Lĕch Đơ̆ng Êyiptơ 3:1-10
Trong tơm: “Kră Yang khan: Inh ‘bôh boih tơdrong gleh pơmat-tat kon pơlei Inh tơ dêh Êyiptơ păng Inh kơtơ̆ng boih nơ̆r lu sư krao ôr yua kơ tơdrong jang pơmat, Inh băt hơđăl đĭ dôm tơdrong jang pơmat-tat lu sư” (Lĕch Đơ̆ng Êyiptơ 3:7)
Nơ̆r jet tơchĕng pơwao:
– Kon pơlei Kră Yang oei arih pơmat-tat kơplah pơm đĭch bơngai Êyiptơ thoi yơ?
– Kră Yang khan kơ Môis tơdrong kiơ lăm trong 7?
– Nơ̆r Kră Yang khan tơgŭm lu bơ̆n dơ̆ng kơjăp yak năm lăm sơnăm ‘nao 2025 thoi yơ?
Kon pơlei Kră Yang oei pơm đĭch lu bơngai Êyiptơ pơgơ̆r, rim năr kơplah lu sư iung đơ̆ng tep lăng nhen ưh kơ đei Kră Yang tơyơ mă oei nŏng kơ ‘bôh lu wei tơdrong jang pơm kơnê̆, hil pơgŏ jum dăr kơ lu sư, rim năr lu sư jŏk tơ tok hăm Kră Yang mă-lei nhen thoi Kră Yang ưh kơtơ̆ng, Kră Yang achăng lu sư dah mă lu sư achăng Kră Yang?
Bơnê kơ Kră Yang yua kơ ‘Bok Kei-Dei ưh kơ thoi lu kon bơngai tơchĕng, trŏ kơ jơ ‘năr Kră Yang, Sư đei khan kơ Môis: “ Inh ‘bôh bơih, inh kơtơ̆ng bơih, inh băt hơđăl đĭ…” (trong 7). Lăm tơdrong gleh anat kon pơlei ưh kơ đei lai yơ khan Kră Yang ưh kơ ‘bôh, ưh kơ đei lai yơ khan Kră Yang ưh kơ tơ̆ng nơ̆r kon pơlei ôr krao, păng kư̆m ưh kơ lai yơ tơdrong gleh pơmat-tat kon pơlei khan Kră Yang ưh kơ băt, yua kơ Sư bơih Kră Yang ‘Bok Kei-Dei băt tôm tơdrong yua kơ lu bơ̆n jing kon drŏ-nglo, kon drŏ-kăn Sư, mă khan kon pơlei Kră Yang chăl sơ̆ păng chăl lu bơ̆n dang ei mơn kơdih gah Kră Yang, mă-lei Kră Yang ưh kơ đei lai yơ tơplih, Sư oei ‘bôh, oei kơtơ̆ng, păng oei băt lăm tơdrong pơmat-tat kon pơlei pơla Sư.
Năr pêng jĭt mônh khei mơjĭt ‘bar, wă yak năm sơnăm ‘nao 2025. Oei pă dôm yơ jơ wă hơmet, thoi noh lăm măng ‘nâu mă bu bu kư̆m ‘măn tŏ sĕt jơ ngôi minh anih lăng lăng kơdih akâu, hnam dơnŏ, khul bơngai lui, lăm dêh char păng jơ̆p kơ teh đak lăm ninh sơnăm hlôi bơih. Chơt hiôk dah sơ’ngon? Keh jing ‘lơ̆ng dah ưh kơ keh jing lơ̆ng, ‘bônh dah oei anat? hiôk jơnap dah oei gleh hrat? ‘mêm kơ chăl arih dah arih bơ̆l hăl? Adrin dah rơdu? Kră Yang oei hơdai dah Kră Yang nhen ataih dêh…mă khan thoi yơ hĭ lu bơ̆n kăl bơnê kơ Kră Yang, yua kơ Kră Yang ling lang oei hơdai hăm lu bơ̆n. Kră Yang oei ‘bôh lu bơ̆n mă khan lu bơ̆n ngeh nhen ưh kơ ‘bôh Kră Yang, Sư oei mơ̆ng mă khan lu bơ̆n krao apĭnh dah jŏk tơ tok, păng Sư kư̆m ling lang băt mă khan lu bơ̆n ưh kơ ‘bôh Sư tơ yơ. Chăl arih lu bơ̆n oei lăm tơdrong Kră Yang tơdă hơmet kiơ̆ thoi Sư wă. Sư pơjing lu bơ̆n wă dŏng pơklaih lu bơ̆n păng ling lang oei hơdai hăm lu bơ̆n ling lang truh năr tôch, bơnê kơ Kră Yang ‘mêm mơnat.
Năr wă đĭ sơnăm 2024, apinh Kră Yang ăn rim ‘nu lu bơ̆n dơ̆ng kơjăp yak năm sơnăm ‘nao 2025 hăm jơhngơ̆m băt bơnê kơ Kră Yang păng ling lang yak năm kiơ̆ Sư mă đei tơdrong thoi yơ hĭ. Adrol kơ sơnăm ‘nao, apinh ‘nĕ ăn tơdrong kiơ truh lăm chăl arih hơtŭt ‘bơm tơdrong lu bơ̆n lui kơ Kră Yang, mă-lei lĕch đơ̆ng tơdrong truh noh pơm ăn kơ tơdrong lui jing rai pran, kơjăp yua kơ Kră Yang lu bơ̆n oei ‘bôh, oei mơ̆ng, oei băt.
Lăm jơhngơ̆m bơ̆n hăm hơđơ̆ng dơ̆ng kơjăp păng chơt hiôk kơplah yak năm lăm sơnăm ‘nao 2025?
Kơkuh kơ Ih ơ Kră Yang, inh bơnê kơ Ih Kră Yang yua kơ đơ̆ng Nơ̆r Ih pơlung, pơtrŭt păng ăn thim jơhngơ̆m pran wă kơ jơhngơ̆m inh hơđơ̆ng dơ̆ng kơjăp pre hơmet yak năm lăm sơnăm ‘nao 2025 hăm jơhngơm lui ngeh kơ Kră Yang oei ‘bôh, oei mơ̆ng, oei băt tôm tơdrong lăm chăl arih inh. Apĭnh ăn kơ inh arih đei yua kơplah Kră Yang ăn oei arih lăm teh đak, yua Anăn Kră Yang Yêsu Krist, Amen.
Đŏk Sơ̆p hla bơar ‘Bok Kei-Dei lăm pêng sơnăm: I Samuel 31
Kênh Youtube BHKTHN:
