Yaxayas 50:4-9
Nqe cim:
“Txhua tagkis nws pub kuv muaj lub siab kub lug mloog tej lus uas nws qhia rau kuv” (Yaxayas 50:4b).
Lus nug rau sawvdaws xav:
- Tus cev lus Yaxayas hais li cas txog Vajtswv tus tub qhe uas muaj lub siab mloog tus Tswv tej lus?
- Peb kawm tau yam dab tsi ntawm Vajtswv tus tub qhe uas muaj lub siab mloog tus Tswv lus?
Ib tsoom mloog txhua tus,
Tus cev lus Yaxayas hais ntau heev txog Cawmseej Yexus zoo yam li yog Vajtswv tus tub qhe. Hauv tshooj no, nws hais txog lub siab uas nyiam mloog thiab kawm xyaum tus Tswv tej lus. Xav kom yog ib tug tub qhe ncaj ncees thiab muaj nqis, tus ntawd yuav tsum muaj lub siab yeem kawm xyaum thiab tas siab mloog ua raws li yus tus tswv siab nyiam. Hauv ntu Vajluskub no, hais txog Tswv Yexus zoo ib yam li tus tub qhe uas muaj kev sib txuas zoo nrog Nws tus Tswv, Nws tus Tswv tsa Nws sawv txhua tag kis los mloog tus Tswv tej lus qhuab ntuas (nqe 4), thiab yog ib tug tub qhe uas mloog Vajtswv Leejtxiv lus, npaj nroos tiv txomnyem kom ua tiav raws li tes haujlwm tau txib (nqe 6). Thaum los ua neej hauv ntiajteb, Tswv Yexus lub neej ua qhia tshwm Nws mloog Leejtxiv lus tuag nthi (Yauhas 8:28; 5:30; 11:42). Tswv Yexus tseg tau tus qauv zoo uas yog ib tug tub qhe thiab ib tug tub kawm ua ncaj, rau peb txhua tus kawm xyaum.
Hauv nqe 7-9 ua rau pom txog qab hau ntawm tus muaj lub siab paub mloog lus ces tau Vajtswv “pab”. Nws yuav tsis raug “txajmuag” thiab nws tej yeebncuab yuav tsis kam “ua plaub” lossis “txav los ze” nws. Txawm hais hias Tswv Yexus yuav tsum tiv kev txomnyem li tus cev lus Yaxayas hais tseg los, Nws zoo siab mloog lus ua raws li Vaj Leejtxiv txib, yog ib tug tub qhe uas tas siab ua ncaj ncees.
Cov ntseeg Yexus tus Tswv txhiv lawv los ntawm Nws cov ntshav kim txiaj saum tus ntoo Khaublig lawm, peb txhua tus tau lub npe hu ua tus Tswv cov “tub qhe” lossis tus Tswv cov “thwjtim”, vim li ntawd peb yuav tau kawm xyaum Yexus tus qauv los ntawm kev kawm xyaum, paub mloog lus thiab yib ua raws. Peb cov ntseeg yuav tau muaj kev sib txuas nrog tus Tswv vim qhov ntawd ua rau peb paub ua haum Vajtswv tus uas yog peb tus Tswv lub siab. Txhua tag kis thaum peb sawv los, cia li pib hauv ib hnub tshiab los ntawm kev thov Vajtswv thiab kawm Nws Txojlus. Peb yuav tau los nrhiav Vajtswv ua tus coj kev hauv ib hnub tshiab ib yam li vajntxwv Daviv: “Kuv yuav qhia txojkev uas koj yuav taug rau koj, Kuv yuav qhia koj thiab ua koj tus tuavxam” (Ntawv Nkauj 32:8).
Ua zoo mloog thiab kawm xyaum Vajtswv Txojlus yog ib txojcai tswj ntawm sab ntsujplig, peb yuav tsum tag xyaum kom swm thiab ua txhua hnub hauv lub neej ntseeg. Vim tsuas yog mloog tus Tswv tej lus thiaj paub ua raws li Vajtswv siab nyiam thiab paub ua neej tsimnyog qhov uas tus Tswv pub peb ua neej nyob. Los ntawm lub siab mloog thiab kawm xyaum tus Tswv tej lus, peb yuav ua tau ib tug tub qhe ncaj ncees thiab ua tau haujlwm muaj nqis rau tus Tswv ib yam li tus tub kawm uas tas siab ua li yus tus Xibfwb qhia ces txhua yam yuav ua tiav. Dhau ntawd, tus Tswv yuav pub koob hmoov rau peb paub siv tej lus nplig siab thiab lus txhawb lwm tus lub zog.
Thov Vajtswv,
Tus Tswv, nyuam yaus ua Koj tsaug uas Koj cawm nyuam yaus thiab tau los ua Koj ib tug tub qhe. Thov Koj pab kom nyuam yaus yoog tau tus cai tswj ntawm kev mloog Koj lus thiab muaj lub siab kawm xyaum Koj tej lus thaum pib hauv ib hnub tshiab. Amees.
Ib tsoom mloog uas hmov thiab tshua,
Peb puas tswj peb tus kheej ntawm kev paub mloog thiab kawm xyaum tus Tswv tej lus thaum txhua tag kis lawm tau?
Nyeem Vajluskub hauv peb lub xyoo: Yauj 2:11-4:11
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
