Klei Aê Diê Blŭ: Y-Mathiơ 18:15-20
Êlan kliăng: “Tơdah ayŏng adei ih ngă soh hŏng ih, nao hưn kơ ñu klei soh ñu hjăn hdơ̆ng diih. Tơdah ñu hmư̆ klei ih, ih mâo klei bi grăng leh hŏng ayŏng adei ih.” (Y-Mathiơ 18:15)
Klei êmuh ksiêm mĭn: Si klei mtô kơ êlan hdră mghaih mkra klei soh hlăm Phung Sang Aê Diê bi êdah klei kpă ênô leh anăn klei khăp? Si drei mă yua êlan hdră Khua Yang mtô hlăm Phung Sang Aê Diê?
Khua Yang Yêsu mtô phung ƀĭng kna êlan hdră mghaih mkra klei soh hlăm êpul êya. Trăn Klei Aê Diê Blŭ anei amâo knŏng lač kơ klei mkra klei soh ayŏng adei, ƀiădah wăt dưm atur kơ klei kpă ênô leh anăn klei khăp hlăm Phung Sang Aê Diê. Găn hŏng klei anăn, klei doh jăk Phung Sang Aê Diê dưi djă pioh, mbĭt anăn bi êdah klei khăp leh anăn klei pap Aê Diê.
Khua Yang mtô tơdah sa čô ayŏng adei hlăm Phung Sang Aê Diê “ngă soh hŏng ih” snăn êlâo hĭn “nao hưn kơ ñu klei soh ñu” amâodah mkra ti anăp mtam, hjăn hdơ̆ng dua čô. Knhuang mghaih mkra anei bi êdah klei kpă ênô amâo phưi lui klei soh ôh, ƀiădah brei mmông găl kơ pô ngă soh kmhal kơ klei soh. “Ƀiădah tơdah ñu amâo dôk hmư̆ ôh” snăn brei lŏ mâo thiăm sa dua čô čiăng hưn bi sĭt. Klei mtô anei kñăm čiăng bi rơ̆ng klei mtăp mđơr, tlaih mâo klei mčeh luar. “Tơdah ñu hngah amâo čiăng dôk hmư̆ ôh” snăn hưn klei anăn kơ Phung Sang Aê Diê čiăng kơ jih jang ksiêm čuăn ngă, kñăm rơ̆ng klei kpă ênô leh anăn djă pioh klei doh jăk Phung Sang Aê Diê.
Klei Blŭ Khua Yang mtô ăt bi êdah klei khăp hlăm Phung Sang Aê Diê. Êlâo hĭn, klei kñăm kơ bruă bi tuôm hjăn čiăng kơ “ih mâo klei bi grăng leh hŏng ayŏng adei ih” (êlan 15). Knhuang mghaih mkra tal dua leh anăn tal tlâo jing iêo jak thiăm mnuih hưn bi sĭt leh anăn hưn hŏng Phung Sang Aê Diê, bi êdah klei khăp hŏng klei dôk gĭr čang hmăng kơ ayŏng adei drei kmhal kơ klei soh lŏ wĭt. Wăt tơdah yap mnuih khăng ai tiê jing msĕ si “sa čô amâo đăo amâodah sa čô rĭng jia”, Phung Sang Aê Diê ăt adôk khăp mơh, kyuadah Khua Yang leh anăn Phung Sang Aê Diê ka tuôm lui ôh phung mnuih anei hlăm ƀuôn sang. Phung Sang Aê Diê ăt bi êdah klei khăp prŏng nanao tơdah bi mguôp mbĭt wah lač, leh anăn Khua Yang brei klei ƀuăn Ñu srăng dôk ti krah digơ̆ (êlan 18-20).
Klei Blŭ mtô kơ klei mghaih mkra klei soh hlăm Phung Sang Aê Diê brei ƀuh klei kpă ênô leh anăn klei khăp bi mguôp mbĭt, bi hlai mbĭt amâo dưi bi ktlah ôh. Knŏng mghaih mkra klei soh tui si klei kpă ênô srăng jing khăng kiêr, kƀah klei pap. Bi knŏng mghaih mkra hlue si klei khăp snăn ênưih bi ư ai hŏng klei soh. Phung anak ƀuôn sang Aê Diê brei ñĕ đuĕ hĕ kơ klei mghaih mkra soh drei khăng tuôm ƀuh, hrô kơ klei bi tuôm hdơ̆ng pô čiăng hưn bi êdah klă boh klei, snăn jing hĕ hiu bi blŭ mhač hŏng lu mnuih mkăn. Hrô kơ klei bi mñă brei kơ hdơ̆ng pô jing hĕ klei ƀuah mkra kiêr, khăng ktang. Hrô kơ klei bi đru lŏ bi mrâo jing hĕ bi kdơ̆ng bi čiăng bi rai hdơ̆ng pô. Hrô kơ hưn kơ Phung Sang Aê Diê thâo čiăng mghaih mkra jing hĕ mdăp klei soh, đa đa mkăn… Phung Sang Aê Diê brei hdĭp tui si êlan hdră Khua Yang mtô, bi êdah klei kpă ênô, klei doh jăk Khua Yang, amâo dưi phưi lui klei soh, ƀiădah wăt bi êdah klei khăp leh anăn klei pap Khua Yang msĕ mơh. Tơdah Phung Sang Aê Diê bi mghaih mkra hdơ̆ng pô tui si klei kpă ênô leh anăn klei khăp, Phung Sang Aê Diê srăng djă pioh klei bi mguôp jing sa hlăm Khua Yang, rŭ mdơ̆ng leh anăn đĭ kyar.
Ya mta klei brei drei bi mlih hĕ leh hriăm klei hriăm anei?
Wah lač: Ơ Khua Yang Yêsu, lač jăk kơ Khua Yang kyua Ih khăp leh kơ kâo, tŭ klei djiê hrô kơ kâo čiăng kơ kâo dưi yap kpă ti anăp Aê Diê. Akâo Khua Yang brei kâo dôk hdĭp hŏng mnuih mkăn hlăm Phung Sang Aê Diê tui si klei kpă ênô leh anăn klei khăp Klei Aê Diê Blŭ mtô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 136-137
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
