Klei Aê Diê Blŭ: I Kôrantô 8:1-13
Êlan kliăng: “Mnơ̆ng ƀơ̆ng huă amâo dưi brei drei nao giăm Aê Diê ôh. Tơdah drei amâo ƀơ̆ng drei amâo jing jhat hĭn ôh; leh anăn tơdah drei ƀơ̆ng drei amâo jing jăk hĭn ôh” (I Kôrantô 8:8)
Klei êmuh ksiêm mĭn: Si klei Khua ƀĭng kna Y-Pôl mtô kơ bruă ƀơ̆ng amâodah tlaih ƀơ̆ng mnơ̆ng arăng myơr leh kơ rup yang? Ya klei hriăm drei mâo kơ knuih hdĭp huĭ mpŭ brei bi mâo? Si drei yua klei hriăm anei čiăng mđĭ ai klei đăo hdơ̆ng pô?
Hlăm ênuk Phung Sang Aê Diê Kôrantô, arăng čhĭ čĭm kđeh ti sang yang phung đăo mkăn leh anăn hlăm sang mnia lu jing kđeh čĭm arăng myơr leh kơ rup yang. Phung đăo thâo săng đăo knŏng mâo sa Aê Diê, bi yang mkăn jing hơaĭ mang, amâo dưi bi čhŏ ôh mnơ̆ng ƀơ̆ng (êlan 4) kyua anăn diñu ăt blei mơh kđeh čĭm mơ̆ng dŭm sang yang amâodah sang mnia, amâodah tơdah arăng iêô nao huă čhưn leh ngă yang, diñu ăt ƀơ̆ng mơh. Khădah snăn, phung đăo mrâo leh kbiă mơ̆ng klei ngă yang lŏ dlăng klei bi ktlah kluôm dhuôm hŏng klei mưng êlâo dih jing čiăng êdi, kyua anăn, ƀơ̆ng mnơ̆ng arăng myơr leh kơ rup yang ngă kơ diñu lŏ hdơr kơ dŭm klei bhiăn hlăk đưm. Tơdah ƀơ̆ng, diñu pô srăng bi mguôp hŏng bruă ƀơ̆ng mnơ̆ng ngă yang hŏng klei kkuh kơ rup yang (êlan 7). Tơdah diñu ƀuh phung đăo sĭt suôr hĭn ƀơ̆ng mnơ̆ng arăng myơr leh kơ rup yang, diñu ƀuh klei bi têč hnêč (êlan 9-11). Khua ƀĭng kna Y-Pôl mblang klă mngač: “Mnơ̆ng ƀơ̆ng huă amâo dưi brei drei nao giăm Aê Diê ôh. Tơdah drei amâo ƀơ̆ng drei amâo jing jhat hĭn ôh; leh anăn tơdah drei ƀơ̆ng drei amâo jing jăk hĭn ôh” (êlan 8). Khădah snăn, hlue si ai tiê “Jih jang mnơ̆ng kâo mâo klei dưi ngă sơăi,” ƀiădah amâo djŏ jih jang mnơ̆ng ôh jing tŭ dưn ôh” (I Kôrantô 6:12), klei thâo săng kơ mnơ̆ng arăng myơr ngă yang amâo mâo čhŏ ôh amâo djŏ jing klei mă čiăng ngă bruă bi msoh kơ ayŏng adei pô ôh. Tơdah klei drei huă mnăm ngă kơ phung đăo awăt ka thâo săng têč hnêč, snăn drei dôk “ngă soh hŏng Krist yơh” ” (êlan 12).
Klei Aê Diê Blŭ mtô kơ klei ƀơ̆ng mnơ̆ng arăng ngă yang brei mă klei hriăm kơ knuih hdĭp huĭ mpŭ brei mâo, anăn jing hdĭp mâo klei khăp dlăng nanao klei tŭ dưn pô mkăn hĭn kơ klei tŭ dưn kơ pô. Ktưn hưn kơ klei thâo lu ƀiădah kƀah klei khăp srăng atăt kơ klei mgao. Aê Diê brei kơ drei klei êngiê, ƀiădah đăm mjhua klei êngiê anăn hdĭp plă plia, ngă jhat kơ klei đăo ayŏng adei pô. Aê Diê mdưm drei hlăm sa êpul êya klei đăo jing čiăng bi đru mđĭ ai hdơ̆ng pô, kyua anăn brei mđing uêñ kơ pô mkăn, tơdah čiăng snăn srăng săn jih klei tŭ dưn pô čiăng kơ ayŏng adei amâo têč hnêč ôh (êlan 13).
Drei khăng čiăng kơ pô kdlưn hĭn kơ pô mkăn, khăp hdĭp hlue si klei pô čiăng, bi mklă nanao pô djŏ ƀiădah amâo ksiêm bi nik ôh klei blŭ, bruă ngă drei ba klei têč hnêč kơ ayŏng adei pô mơ̆, boh nik phung mrâo đăo kơ Aê Diê. Kăp răng huĭ drei ngă soh hŏng Aê Diê ƀiădah amâo thâo ôh! Tơdah Phung Sang Aê Diê hdĭp thâo khăp, bi mđing uêñ kơ klei tŭ hdơ̆ng pô snăn klei đăo grăp čô srăng dưi mđĭ ai, Phung Sang Aê Diê srăng hriê kơ prŏng leh anăn Anăn Ñu dưi mpŭ mni.
Si drei dôk yua klei êngiê Aê Diê brei čiăng hdĭp leh anăn bi hmô kơ pô mkăn?
Wah lač: Ơ Khua Yang, kâo bi mni kơ Ih kyua klei mtô mơ̆ng Klei Aê Diê Blŭ kơ mnơ̆ng arăng myơr ngă yang. Akâo kơ Ih đru kâo thâo săng leh anăn mâo knuih hdĭp bi mđĭ ai hrô kơ kpĭ hlue si klei pô čiăng amâodah hdĭp plă plia ba klei têč hnêč kơ pô mkăn. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
