Mathiơ 21:20-22
“Mă tơdrong kiơ kiơ iĕm krao khan apinh ‘Bok Kei-Dei, dah iĕm lui kơ Sư gô ăn tơdrong iĕm apinh noh, lei iĕm gô đei tơpă.” (Mathiơ 21:22)
Nơ̆r jet tơchĕng pơwao:
– ‘Bôh tơm ‘long hơra kro lôch, na lu bơngai jơ̆ng ‘bang đei pơma apinh hăm Kră Yang tơdrong kiơ?
– Kră Yang Yêsu tơl lu jơ̆ng ‘bang gah tơdrong pran đơ̆ng đon lui thoi yơ?
– Lu bơ̆n yua iŏk ‘bai pơhrăm ‘nâu lăm tơdrong arih bơ̆n krao khan thoi yơ?
‘Bôh tơm ‘long hơra kro lôch đơ̆ng rŏng kơ Kră Yang Yêsu sơkat, lu bơngai pơhrăm păng Sư mah hlĭch kơ đon na jet Yêsu, “thoi yơ, bơ̆n ‘nao ‘bôh ‘long hơra âu oei arih mă dang ei khan kro lôch bơih.” Đơ̆ng tơdrong ‘nâu, Kră Yang tơgŭm lu bơngai pơhrăm păng Sư hlôh hơđăl gah tơdrong lui hăm dôm tơdrong pơm tơ’bôh gah ‘nguaih Kră Yang gô hiap pơtê̆, mălei tơdrong pran đơ̆ng đon lui lăm Kră Yang gô iŏk dôm tơdrong tih dêh: “Yêsu khan kơ lu sư: Inh khan kơ iĕm tơpă, dah iĕm đei đon lui kơjăp, ‘nĕ kơ pơngiĕl, lei ưh kơ sĭ kơ pôm ‘long hơra âu đĕch ôh iĕm gơh sơkat. Dah iĕm wă sơkat kơ kông âu gơh mơ̆n. Iĕm khan thoi âu: ‘Weh bĕ e, hiŏng kơtah kơdih tơ đak dơsĭ to.’ Tơdrong iĕm pơma noh gô ‘bôh hloi tơpă.” (trong 21). Bơ̆n kơchăng kơ nơ̆r: “Dah iĕm đei đon lui kơjăp”, Kră Yang khan tơbăt kơ lu bơngai pơhrăm păng Sư sơ̆ păng lu bơ̆n dang ei kiơ̆ Kră Yang mălei ưh kơ đei đon lui ngeh! Kră Yang bơtho lu bơngai pơhrăm păng Sư lui ưh kơ sĭ wă kơ gơh pơm tơdrong mơsêh wă tơ’bôh gah ‘nguaih mălei Kră Yang wă kơ lu sư đĭ jơhngơ̆m lui gơnang kơ Kră Yang Yêsu wă kơ tơdrong mơsêh Sư pơm tơ’bôh lăm tơdrong arih lu sư.
Kră Yang Yêsu khan dơ̆ng: “Mă tơdrong kiơ kiơ iĕm wă krao khan apinh ‘Bok Kei-Dei, dah iĕm lui kơ Sư gô ăn kơ iĕm apinh noh, lei gô đei tơpă.” Đei tơdrong hlôh glăi dah lơ bơngai ưh kơ đei pơ’lơ̆ng kơchăng lăm đon lui yua kơ tơchĕng khan lăm nơ̆r apinh ưh kơ đei ayăt. Lu sư hiơt nơ̆r Kră Yang đei bơtho bơih kơ lu bơngai pơhrăm păng Sư: “Dah iĕm krao wơ̆n păng anăn Inh, iĕm apinh Inh wă tơdrong kiơ, Inh gô ăn kơ iĕm tơpă ưh kơ jor ôh.” (Yôhan 14:14). Tơdrong mă wă kơ gơh tơl tơwih nơ̆r krao khan kiơ̆ kơ Kră Yang kơnhăm păng kiơ̆ thoi Sư wă. Kră Yang wă kơ bơ̆n krao khan, apinh Sư, wă tơ’bưh hăm Kră Yang hơnơ̆ng, đơ̆ng ‘noh gô băt Kră Yang wă tơdrong kiơ wă kơ bơ̆n đei nơ̆r krao khan trŏ thoi Sư wă. Sơ̆p Hla bơar Tơdrong ‘Nao ‘Lơ̆ng Yôhan 15:7 tơbăt kơ bơ̆n pơm thoi yơ wă kơ nơ̆r bơ̆n krao khan đei Kră Yang tơl tơwih “Phŏ iĕm kư̆m krao khan apinh ră, mă iĕm apinh ưh kơ trŏ kơ tơdrong Sư wă, na Sư ưh kơ ăn. Iĕm apinh tơdrong wă yua kơ akâu iĕm kơdih đĕch.” (kơthơ Yakơ 4:3). Kư̆m tơbăt yua kơ đơ̆ng kiơ na Kră Yang ưh kơ tơl tơwih nơ̆r krao khan”. Kră Yang ling lang wă ăn dôm tơdrong ‘lơ̆ng hloh kơ lu sư mălei yua kơ kiơ bơ̆n ưh kơ đei iŏk tơdrong mă bơ̆n apinh? Phŏ lu bơ̆n oei ưh kơ lui dah ưh kơ ngeh nơ̆r bơ̆n apinh trŏ dah glăi. ‘Bok Kei-Dei lăp đon tơ’bôh tơdrong mơsêh Sư đơ̆ng lu bơngai lui ngeh kơjăp kơ Kră Yang, đĭ jơhngơ̆m chă thoi Kră Yang wă păng kơjăp krao khan hăm đon lui.
Ơ Kră Yang mă ‘mêm, apinh Ih thim ăn kơ inh đon lui păng tơgŭm kơ inh ling lang jê̆ Ih wă kơ băt tơdrong Ih lăp đon wă kơ inh ling lang đei tơdrong krao khan ‘lơ̆ng trŏ kiơ̆ thoi Ih wă. Apinh Ih ăn kơ inh ling lang băt chu kiơ̆ Kră Yang wă dah Ih đei tơl tơwih. Yua anăn Kră Yang Yêsu Krist, Amen.
Bơ̆n hăm oei krao khan kơ tơdrong anat bơ̆n hăm đon lui kơ Kră Yang ưh?
Bơwei tơdrong krao khan hơnơ̆ng
Wă kơ băt Kră Yang lăp đon
Tơdrong mơsêh Kră Yang, hơmĕng
Thoi tơm ‘long rơngơp, cheng đak glung hlăng ‘lơ̆ng
Đŏk Sơ̆p Hla bơar ‘Bok Kei-Dei lăm pêng sơnăm: II Pêtrôs 1
Kênh Youtube BHKTHN:
