bi klă leh phung Têsalônik mâo klei bi mtlaih kyuadah Aê Diê yua leh Klei Mrâo Mrang Jăk kơ klei bi mtlaih hŏng klei ñu leh anăn phung nao mbĭt hŏng ñu hưn čiăng digơ̆ kmhal kơ klei soh, leh anăn đăo kơ Khua Yang. Klei Aê Diê kñăm čiăng jing ƀuăn rơ̆ng kơ hlei pô đăo kơ Ñu “dưi mâo klei guh kơang Khua Yang drei Yêsu Krist.” Pô anăn srăng dôk mbĭt hŏng Khua Yang hlŏng lar hlăm klei guh kơang leh anăn ƀuăn rơ̆ng amâo srăng lui ôh tơdah Khua Yang pŭ ba Phung Sang Aê Diê. Brei drei thâo kơ klei sa čô mnuih dưi dôk hlăm klei Aê Diê ruah, mâo Yang Mngăt Jăk bi doh jăk, amâo djŏ kyua mnuih anăn mâo klei năng ôh, ƀiădah kyua Aê Diê khăp leh anăn kyua “đăo kơ klei sĭt nik”, đăo kơ Khua Yang Yêsu. Thâo kơ grăp čô drei jing phung Aê Diê khăp, jing phung Aê Diê ruah, brei klei bi mtlaih čiăng drei dôk kjăp hlăm klei đăo hlăm djăp mta klei truh, leh anăn hur har nao hưn Anăn Ñu msĕ mơh čiăng dưi bi mtlaih lu mnuih.
Drei ƀuăn hŏng Khua Yang ya klei drei srăng ngă čiăng mâo lu mnuih đăo kơ klei sĭt nik?
Wah lač: Ơ Khua Yang, đru kâo thâo kơ kâo dôk hlăm klei Ih ruah, mâo Yang Mngăt Jăk bi doh jăk grăp hruê. Akâo Ama thiăm klei ktang myang kơ kâo čiăng kâo jing sa čô pô hưn bi sĭt mâo boh tŭ dưn kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
