Mathiơ 14:22-23
“Đơ̆ng noh na Yêsu sơlah đơ̆ng lu bơngai tơpôl noh tŏk tơ kông kơdrô̆ wă krao khan kơ ‘Bă Sư. Lăp ‘năr mơ̆t măng mơt boih Sư oei tơ noh mơ̆n.” (Mathiơ 14:23)
Nơ̆r jet tơchĕng pơwao:
– Kră Yang Yêsu tŏk tơkông wă pơm kiơ?
– Yua kơ kiơ Kră Yang kăl kơ krao khan kơdrô̆ Sư?
– Lu bơ̆n đei tơdrong kiơ pơtrŭt lu bơ̆n đơ̆ng rŏng kơ pơhrăm ‘bai ‘nâu?
‘Bok Mathiơ đei tơbăt, “lăp ‘năr mơ̆t măng mơt bơih Sư oei tơ noh mơ̆n” (trong 23). Lăm jơ năr noh wă khan “lăp ‘năr mơ̆t” dang kiơ̆ đơ̆ng tơdrâu jơ truh tơ tơsĭn jơ kơmăng. Adrol kơ noh Kră Yang đei ‘me pơđăm rơbâu ‘nu bơngai jô̆ gah bơngai drŏnglo đĕch ưh kơ đei jô̆ drŏkăn păng hơ’lơ̆p ôh. Kră Yang đei tơ’bôh Sư bơih Yang đei pơm tơdrong mơsêh thoi noh na Sư ưh kơ wă kon pơlei păng bơngai pơhrăm păng Sư hlôh glăi păng pôk Sư pơm pơtao tơ ala teh âu đĕch. Thoi noh, Kră Yang athei kon pơlei wih brŏk păng athei lu bơngai pơhrăm păng Sư wơ̆r thŏng nan tŏk paih to đak dơsĭ, na Sư tŏk tơ kông krao khan kơdrô̆ Sư.
Puăn Sơ̆p Hla bơar Tơdrong ‘Nao ‘Lơ̆ng chih roi lơ wơ̆t Kră Yang Yêsu ‘măn jơ krao khan kơ ‘Bok Kei-Dei Yang ‘Bă. Phŏ năr Sư krao khan pơdah ‘bơ̆t tơpôl lơ, mălei kư̆m đei lơ wơ̆t Sư krao khan kơdrô̆ Sư tơ anih kueng chơngue. Kră Yang Yêsu Sư kư̆m ‘Bok Kei-Dei mơ̆n, mălei kơplah Sư jur jing kon bơngai, Sư kư̆m oei kăl kơ krao khan tơ’bưh hăm ‘Bok Kei-Dei ‘Bă. Sơ̆p Hla bơar nơ̆r ‘Bok Kei-Dei tơbăt anih Kră Yang Yêsu juăt kơ krao khan kơdrô̆ noh tơ kơ pal kông ngăl (trong 23; Markôs 6:46; Luka 6:12; Yôhan 6:15). Kông noh bơih anih kueng chơngue mă Kră Yang rơih iŏk, Sư kăl kơ anih hreh hrĕp wă krao khan kơdrô̆ Sư, wă pơma dơnuh hăm ‘Bok Kei-Dei Yang ‘Bă, wă kơ đei iŏk jơhngơ̆m pran păng wă kơ đei ‘Bă chông anhăk kơplah Sư jur jing kon bơngai pơkeh tơdrong dŏng pơklaih kon bơngai. ‘Bok Mathiơ ưh kơ đei tơbăt Kră Yang Yêsu krao khan kơ tơdrong kiơ, mălei bơ̆n ‘bôh rơđah tơpă Kră Yang băt tơdrong kăl wă kơ krao khan noh gĭt tơpă. Mă khan Sư Kră Yang, Sư pơm kơmĭl ăn kơ lu bơ̆n ‘bôh tơdrong tơ’bưh ling lang hăm ‘Bă gĭt kăl tơpă. Kră Yang Yêsu ling lang krao khan păng ưh kơ layơ bơ̆l hăl. Tơdrong ‘nâu đei tơ’blŏk păng pơtrŭt lu bơngai lui kơ Kră Yang kăl kơ rơhing chơ chă jơ năr ngôi kơdrô̆ wă tơ’bưh hăm ‘Bok Kei-Dei.
Lu bơ̆n đei nơ̆r pơlung păng nơ̆r pơtrŭt đĭ jơhngơ̆m krao khan kơdrô̆ hăm Kră Yang. Dah Kră Yang ‘lơ̆ng rơgoh, ưh kơ đei yoch na Sư kư̆m oei krao khan ling lang thoi noh, na pơma kiơ kơ bơ̆n bơngai rơdu, kơnê̆ kăl kơ krao khan rai hloh dơ̆ng. Sư Kră Yang bơih na oei pơyơ̆r nơ̆r krao apinh đĭ jơhngơ̆m (Markôs 14:34-36), lei na lu bơ̆n kang rai ‘bôh tơdrong adrin krao khan ‘noh gĭt kăl dang yơ na mưh tơ’bơ̆p hăm lơ tơdrong pơmat tat păng anat lăm chăl arih bơ̆n rim năr.
Lăm pêng sơnăm arih tơ ala teh ‘noh jơ năr kơ đeh đĕch, Kră Yang Yêsu ưh kơ đei jơ rơhơi wă pơdơh ‘biơ̆ dah mă oei hơdai hăm bơngai pơhrăm păng Sư mălei adrol hloh Sư oei ‘măn jơ kơdrô̆ Sư oei hăm ‘Bok Kei-Dei Yang ‘Bă. Kră Yang đei ‘măn lê̆ kơ bơ̆n bơih kơmĭl hŏk iŏk noh tơdrong krao khan. Rim ‘nu kơ bơ̆n athei yak kiơ̆ jơ̆ng Kră Yang Yêsu lăm tơdrong krao khan, ‘măn jơ kơdrô̆ thoi Kră Yang wă krao khan tơ’bưh hăm ‘Bă kơpal plĕnh. Lu bơ̆n kăl kơ băt weh đơ̆ng anih hrơ̆ng hreng păng hrăt hrot lăm chăl arih na wă chă anih kueng chơngue wă krao khan kơdrô̆.
Ơ Kră Yang, apinh Ih tơgŭm inh băt kiơ̆ jơ̆ng Ih lăm tơdrong krao khan kơdrô̆ tơ’bưh hăm ‘Bă. Apinh Ih tơ’blŏk kơ inh băt ‘măn jơ kơdrô̆ na krao khan tơ’bưh hăm ‘Bă. Yua anăn Kră Yang Yêsu Krist, Amen!
Lu bơ̆n hăm đei ‘măn jơ kơdrô̆ na krao khan tơ’bưh hăm Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 40-41
Kênh Youtube BHKTHN:
