Yausuas 5:1, 6:1, 7:2-5
Nqe cim:
“Nej yuav tsum nco ntsoov hais tias, tus TSWV uas yog nej tus Vajtswv coj nej kev hla tiaj suabpuam tau plaub caug xyoo los li cas, nws cia nej raug kev txomnyem ntau yam sim nej siab, saib nej ua puas taus siab ntev thiab saib nej puas yuav ua raws li nws tej lus.” (II Kevcai 8:2)
Lus nug rau sawvdaws xav:
– Cov Yixalayees yuav muaj kev xav licas txog lawv tej tubrog, lawv lub zog, thiab lawv lubneej yav tomntej?
– Vim licas Vajtswv thiaj cia Nws haivneeg ntsib ob lub nroog uas yog Yelikaus thiab A-is?
– Peb tau qhuab ntuas licas txog tej kev sim siab uas peb tabtom ntsib
Nyob rau lub sijhawm no, cov Yixalayees pib rhais ruam mus rau Tebchaws Coglus Tseg tomqab 40 xyoo mus mus los los tom tiaj suabpuam. Lawv yog ib phaum neeg tshiab vim cov uas muaj hnubnyoog 20 xyoo rov saud twb tuag tas, tshwj ob tug uas yog Yausuas thiab Kalej lawm xwb (Teev Npe 14:29-30). Hais tau hais tias cov Yixalayees lub sijhawm no yog ib haivneeg hluas thiab muaj zog heev. Qhov tseemceeb tshaj yog lawv nyuam qhuav mus rau hauv Tebchaws Coglus Tseg dhau ntawm ib zaj txujci loj heev txog qib uas tej haivneeg thiab tej vajntxwv hauv tebchaws Kana-as puavleej “ntshai cov Yixalayees thiab poob siab kawg li”. Tomqab ib ntu sijhawm uas ntev heev, nimno cov Yixalayees tabtom tau txais kev tau zoo thiab kaj siab kawg nkaus li, tej kev khwv cuag li twb dhau tas lawm, tiamsis tamsim ntawd lawv txawm ntsib ib qhov kev sim siab loj: nroog Yelikaus, yog ib lub nroog uas muaj ntsayeej thaiv thiab ruaj khov heev.
Vajtswv xav qhuab ntuas cov Yixalayees hais tias mus nyob hauv Tebchaws Coglus Tseg tsis tau yog qhov xaus, tiamsis yog qhov pib rau tej pluav rog tshiab. Ntawd kuj yog zaj kawm uas peb txhua tus yuav tsum kawm mus tas peb sim neej. Nyob hauv txojkev taug sab ntsujplig, ntau zaug peb twb tiv dhau tej kev sim siab loj hauv lubneej, lossis ntsib tej yam ua rau peb xav tsis thoob, pom tej yam tshiab tshais; qhov tseemceeb tsis yog muaj yeej rau ib ntu neej twg tiamsis yog kev muaj yeej thaum kawg; tsis yog thaum pib pluav rog tiamsis yog thaum xaus pluav rog (II Timautes 4:7).
Muab piv rau Yelikaus ces lub nroog thib ob uas yog A-is me kawg li. Peb twb paub lawm hais tias, tus Tswv haivneeg kovyeej Yelikaus vim ua raws Vajtswv tej lus samhwm, tiamsis lawv raug swb txajmuag tabmeeg lub nroog A-is me vim tsis nrhiav kev taw qhia ntawm tus Tswv. Tagnrho ob pluav rog no qhia rau cov Yixalayees thiab tus Tswv cov menyuam tiamno tej zaj kawm sab ntsujplig tsimtxiaj kawg li. Qhov xubthawj, ntseeg thiab mloog Vajtswv lus yog yam tseemceeb ua rau muaj yeej. Thib ob, txhob ua li tus neeg ruam khavtheeb thiab xav tias tus kheej muaj peevxwm ua tau txhua yam. Yuav tsum nco ntsoov hais tias tej uas hnub no peb muaj puavleej yog Vajtswv pub, thiab vim hlub tshua, tus Tswv yuav qhuab ntuas, taw qhia kom peb ua tau raws Nws tej kevcai (II Kevcai 8:2). Thib peb, lub nroog loj dua ntais tsis yog Yelikaus lossis A-is tiamsis yog peb lub siab. Cia li fij “lub nroog loj” ntawd rau Vajtswv thiab nyob qab tswjhwm ntawm tus Vajntxwv uas kav tej vajntxwv kom peb hla dhau tej kev sim siab hauv lubneej thiab ua neej ntseeg nrog neeg ntiajteb.
Thov Vajtswv,
Tus Tswv, txhua hnub nyuam yaus yuav ntsib tej lub nroog zoo li “Yelikaus” lossis “A-is”, thov Koj qhuab ntuas nyuam yaus cia siab rau Koj, mloog Koj lus, thiab vamkhom Koj lub hwjchim kom dha dhau tej kev sim siab hauv lubneej. Nyuam yaus tuav Yexus Khetos lub npe thov, Amees.
Peb puas fij peb lub siab cia tus Tswv ua tus tswjkav lawm tau?
Nyeem Vajluskub hauv peb lub xyoos: II Kevcai 7
Kênh Youtube BHKTHN:
