Blŭng a 1:14-19
“Kră Yang ‘Bok Kei-Dei pơjing kơ ‘bar tŏ măt pơchrang hơdah tih; măt pơchrang hơdah mă tih hloh noh wă pơchrang gah kơ’năr, măt mă pơchrang mă iĕ ‘biơ̆ noh wă pơchrang gah kơ măng; sư kư̆m pơjing kơ lu sơnglŏng mơ̆n.” (Blŭng a 1:16)
Nơ̆r jet tơchĕng pơwao:
– Kră Yang ‘Bok Kei-Dei đei bơjing lu hơdah kiơ?
– Lu sơ’nglŏng hơdah mă đơ̆ng Kră Yang pơjing wă kơ nhăm tơdrong kiơ?
– Lu bơ̆n pơchŭt thim tơdrong lui thoi yơ kơplah tơchĕng kơ tơdrong ‘Bok Kei-Dei pơjing lu hơdah?
Sơ̆p hla bơar Nơ̆r ‘Bok Kei-Dei đei chih tơdrong pơjing năr mă Puăn, ‘Bok Kei-Dei pơjing lu hơdah, măt ‘năr, măt khei păng dôm lu sơ’nglŏng (trong 16). Lăm chăl so sơ̆, lu teh đak jum dăr kơ lu bơngai Israel lu sư lui ngheh kơdôm lu sơnglŏng noh jơ̆ lu yang. Mă lei Sơ̆p hla bơar Nơ̆r ‘Bok Kei-Dei tơbăt hơđăl dôm lu sơnglŏng noh jơ̆ đơ̆ng ‘Bok Kei-Dei pơjing mă lu sư jang tơdrong mă kiơ̆ thoi ‘Bok Kei-Dei đei hơmet ăn.
Kră Yang ‘Bok Kei-Dei pơjing tơdrong hơdah ‘nâu wă kơ nhăm “Kră Yang ‘Bok Kei-Dei khan dơ̆ng thoi âu: “Athei đei lu măt pơchrang hơdah tơ tŏk-bŏk rơwơ̆ng ti. Wă kơ klah asong ‘năr păng măng, wă tơdra băt kơ bơyan, đei năr hăm sơnăm. ‘Kŭm wă pơchrang hơdah kơ teh;” na đei hloi thoi noh.” (trong 14-15). Yua kơ đei lu hơdah ‘noh na bơ̆n đei măng năr, minh năr 24 jơ păng minh sơnăm đei 365 năr. Anih mă lu măr năr, măt khei păng lu sơnglŏng wă kơbơ̆n băt kơ pah ayơ, gơh jô̆ jơ mă lăm rim bơyan wă đei truh. Minh pôm sơnglŏng tih đei chông ba lu ‘bok pơjâu đơ̆ng gah hơlĕnh năm chă wă kơ kuh kơ nghe Kră Yang Yêsu ‘nao tơpŭ (Mathiơ 2:1-12).
Tơdrong ‘Bok Kei-Dei đei pơjing lu sơnglŏng hơdah ưh kơ hơdrô̆ kơ pơm tơbôh kơ tơdrong mơsêh mă sư gơh pơjing đĕch ôh mă lei Kră Yang ba ăn tơdrong ‘lơ̆ng kơ kơtuăl teh âu. Yua kơ dôm lu sơnglŏng hơdah na plĕnh teh âu đei tơdrong tơproh ‘lơ̆ng, păng đei rim bơyan ba ăn dôm tơdrong kăl yua ăn kơ kon bơngai păng sem dơrong.
Lăng dôm lu sơnglŏng hơdah tơkơ pal plĕnh lu bơ̆n ‘bôh kiơ? Đunh dêh bơih đơ̆ng sơ̆ ‘Bok Môis đei khan kơ lu bơngai Israel “Kơnh hli kơ lu iĕm pơm ngoi lăng tơ plĕnh ‘bôh măt ‘năr, măt khei, lu sơnglŏng dôm lu tơmam kơpal plĕnh, kơnh iĕm ‘maih wă kơkuh kơ dôm lu tơmam noh păng drap kơkuh kơ lu sư. Mă Kră Yang ‘Bok Kei-Dei asong ăn tơmam noh kơ kon bơngai oei ala teh âu.” (Bơtho Khôi Juăt 4:19). Trŏ kơ kơkuh kơ Kră Yang Tơngla pơjing tôm tơdrong ră mă lei kon bơngai lơ ‘maih kơ kuh kơ lu tơmam mă đơ̆ng ‘Bok Kei-Dei pơjing. Bơ̆n jing kon ‘Bok Kei-Dei kăl kơ roi pơdah đơ̆ng tơdrong juăt ‘Bok Kei-Dei ăn kơ bơngai nai băt gah ‘Bok Kei-Dei Sư jơ̆ tơngla pơjing dôm kơ sơnglŏng hơdah, păng Sư jơ̆ Tơngla Pơjing trŏ kơ bơ̆n kơkuh.
Ơ Kră Yang, Ih jơ̆ tơngla pơjing kơ măt năr măt khei păng dôm kơ lu sơnglŏng, Inh ư-ang kơ Ih yua kơ Ih jơ̆ Tơngla Pơjing păng tơngla ba ăn tơdrong tôm mah kơ dôm tơmam lăm teh đak âu păng ăn kơ inh đei tôm mah. Sư jơ̆ Tơngla chĕp jơnăr. Apinh Ih tơgŭm inh băt lui gơnang kơ Ih lăm tôm tơdrong, păng chang gô dôm tơdrong ‘lơ̆ng mă đơ̆ng Ih gô pơm ăn kiơ̆ kơ jơnăr Ih. Wă kơ chăl arih inh đei pơchrang hơdah Ih nhen thoi sơnglŏng pơchrang hơdah tơ kơ pal plĕnh ti. Yua anăn Kră Yang Yêsu Krist. Amen
Lăng dôm kơ sơnglŏng kơ pal plĕnh lu bơ̆n hăm đei ‘bôh tơdrong hlĭch chrơp păng đei jơhngơ̆m ư-ang kơ ‘Bok Kei-Dei mă tih hloh ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 25
Kênh Youtube BHKTHN:
