Yauhas 11:40-44; Malakaus 14:35-36
Nqe cim:
“Nws thov hais tias, Txiv, Kuv Txiv, koj ua tau ib puas tsav yam huv tibsi, thov koj muab lub khob no tshem ntawm kuv mus. Txawm li cas los thov koj tsis txhob ua raws li kuv lub siab nyiam, tiamsis ua raws li koj lub siab nyiam xwb.” (Malakaus 14:36)
Lus nug rau sawvdaws xav:
– Tswv Yexus thov Vajtswv li cas ua ntej nws mam hu Laxalus sawv los?
– Hauv lub vaj Khexemanes, tus Tswv thov Vajtswv li cas?
– Peb kawm tau yam dabtsi los ntawm Tswv Yexus tus qauv thov Vajtswv?
Tswv Yexus kev ua neej yog thov Vajtswv. Thiab Nws qhov kev thov Vajtswv yog tus qauv rau txhua tus ntseeg Yexus kawm xyaum. Thaum tus Tswv los yug ua neeg hauv ntiajteb, Nws yeej niaj hnub thov Vajtswv thiab cia Leej Txiv coj thaum Nws ua txhua yam haujlwm, lub tsamthawj Nws ntsib.
Hauv zaj lus uas tus Tswv hu Laxalus sawv rov los, Nws twb qhia tseeb tias Leej Txiv teb Nws tej lus thov. Lub homphiaj Tswv Yexus qhia tawm qhov ntawd yog vim Nws xav kom cov neeg uas pom Nws ntseeg hais tias Leej Txiv yog tus uas txib Nws los yug ua neeg: “Yexus txawm tsa qhovmuag saib saum ntuj thiab hais tias, Txiv, kuv ua koj tsaug uas koj mloog kuv tej lus thov. Kuv paub hais tias koj yeej ibtxwm mloog kuv tej lus thov, kuv hais li no kom cov neeg uas nyob ntawm no ntseeg hais tias koj yog tus uas txib kuv los.” (Yauhas 11:41-42). Thiab Vaj Leej Txiv teb Tswv Yexus tej lus thov thaum Yexus hu nrov nrov, Laxalus, koj cia li tawm los, Laxalus txawm tawm los, tej ntaub tseem qhwv nws tes taw rau qhov nws twb tuag tau plaub hnub (Yauhas 11:17).
Hauv lub vaj Khexemanes, Tswv Yexus thov Vajtswv los ntawm lub siab txo hwjchim, thov tas siab thiab mloog lus. Tus Tswv paub tias lub sijhawm Nws raug txomnyem los yuav txog, Nws thov Leej Txiv “tshem lub khob txomnyem” mus, tiamsis tsis yog ua raws li Nws lub siab nyiam, cia ua raws li Leej Txiv siab nyiam. Cov lus thov Vajtswv no qhia paub tus Tswv zoo siab hlo mloog lus txawm yog qhov ntawd tsis raws li siab xav. Nov yog tus qauv thov Vajtswv uas peb cheemtsum kawm txhua zaus uas peb thov Vajtswv.
Cov uas sau cov Phau Txojmoo Zoo qhia paub Tswv Yexus niaj hnub thov Vajtswv thaum Nws ua Vajtswv tes haujlwm hauv ntiajteb no. Nws muaj txojkev sib raug zoo nrog Vaj Leej Txiv hauv txojkev hlub, mloog lus, tshwjxeeb yog thaum txog lub sijhawm tseemceeb thiab txiav txim siab ua, xws li lub sijhawm thaum ntsia saum tus ntoo khaublig: “Yexus hu nrov nrov hais tias, “Txiv, kuv muab kuv txojsia tso rau hauv koj txhais tes!” (Lukas 23:46). Nws ua tus qauv ua siab ntev thov Vajtswv, nyob tos thiab sib raug zoo nrog tus uas Nws thov.
Tswv Yexus tus qauv thov Vajtswv yog ib lub neej zoo uas cia peb txhua tus kawm xyaum. Vajtswv cov menyuam nimno tau tus Tswv pub koob hmoov los ntawm qhov lawv nrog kiag Leej Txiv sib raug zoo tsis tas dhau ib tug neeg nyob nruab nrab twg. Thaum txuas lus nrog tus Tswv ntawm kev thov Vajtswv, sib raug zoo, peb cheemtsum kawm ua raws li tus qauv uas Tswv Yexus ua, txo hwjchim zeem paub yus qhov kev qaug zog thiab nrhiav kev ntxiv dag zog, kev pab ntawm Vajtswv, Tus uas peb taij thov.
Thov Vajtswv,
Peb Leej Txiv tus uas nyob saum ntuj, ua tsaug qhov uas Koj pub cai nyuam yaus los cuag kiag tau Koj. Thov Koj qhia kom nyuam yaus xyaum tau koj tus qauv thov Vajtswv, nyuam yaus thiaj paub hlub, txo hwjchim, mloog Vajtswv koj lus, ntseeg tias koj yeej teb tej lus thov thiab muab yam zoo tshaj rau nyuam yaus raws li Koj lub siab nyiam. Tuav Tswv Yexus lub npe thov, Amees.
Peb puas thov Vajtswv raws li Tswv Yexus tus qauv thov Vajtswv lawm tau?
Nyeem Vajluskub hauv peb lub xyoo: Pajlug 20
Kênh Youtube BHKTHN:
