II Thexalaunikes 2:13-14
Nqe cim:
“Cov kwvtij uas tus Tswv hlub, peb niaj hnub ua Vajtswv tsaug, rau qhov Vajtswv twb xaiv nej puag thaum chivkeeb los lawm, kom nej tau txais txojkev cawm dim los ntawm Vaj Ntsujplig lub hwjchim thiab ua rau nej ua tau haivneeg uas dawbhuv, vim qhov uas nej ntseeg qhov tseeb” (II Thexalaunikes 2:13).
Lus nug rau sawvdaws xav:
– Timthawj Paulus lo lus ua tus Tswv tsaug pab cov ntseeg hauv Thexalaunikes nco txog lawv yog leejtwg?
– Lub vimchiv lawv tau tus Tswv ua tabpov yog dabtsi?
– Peb tau txhawb zog licas thaum tau Vajtswv ua tabpov?
Qhib thawj ntawm tshooj 2, Timthawj Paulus hais txog tej lub cim qhia tias “twb txog lub sijhawm uas Yexus los lawm”, ntawd yog hnub tseg cia rau cov uas raug tso tseg nyob ntiajteb tomqab uas Pawg Ntseeg tau tos mus nyob saum ntuj lawm. Timthawj Paulus rov ib ke ua Vajtswv tsaug, thiab ib ke qhuab ntuas cov ntseeg hauv Thexalaunikes nco ntsoov hais tias lawv yog cov uas tau txaus siab txais yuav Vajtswv txojkev hlub, yog “cov kwvtij uas tus Tswv hlub”. Yam tseemceeb uas Timthawj Paulus xav hais txog ntawm no yog: lawv yog cov uas nyob hauv Vajtswv lub tsevneeg sab ntsujplig, tau tus Tswv ua tabpov tseebmeej hais tias yuav tau dim hnub ua tus Tswv txiav txim, tsis raug tso tseg hnub uas Pawg Ntseeg tau coj mus nyob saum ntuj.
Los ntawm txojkev hlub thiab txojkev tabncuab, Vajtswv tau npaj kev cawmdim rau txhua tus, cov ntseeg hauv Thexalaunikes tau hnov Txojmoo Zoo dhau ntawm cov Timthawj, txais yuav Tswv Yexus kom tau txais Nws txojkev cawmdim. Txij thaum ntawd los, cov ntseeg tau tus Tswv pub muaj lub meejmom ua cov kwvtij uas tus Tswv hlub, lawv tau lub meejmom ua haivneeg dawbhuv thiab txhua hnub tau Vaj Ntsujplig ua kom dawbhuv dhau ntawm tej uas lawv ntsib hauv lubneej nrog tus Tswv mus. Vim li ntawd, qhov uas tau ua cov kwvtij uas tus Tswv hlub, tau nyob hauv Nws txojkev xaiv tseg, thiab tau ua kom dawbhuv twb yog vim lawv tau “ntseeg qhov tseeb”, txais yuav txojkev cawmdim uas tus Tswv pub.
Tsis yog peb xaiv tus Tswv tiamsis yog tus Tswv xaiv peb (Efexus 1:4). Tiamsis, txhob muaj leejtwg xav hais tias Vajtswv twb muaj txhij cov uas Nws xaiv lawm, ces peb tsis thov Vajtswv thiab tsis mus ua timkhawv. Nyob ntawm no, Timthawj Paulus tau qhia meej hais tias qhov uas cov ntseeg hauv Thexalaunikes tau dim twb yog vim Vajtswv tau siv Txojmoo Zoo los cawm lawv dhau ntawm Timthawj Paulus thiab nws cov phoojywg tej lus qhia, kom lawv lees kev txhaum, txais yuav Tswv Yexus. Vajtswv lub homphiaj yog ua tabpov kom txhua tus ntseeg “tau peb tus Tswv Yexus Khetos lub tshwjchim uas ci ntsa iab”. Tus ntawd yuav tau nrog tus Tswv nyob mus ibtxhis hauv qhov chaw ci ntsa iab thiab tau ua tabpov tias yuav tsis raug tso tseg nyob ntiajteb thaum Pawg Ntseeg tau mus nyob saum ntuj. Peb yuav tsum zeem paub hais tias qhov uas ib tug neeg tau nyob hauv tus Tswv txojkev xaiv, tau Vaj Ntsujplig ua rau dawbhuv, tsis yog vim tus neeg ntawd tsimnyog tau, tiamsis yog vim hlub tus Tswv thiab vim lawv “ntseeg qhov uas tseeb”, uas yog ntseeg Tswv Yexus. Thaum zeem paub hais tias peb txhua tus tau tus Tswv hlub, tau xaiv, tau pub muaj txojkev cawmdim lawm, yuav pab peb ruaj khov txhua lub tsamthawj thiab txaus siab tawm mus ua timkhawv rau tus Tswv kom cawm tau coob leej dim.
Thov Vajtswv,
Tus Tswv, thov qhia nyuam yaus paub tias nyuam yaus tabtom nyob hauv Koj txojkev xaiv, tabtom tau Vaj Ntsujplig ua rau dawbhuv txhua hnub. Thov pub rau nyuam yaus muaj zog sab ntsujplig kom xwv ua tau timkhawv tawg paj txi txiv rau Koj. Nyuam yaus tuav Yexus Khetos lub npe thov, Amees.
Peb coglus yuav ua dabtsi kom coob leej los ntseeg qhov tseeb?
Nyeem Vajluskub hauv peb lub xyoos: II Kevcai 23
Kênh Youtube BHKTHN:
