Luka 18:9-14
“Mă-lei bơngai mă chă iŏk jên thuê̆ noh oei ataih đơ̆ng bơngai Pharisi ei. Sư ưh kơ pơ̆n ngơk muh măt sư tơ plĕnh, mă-lei sư tŭr kơdih kơtơh păng khan: ‘Ơ ‘Bok Kei-Dei, apinh Ih mơnat kơ inh ‘biơ̆ yua kơ inh bơngai yoch.”(Luka 18:13)
Nơ̆r jet tơchĕng pơwao:
– Tơdrong krao khan bơngai Pharisi păng bơngai iŏk jên thuê̆ phara băl noh kiơ?
– Yua kơ kiơ Kră Yang khan bơngai iŏk jên thuê̆ khan bơngai ‘lơ̆ng tơpăt?
– Kơplah bơ̆n krao khan, bơ̆n athei pơm kiơ wă kơ Kră Yang mơnat păng tơl tơwih?
Kră Yang Yêsu đei hơ’mon kơ bơngai pharisi păng bơngai iŏk jên thuê̆ hơdai krao khan tơ hnam akŭm. Lăng gah ‘nguaih ‘nei, bơngai Pharisi pơm ‘lơ̆ng dêh, ưh kơ ‘bôh tơdrong kơnê̆ hloi. Mălei gah bơhngol, sư yoch glăi tih tơpă yua kơ sư khan sư pơm ‘lơ̆ng tôm ‘bơ̆t anăp Kră Yang sư ưh kơ thoi bơngai iŏk jên thuê̆ to noh ôh. Lăm noh dơ̆ng sư kang rai glăi tih dêh khan Kră Yang oei hre kơ sư yua kơ sư pơm keh tôm tơdrong juăt bơih! Sư ưh kơ đei krao khan, ưh kơ roi tơdrong yoch, mălei sư pơang ‘bơ̆t anăp Kră Yang; ưh kơ wă chă tơdrong pŭn hiôk dah tơdrong mơnat mălei wă chă pơjăm đe đĕch! Tơchĕng ‘blŏk kơdih akâu đĕch! Lăng sư kơdih đĕch, pơting kơdih akâu hăm bơngai iŏk jên thuê̆ mă ưh kơ gơnang kơ Kră Yang! Tơplơ̆ dơ̆ng “Mă-lei bơngai mă chă iŏk jên thuê̆ noh oei ataih đơ̆ng bơngai Pharisi ei. Sư ưh kơ pơ̆n ngơk muh măt sư tơ plĕnh, mă-lei sư tŭr kơdih kơtơh păng khan: ‘Ơ ‘Bok Kei-Dei, apinh Ih mơnat kơ inh ‘biơ̆ yua kơ inh bơngai yoch.” (trong 13).
Tơdrong ‘bar ‘nu bơngai krao khan, ‘bơ̆t anăp Kră Yang bre sư tă kơ bơngai yoch ngăl. Mălei đơ̆ng rŏng kơ bre sư krao khan, bre sư đei tơdrong phara băl. Bơngai iŏk jên thuê̆ noh sư bơngai Juđê jang tơgŭm kơ lu bơngai Rôm mă oei pơgŏ pơđep kon pơlei pơla sư. Jô̆ kơ sư bơngai plơ̆ plĕch, đe areh kơ sư, jô̆ kơ sư thoi bơngai yoch, mălei sư băt kơnăl tơdrong sư pơm noh glăi, băt tơbral ‘bơ̆t anăp Kră Yang na Kră Yang mơnat yoch, jô̆ sư bơngai tơpăt, na mă bơngai Pharisi pơang noh, khan sư ơ̆t kơ por rim giĕng păng juăt kơ pơyơ̆r 1/10, jô̆ sư ‘lơ̆ng tơpăt bơih pă kăl tơbral tơdrong yoch sư lei na Kră Yang ưh kơ jô̆ sư bơngai tơpăt ôh.
Kră Yang khan: “Na Yêsu khan dơ̆ng: Inh khan kơ iĕm tơpă, lăp bơngai mă iŏk jên thuê̆ noh brŏk tơ hnam, ‘Bok Kei-Dei jô̆ sư klaih đơ̆ng tơdrong yoch boih. Bơngai Pharisi noh ‘Bok Kei-Dei ưh kơ jô̆ kơ sư khan klaih đơ̆ng tơdrong yoch ôh, yua kơ bơngai bu pơang akâu kơdih, sư ei gô mơlâu; bơngai bu pơma sơdrĭ tơ ala kơ ‘Bok Kei-Dei, na sư ‘nei boih ‘Bok Kei-Dei ‘brơ̆k mơnat tơiung sư.” (trong 14). Đei lơ bơngai pơang khan kăl kơ jang keh tôm tơdrong juăt lăm hnam akŭm kơplah năm akŭm jô̆ khan ‘lơ̆ng bơih! Mălei Kră Yang tơbăt kơ bơ̆n pơm phĕt tơdrong lui đei gĭt kơplah bơ̆n arih trŏ. Kră Yang khan: “Yêsu kơtơ̆ng hloi lu sư pơma thoi noh, na Sư khan kơ lu ‘bok thây ei: “Lu bơngai liĕm akâu ưh kơ kăl kơ ‘bok pơgang ôh, pôm lu bơngai jĭ-jăn đĕch kăl kơ ‘bok pơgang. Inh năm tơ âu ưh kơ sĭ chă wơ̆n lu bơngai ‘lơ̆ng ôh. Inh năm tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.” (Markôs 2:17). Bu băt kơdih sư yoch păng krao khan apinh Kră Yang mơnat mưh bơ̆n krao khan na Sư gô mơ̆ng, gô mơnat păng jô̆ bơ̆n bơngai tơpăt.
Yêsu bơtho bơ̆n krao khan: “Apinh Ih ‘nĕ jô̆ yo kơ nhôn thoi nhôn ưh kơ jô̆ yo kơ đe pơm yoch hăm nhôn.” Yôhan khan: “’Bok Kei-Dei pơm trŏ thoi Sư pơkă, Sư pơm tơpăt ling lang. Kơlih kơ thoi noh na bơ̆n dah roi tơdrong yoch bơ̆n kơ Sư, na Sư gô pơklaih bơ̆n đơ̆ng tơdrong yoch tơpă păng ‘nhao jơhngơ̆m bơ̆n đơ̆ng dôm tơdrong kơnê̆.” (I Yôhan 1:9). Lu bơ̆n athei roi tơdrong yoch bơ̆n kơ Kră Yang wă kơ Sư mơnat adrol kơ bơ̆n pơyơ̆r nơ̆r krao apinh.
Ơ Kră Yang, inh băt inh bơngai pơm yoch hăm Ih, băt kơ inh yoch păng dôm tơdrong yoch inh hiơt bơih wă kơ inh tơbral ‘bơ̆t anăp Ih. Apinh Ih mơnat păng tơgŭm inh ‘nĕ pă pơm yoch dơ̆ng, krao khan yua anăn Kră Yang Yêsu Krist, Amen!
Bơ̆n hăm biơh roi tơdrong yoch kơ Kră Yang kơplah krao khan ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Lu Pơtao 3
Kênh Youtube BHKTHN:
