Chivkeeb 14:13-16
Nqe cim:
“Thaum Anplas hnov dheev hais tias, yeebncuab ntes tau nws tus kwv Halas tus tub Lauj lawm, nws thiaj hu tagnrho peb puas kaum yim leej tubrog hauv nws lub yeej tawm mus caum tua plaub tug vajntxwv ntawd txog ntua hauv lub nroog Das” (Chivkeeb 14:14)
Lus nug xav:
– Thaum Lauj ntsib raug kob rog, Anplas kev ua neej zoo li cas?
– Anplas ua li cas thaum hnov nws tus kwv tus tub raug ntes?
– Peb kawm tau dabtsi dhau zaj lus no?
Thaum Lauj txiav txim siab xaiv mus ua neej nyob hauv lub nroog Xaudoos vim nws xav hais tias qhov ntawd yog qhov chaw zoo, thajyeeb, tiamsis tseem nyob raug qhov chaw muaj kev tsov rog, Anplas lub neej txawv li Lauj lub. Txhua tus nyob hauv lub tebchaws paub tias nws “yog neeg Henplais” (nqe 13), lub npe uas pib hu thaum cov yawgkoob los (Chivkeeb 11:16), qhia paub Anplas lub neej muaj qhov txawv Lauj, tsis ua li cov neeg tsis ntseeg ua, txawm yog nrog cov neeg Kana-as, Amaules nyob. Thiab txawm yog txawv, los Anplas teeb muaj kev sib raug zoo nrog cov neeg hauv lub tebchaws kom ua neej muaj kev thajyeeb (nqe 13). Anplas ua neej nyob kaj siab, sawvdaws saib taus thiab ua qauv zoo, hauv nws lub yeej muaj txog li 318 leej tub qhe uas tau tag xyaum thiab muaj cuab yeej ua rog.
Hnov xov tias nws tus kwv tus tub raug ntes, Anplas txhij tubrog mus pab tamsim ntawd. Nyob rau Anplas lub tsamthawj, nws muaj vimchiv tsis pab Lauj, tiamsis nws cev tes pab vim lub siab hlub. Anplas paub tias yog tsis ua dabtsi ces nws tus kwv tus tub yuav nyob rau lub tsamthawj txaus ntshai. Anplas thiaj txhij tubrog hauv nws lub yeej thiab coj tubrog mus caum tua cov vajntxwv tuaj txeeb tebchaws (nqe 14). Muab piv rau qhov plaub tug vajntxwv koom tes ua ke ces Anplas cov neeg tsis coob. Anplas tsuas siv lub tswvyim “thaum tsaus ntuj lawm nws thiaj muab nws cov tubrog faib ua tej pab mus tua cov yeebncuab” (nqe 15). Thaum kawg Anplas cov tubrog tua yeej, txeeb tau txhua yam khoom uas cov yeebncuab coj mus rov los, thiab qhov tseemceeb dua yog cawm tau nws tus kwv tus tub Lauj, nrog rau nws cov neeg (nqe 16).
Nyob hauv kev ua neej, ntau zaus peb raug ua saib tsis taus los ntawm lwm tus, thiab thaum tus neeg ntawd ntsib teebmeem, peb tsis xav pab nws. Tiamsis tus Tswv xav kom peb yuav tsum ua zoo rau txhua tus los ntawm lub siab hlub. Lub siab hlub ua rau peb tsis ua pauj, tiamsis “kovyeej txojkev phem los ntawm txojkev zoo” (Loos 12:21). Qhov no yog lub neej ua raws li Vajtswv Txojlus qhia thiab haum Nws siab. Qhov tseemceeb dua, zaj lus hais txog Anplas txaus siab tawm hauv lub neej thajyeeb mus tua yeebncuab cawm Lauj yog ib tus qauv ciaj sia ua rau peb xav txog tus Tswv Yexus, Nws los yug hauv Anplas cajces, txaus siab tso lub Zwmtxwv saum ntuj los hauv ntiajteb no cawm tibneeg ntiajteb tawm hauv txojkev txhaum. Vim qhov no peb tau cawm hauv txojkev tuag los tau txojsia thiab ua neej muaj nuj nqis. Cia li xav txog qhov no thiab ua Vajtswv tsaug.
Thov Vajtswv,
Tswv Yexus, ua Koj tsaug txog Anplas tus qauv lub siab hlub. Tiamsis qhov loj dua, ua tsaug rau Koj vim Koj txaus siab nqis los hauv ntiajteb no cawm nyuam yaus tawm hauv txojkev tuag los. Thov Koj pub rau nyuam ua neej qhia tshwm Koj lub siab hlub rau txhau tus. Nyuam yaus tuav Tswv Yexus khetos lub npe thov, Amees.
Dhau los ntawm Anplas tus qauv ua neej, peb xav txog qhov uas peb yuav qhia tshwm tus Tswv txojkev cawm peb li cas?
Nyeem Vajluskub hauv peb lub xyoo: Yauj 10
Kênh Youtube BHKTHN:
