1 Timautes 5:3-16
Nqe cim:
“Tus pojntsuam uas tsis muaj leejtwg pab, nws yeej cia siab rau Vajtswv thiab niaj hnub niaj hmo thov Vajtswv pab nws tsis tseg tsis tu” (1 Timautes 5:5)
Lus nug xav:
– Muaj tsawg txoj haukev ua lub neej pojntsuam, thiab ntawd yog tej txoj haukev zoo li cas?
– Qhov ua neej ntawd ntuas peb yam dabtsi?
Lub neej ua pojntsuam hnub thaud tseeb tiag yeej tsis yoojyim. Vajluskub hais ntau zaus txog feemxyuam ntawm cov ntseeg yuav tsum hmov tshua, saib xyuas cov pojntsuam (2 Kevcai 10:18; 14:29; 24:21,…). Ntu Vajluskub hnub no Paulus tej lus tsis yog tsuas ntuas kom tus saib xyuas Pawg ntseeg yuav tsum pab cov pojntsuam xwb, tiamsis tseem muaj cov lus qhia muaj nqis heev rau cov pojntsuam uas tab tom ua neej hauv lub tsam thawj txomnyem siab thiab khoom qhov txhia chaw.
Muaj ob txoj haukev ua neej ntawm cov pojntsuam tau hais txog hauv nqe 3-16. Tim 1, cov pojntsuam uas ua neej raws li Vajtswv Txojlus hais tias“lawv rov rautxim rau lawv, vim lawv tsis ua rawsli tej uas lawv twb xub coglus tseg lawm.” (nqe 11-15 MWW2022). Nov yog cov pojntsuam tseem hluas thiab tej zaum kuj yog hais txog cov tsis hluas lawm thiab. Qhov teebmeem ntawm cov pojntsuam no yog pheej “nyob khoob” thiab “mus cuavzos rau qhov ub qhov no”, “ua neeg taug xaiv”, “hais tej lus tsis tsimnyog hais” (nqe 13). Cov pojntsuam uas khoom khoom no lawv siv tej sijhawm tsis muaj nqis li, tsis tas li ntawd tseem ua teebmeem, los ntawm qhov uas muab lwm tus tej teebmeem los tham thiab hais phem lwm tus tom nraub qaum. Lawv yog cov pojntsuam nyiam kev ua si thiab “txojkev ntshaw ua rau lawv tso Khetos tseg” (nqe 11 HMOWSV), ntxeev siab thiab “lawv nrog dab Ntxwgnyoog mus lawm” (nqe 15). Qhov keebtiv yog lawv tsau tsawv rau tus cwjpwm ua teebmeem rau lwm tus thiaj ua rau lawv tso Yexus Khetos tseg lawd.
Tim 2, cov pojntsuam uas “cia siab rau Vajtswv”. Ntawd yog cov pojntsuam uas siv lub sijhawm “niaj hnub niaj hmo thov Vajtswv pab nws tsis tseg tsis tu” (nq 5), “ua haujlwm zoo thiab pab lwm tus” (nqe 9-10). Hais rau lwm seem, lawv yog cov uas tsis muaj tes haujlwm tu txiv thiab tu menyuam los tabkaum, vim li ntawd, lawv thiaj siv lawv lub sijhawm rau lub neej ntawm sab ntsujplig nrog Vajtswv thiab muaj nqis rau lwm tus. Lawv tsis cia yus “nyob khoob” tiamsis siv sijhawm rau tej yam uas pab yus nyob ze Vajtswv thiab muaj nqis rau Nws.
Kx Warren W. Wiersbe hais tias, ceem lij (kinh nghiệm) tau qhia pom cov pojntsuam uas muab siab rau ntseeg yog “lub tsev hluavtaws xob sab ntsujplig ntawm Pawg ntseeg”. Lawv yog lub zog ntawm txhua lub sijhawm thov Vajtswv, lawv fij lawv tus kheej mus ncig xyuas pab cov ntseeg thiab paub mloog lwm tus tej lus. Cov pojntsuam uas tsis muab siab rau ntseeg tej zaum lawv yuav yog teebmeem rau Pawg ntseeg, vim lawv taij kom Pawg ntseeg saib pom lawv, lawv dhau los ua “lub chaw tsim thee” lawv lub suab yws, tsawm, txiav txim tsis paub xaus rau lwm tus.
Txawm yog peb yog pojntsuam lossis tsis yog los xij, thov Vajtswv pab peb kom peb tsis txhob ua neeg tubnkeeg nyob khoob, hais tej lus tsis tsimnyog hais, tiamsis cia li siv txhua lub sijhawm khoom los ua tej haujlwm muaj nqis, ntxiv kev cia siab rau ntawm Vajtswv thiab “niaj hnub niaj hmo thov Vajtswv”.
Thov Vajtswv,
Vajtswv, nyuam yaus pheej siv tej sijhawm Koj pub nkim mus dawb do thiab ua teebmeem. Thov pab nyuam yaus nco ntsoov los txhim kho txoj kev cia siab rau Vajtswv, ruaj siab thov Vajtswv thiab ua tej haujlwm muaj nqis rau Vajtswv. Nyuam yaus tuav Tswv Yexus Khetos lub npe thov, Amees.
Peb tabtom siv peb lub sijhawm khoom li cas?
Nyeem Vajluskub hauv peb lub xyoos: Daniyees 3
Kênh Youtube BHKTHN:
