Blŭng a 2:4-17
“Kră Yang ‘Bok Kei-Dei iŏk ‘mui teh man kon bơngai dơhlu kial arih lăm trôm muh; na kon bơngai jing đei bơhngol arih.” (Blŭng a 2:7)
Nơ̆r jet tơchĕng pơwao:
– Kră Yang pơjing kon bơngai thoi yơ?
– Kră Yang dan kon bơngai mă Sư pơjing bơih noh oei tơ yơ păng pơjao kơ kon bơngai pơm kiơ?
– Tơdrong jang ‘nâu tơ’bôh tơdrong kiơ gah tơdă Kră Yang hơmet ‘măn kơ kon bơngai?
Tơdrong ‘Bok Kei-Dei pơjing kon bơngai, tơdrong ‘nâu đei tơpă, tơdrong Sư pơjing plĕnh teh păng đĭ-đăng tơmam noh ‘bok Môis chih pơtôm lê̆ lăm Hla bơar Blŭng a 1:1-2:4. Chih kơnhăm wă kơ lu bơngai đŏk băt kơ “tơm hmơm đei plĕnh teh mă Kră Yang pơjing bơih noh” (tr.4). Đang kơ chih tơdrong ‘noh ‘bok Môis dơ̆ng lê̆ ‘bơ̆t doh, đơ̆ng noh sư chih hlom jrŭ dôm lu tơdrong kăl, se le lăm tơdrong đêl Kră Yang pơjing, noh tơdrong Kră Yang pơjing kon bơngai. Kơplah Kră Yang pơjing đĭ-đăng plĕnh teh, đĭ dêh char, đĭ đăng sem dơrong ‘long bri, Kră Yang pơjing lu sư hăm nơ̆r pơma sơkat đĕch na đei hloi. Mă-lei, gah kon bơngai, Kră Yang pơjing pha ra ‘biơ̆, Sư “iŏk ‘mui teh man pơjing kon bơngai”, tơdrong noh tơ’bôh kơ bơ̆n Kră Yang Tơ’ngla jang pơ’lơ̆ng dêh, pơse dêh, sep rơnep dêh lăm tơdrong Sư pơjing kon bơngai yua kơ Sư lăng kon bơngai bơ̆n găl hloh kơ đĭ-đăng tơmam noh nai đơ̆ng Sư pơjing noh.Ưh kơ dôm noh đĕch,Kră Yang dơhlu kial arih tơ lăm trôm muh kon bơngai wă kơ kon bơngai jing đei bơhngol arih (tr.7).Thoi noh na bơ̆n gơh pơma thoi âu: Kon bơngai bơ̆n bơih tơm hloh, gĭt kăl hloh kơ đi-đăng tôm tơmam mă Kră Yang pơjing, yua kơ Sư pơjing kon bơngai bơ̆n phara kơ sem tơmam nai, wă gơh pơgơ̆p tơ’bưh hăm Sư.Thoi bơngai chih Hla bơar Hơriso tơ’bôh khan, “Inh bơnê kơ Ih yua kơ Ih đei pơjing inh hlĭch chrơp tơpă.Tơdrong jang Ih hlĭch chrơp mă jơhngơ̆m inh băt nhen tơpă”.(Hơriso 139:14).
Kră Yang dan kon bơngai mă Sư pơjing noh lăm pơgar Êđen, anih ‘lơ̆ng rŏ hlĭch hlăch păng hơđơ̆ng dêh, đei tôm kơ plei ‘long sa ‘lơ̆ng, ‘ngam, đei tôm kơ ‘long, ‘nhĕt gĭt,lăng ‘lơ̆ng dêh. Oei tơ anih noh, kon bơngai mơn đei Kră Yang ‘me rong tôm mah, arih đei Kră Yang oei hơdai păng gơh pơgơ̆p tơ’bưh hăm Kră Yang to âu hloi. Oei lăm pơgar Êđen noh, Kră Yang jao ăn kơ kon bơngai tơdrong jang “pơtăm păng wei pơgar” (tr.15), păng athei phĕ sa tôm kơ plei ‘long, mơ̆ng kơ wă sa kiơ,truh tơ plei ‘long arih hai kư̆m ăn sa mơ̆n, pôm plei ‘long băt kơ ‘lơ̆ng kơnê̆ noh đĕch Sư khă kuă ăn sa. Kră Yang kư̆m tơbăt lê̆ hơdrol mưh ưh kơ chu pơm kiơ̆ nơ̆r Sư noh lĕch sư tơdrong răm; nơ̆r Sư tơbăt noh thoi âu: “Ih ‘nĕ kơ sa hŏ;dah ih sa sĭt ih gô lôch” (tr.17). Kră Yang wă kơ kơdih kon bơngai bơ̆n rơih iŏk chu tơdrong Sư bơtho tơ’bôh chông anhăk wă kơ mơn arih tôm mah păng đei pŭn hiôk đơ̆ng Sư pre hơmet ‘măn ăn kơ kon bơngai bơ̆n noh.
Đơ̆ng tơdrong Kră Yang pơjing kon bơngai păng dan kon bơngai oei lăm pơgar Êđen,bơ̆n ‘bôh lăm tơdă Kră Yang pơjing plĕnh teh, tôm tĕch tơdrong tôm tong kơ anăn, lăm noh kon bơngai bơ̆n, Kră Yang pơjing kăl hloh,phara hloh kơ đĭ-đăng lu tơmam nai. Kră Yang pơjing kon bơngai bơ̆n kăl dêh, đei tơdrong gĭt lăm akâu tơdrong arih bơ̆n, pơjing kon bơngai bơ̆n đei gĭt yua. Kră Yang wă kơ bơ̆n pơgơ̆r wei lăng dôm tơmam đơ̆ng Sư pơjing păng pơm ăn dôm tơmam mă đơ̆ng Sư pơjing noh đei lơi yua ngăl. Kră Yang kư̆m đei bơtho tơ’bôh tơhlâu ăn thoi âu thoi noh hloi păng Sư wă kơ bơ̆n rơih iŏk chu pơm kiơ̆ Nơ̆r Sư. Ăp mă thoi ei ‘mơ̆i na bơ̆n gơh mơn đei tơdrong đêl tơdă Kră Yang hơmet ‘măn ăn kơ bơ̆n noh tơdrong pŭn hiôk tih păng tôm mah tơpă.
Ơ Kră Yang, inh bơnê kơ Ih yua kơ Ih pơjing inh hlĭch chrơp dêh.Bơnê kơ Ih ăn bơih kơ inh dôm tơdrong inh kăl yua wă kơ inh gơh arih păng gơh wơ̆ tơ̆l. Apinh Ih tơgŭm inh ling-lang oei lăm tơdrong Ih chông anhăk, tơgŭm inh đei jơhngơ̆m tơnăp chu kiơ̆ Nơ̆r Ih bơtho, jang keh tơdrong jang Ih pơjao, wă kơ pơih să tơdrong jang Ih. Inh krao khan yua anăn Kră Yang Yêsu Krist,Amen!
Bơ̆n hăm hơtai oei arih trŏ thoi tơdă ‘lơ̆ng mă Kră Yang hơmet ‘măn ăn kơ bơ̆n bơih noh ưh?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 31
Kênh Youtube BHKTHN:
