Luka 9:18-23
“Na Yêsu khan kơ bơngai tơpôl lơ mă năm mơ̆ng Sư: “Dah bơngai bu wă kiơ̆ Inh, sư athei tŭk đĭ dôm tơdrong sư kơdih na rim năr sư athei tôi kơdih ‘long pơglang chu lôch yua kơ wă kiơ̆ Inh.”
(Luka 9:23)
Nơ̆r jet tơchĕng pơwao:
- Đơ̆ng rŏng kơ roi lê̆ adrol gah tơdrong lôch păng iung arih dơ̆ng, Kră Yang Yêsu krao pơtơm bơngai pơhrăm păng Sư tơdrong kiơ?
- Nơ̆r Kră Yang lăm trong 23 krao pơtơm lu bơ̆n pơyơ̆r akâu yak kiơ̆ Kră Yang rim năr lăm trong ayơ?
Kơplah Kră Yang Yêsu oei krao khan kơdrô̆, lu bơngai pơhrăm wang tăp dăr kơ Sư, Sư jet lu sư minh nơ̆r kăl dêh: “Bĭ iĕm khan Inh bu? Pêtrôs khan: Ih ‘Bok Krist mă ‘Bok Kei-Dei wơh pơgơ̆r kon bơngai” (trong 20). Đơ̆ng rŏng kơ noh, Kră Yang Yêsu roi lê̆ adrol gah tơdrong Sư gô pơmat tat, tơdrong lôch păng iung arih dơ̆ng. “Na Yêsu khan kơ bơngai tơpôl lơ mă năm mơ̆ng Sư: Dah bơngai bu wă kiơ̆ Inh, sư athei tŭk đĭ dôm tơdrong sư kơdih na rim năr sư athei tôi kơdih ‘long pơglang chu lôch yua kơ wă kiơ̆ Inh” (trong 23). Kră Yang Yêsu oei bơtho lu bơngai pơhrăm păng Sư gah ‘long pơglang ‘lơ̆ng tơpăt păng ‘mêm mơnat, kư̆m hăm nơ̆r krao pơtơm pơyơ̆r akâu jăn tôi ‘lơng pơglang kiơ̆ Kră Yang rim năr.
Đơ̆ng rŏng kơ ‘bok yă Ađam pơ̆k huŏng, tơdrong arih kon bơngai jing pơm yoch. Nơ̆r Kră Yang tơbăt “Bu jang chă tơdrong yoch apah tơdrong lôch” (Rôm 6:23), thoi noh kon bơngai athei băt tơpă, ‘bơ̆t anăp tơdrong ‘lơ̆ng tơpăt Kră Yang ‘Bok Kei-Dei, đĭ-đăng rim ‘nu lu bơ̆n ưh kơ phara kiơ kơ lu bơngai bơnă mă oei răp gô wă sek tơlang! Mă-lei yua đơ̆ng ‘long pơglang tơdrong ‘mêm na lu bơ̆n gơh klaih đơ̆ng lôch, gơh mơnat ăn păng hơmet ming gơh jing kon ‘Bok Kei-Dei. ‘Long pơglang jơ̆ tơdrong ‘mêm ưh kơ layơ pĭt tŭk, jơ̆ tơdrong tơpăt ‘bĕnh blai tơdrong mơnat, jơ̆ trong ba truh tơdrong arih ling-lang.
Kră Yang Yêsu đei pơm kơ ‘long pơglang jing nơ̆r krao pơtơm Bơngai Lui pơyơ̆r akâu kiơ̆ Kră Yang rim năr lăm trong tơdrong ‘mêm păng ‘lơ̆ng tơpăt đơ̆ng lăm tơdrong arih ‘mêm mơnat, huay kơ jô̆ yo, chu lôch, chu pơyơ̆r akâu yua kơ tơdrong tơpăt, yua kơ tơdrong sĭt tơpă. Nơ̆r Kră Yang Yêsu lăm trong 23 ‘noh bơih nơ̆r krao pơtơm ‘mêm mơnat dêh tơpă đơ̆ng Kră Yang Yêsu, pơdrŭt lu bơ̆n yak năm kiơ̆ Sư rim năr ‘net ‘net lăm tơdrong tơplih ming ‘nao, tŭk lê̆ tơdrong so wă kơ arih ‘lơ̆ng tơpăt păng ‘mêm mơnat nhen thoi Kră Yang. Tôi ‘long pơglang rim năr ‘noh jơ̆ tơdrong arih ‘lơ̆ng tơpăt, ưh kơ tơmơ̆t hăm tơdrong yoch, pơm glăi ưh kơ druh kiơ̆ tơdrong teh đak mă-lei wă tơpă arih mă ‘lơ̆ng mă ‘blep trŏ thoi Kră Yang bơtho lăm Sơ̆p Hla ar ‘Bok Kei-Dei. Kư̆m thoi noh mơ̆n, ‘long pơglang Kră Yang Yêsu ‘noh jơ̆ ‘long pơglang tơdrong ‘mêm, thoi noh lu bơngai mă lăp đon tôi ‘long pơglang rim năr athei arih ‘mêm mơnat, huay kơ jô̆ yo păng awih awăn ling-lang mă tơ’bơ̆p tơdrong truh anat thoi yơ hĭ.
Krao apinh Kră Yang ăn kơ lu bơ̆n ưh kơ sĭ lăp bơnê kơ Kră Yang gah tơdrong ‘lơ̆ng tơpăt păng tơdrong ‘mêm mơnat Sư đĕch mă đei tơ’bôh ăn ‘long pơglang mă dŏng pơklaih lu bơ̆n, mă-lei kơplah băt kơ ‘long pơglang, lu bơ̆n wă tơpă drơ̆ng nơ̆r ‘mêm mơnat đơ̆ng Kră Yang, arih lăm tơdrong arih ‘lơ̆ng tơpăt păng ‘mêm mơnat thoi Kră Yang păng yak năm kiơ̆ Sư ling-lang truh tŏk tơ plei ‘lơ̆ng.
Ơ Kră Yang Yêsu, inh bơnê kơ Ih yua kơ Ih chu lôch tơ’long pơglang yua kơ tơdrong yoch inh. Apinh tơgŭm inh rim năr băt kơ tŭk lê̆ bơngai so, tôi ‘long pơglang kơdih păng yak kiơ̆ Ih đĭ chăl arih. Wă kơ chăl arih inh pơchrang hơdah tơdrong ‘mêm păng ‘lơ̆ng tơpăt Ih rim năr. Krao khan yua anăn Kră Yang Yêsu Krist, Amen.
Lu bơ̆n hăm lăp đon drơ̆ng iŏk nơ̆r krao pơtơm arih ‘lơ̆ng tơpăt păng ‘mêm mơnat đơ̆ng Kră Yang ưh
Đŏk Sơ̆p Hla ar ‘Bok Kei-Dei lăm pêng sơnăm: Hơriso 94-95
Kênh Youtube BHKTHN:
