Mathiơ 18:15-20
“Dah bôl buăl bơngai lui pơm kơnê̆ kơ iĕm, iĕm athei khan kơ sư kơdrô̆ biĕm. Dah sư chu kơ iĕm khan, lei iĕm oei hiôk hăm sư.” (Mathiơ 18:15)
Nơ̆r jet tơchĕng pơwao:
– Nơ̆r bơtho gah tơdrong juăt wă pơkeh tơdrong yoch lăm Bơngai lui tơ’bôh tơdrong tơpăt păng ‘mêm mơnat thoi yơ?
– Lu bơ̆n yua iŏk tơdrong juăt Kră Yang bơtho lăm Bơngai Lui thoi yơ?
Kră Yang Yêsu bơtho lu bơngai pơhrăm gah tơdrong juăt wă pơkeh tơdrong yoch lăm tơpôl. Chăl trong ‘nâu ưh kơ pơma gah tơdrong hơmet tơdrong glăi ‘nhŏng oh, na dan hơnă kơ tơdrong tơpăt păng ‘mêm mơnat lăm Bơngai Lui. Đơ̆ng noh, tơdrong ‘lơ̆ng lăm bơngai lui oei bơwei, păng kư̆m tơ’bôh tơdrong ‘mêm păng iơ̆m dim ‘Bok Kei-Dei.
Kră Yang bơtho mưh đei ‘nhŏng oh lăm Bơngai Lui “pơm kơnê̆ kơ iĕm” na iĕm athei “khan kơ sư kơdrô̆ biĕm” dah mă khan tơ’bôh tơm măt hloi, dah kơdrô̆ biĕm đĕch. Tơdrong pơkeh âu tơ’bôh tơdrong tơpăt ưh kơ gơh lê̆ tơdrong yoch thoi noh ôh, mălei pơm ăn kơ bơngai pơm yoch noh băt tơbral. “Dah sư ưh kơ chu kơ nơ̆r iĕm” lei kăl kơ ‘bar pêng ‘nu ‘mơ̆i kiơ̆ mơ̆ng biĕm pơma băl. Nơ̆r bơtho âu wă kơnhăm ưh kơ đei pơdê kơ bu ôh, wă kơ huay kơ đei jô̆ jâu băl. “Dah sư ưh kơ chu kơ nơ̆r iĕm”. Lei na roi tơbăt kơ Khul Bơngai Lui wă kơ lơ bơngai drơ̆ng, wă pơsĭt kơ tơdrong tơpăt păng bơwei tơdrong ‘lơ̆ng lăm Bơngai Lui.
Nơ̆r Kră Yang bơtho tơ’bôh tơdrong ‘mêm lăm khul bơngai lui. Adrol hloh, tơdrong tơ’bơ̆p kơdrô̆ noh wă kơnhăm “lei iĕm oei hiôk hăm sư”. Trong pơkeh mă ‘bar păng mă pêng noh krao lu ‘nhŏng oh păng tơlĕch tơdrong lăm Bơngai Lui, tơ’bôh tơdrong ‘mêm hăm jơhngơ̆m chơ̆n hơpơi wă kơ ‘nhŏng oh băt tơbral wih tơ Kră Yang. Mă khan lăng lu sư thoi bơngai arăng kơ̆l “lăng sư thoi bơngai tơmoi khul nai păng thoi bơngai iŏk jên thuê̆ đĕch” lei na lăm bơngai lui oei ‘mêm kơ lu sư đĕch, yua kơ Kră Yang hăm bơngai lui ưh kơ đei layơ tam achăng tŭk bơngai thoi noh lăm teh đak âu, bơngai lui oei tơ’bôh tơdrong ‘mêm hơnơ̆ng đĕch mưh lu sư krao khan hơdai păng Kră Yang ăn nơ̆r pơkă khan sư gô oei hơdai (trong 18-20).
Nơ̆r bơtho gah tơdrong pơkeh hơmet tơdrong yoch lăm bơngai lui tơ’bôh tơdrong tơpăt păng tơdrong ‘mêm đei tơguăt dih băl, ưh kơ gơh tơklah dih băl ôh. Pôm pơkeh hơmet tơdrong yoch kiơ̆ tơdrong tơpăt đĕch na pơma chrih dih băl, ưh kơ băt mơnat dih băl, pôm pơkeh hơmet kiơ̆ tơdrong ‘mêm đĕch na ‘bônh kơ pơgơ̆p hăm tơdrong yoch. Kon pơlei Kră Yang kăl kơ weh đơ̆ng tơdrong hơmet ưh kơ trŏ roi jơ̆p kơ bơngai mơ̆ng. Tơplih kơ tơ’blŏk dih băl wă pơkeh hơmet kiơ̆ tơdrong juăt, pơtơ̆p pơjuăt, tơplih kơ tơgŭm dih băl hơmet ming băl mă ‘lơ̆ng tă kơ rai wă pơrăm. Tơplih kơ lăm Bơngai Lui wă hơmet na tă kơ ôn lê̆ tơdrong yoch.v.v… Bơngai Lui kăl kơ arih kiơ̆ kơ tơdrong juăt Kră Yang bơtho, pơchrang tơdrong tơpăt, tơdrong ‘lơ̆ng Kră Yang, ưh kơ gơh lê̆ tơdrong yoch thoi noh, mălei kư̆m dai tơ’bôh tơdrong ‘mêm păng iơ̆m dim đơ̆ng Kră Yang, mưh lăm Bơngai Lui pơma dơnuh dih băl kiơ̆ tơdrong tơpăt păng ‘mêm mơnat. Lei na Bơngai Lui oei bơwei pôm jơhngơ̆m đon lăm Kră Yang, râu tơiung păng wơ̆ ‘lŏ.
Ơ Kră Yang Yêsu, inh bơnê kơ Ih yua kơ Ih ‘mêm kơ inh chu lôch yua kơ inh na jô̆ inh jing ‘lơ̆ng tơpăt ‘bơ̆t anăp Kră Yang ‘Bok Kei-Dei. Apinh Ih tơgŭm inh wă kơ inh đei pơma dơnuh hăm bơngai nai lăm Bơngai Lui kiơ̆ tơdrong tơpăt Ih păng tơdrong ‘mêm thoi nơ̆r Ih đei bơtho. Krao khan yua anăn Kră Yang Yêsu Krist, Amen.
Lu bơ̆n kăl kơ tơplih tơdrong kiơ đơ̆ng rŏng kơ pơhrăm ‘bai ‘nâu?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 136-137
Kênh Youtube BHKTHN:
