Klei Aê Diê Blŭ: Klei Mphŭn Dơ̆ng 4:16-24
Êlan kliăng: “Leh anăn Y-Kain đuĕ mơ̆ng anăp Khua Yang, leh anăn nao dôk hlăm čar Nôt tĭng ngŏ Êđen” (Klei Mphŭn Dơ̆ng 4:16)
Klei êmuh ksiêm mĭn: Leh tŭ klei Aê Diê bi kmhal, si klei hdĭp Y-Kain jing? Mâo mơ̆ klei yuôm brei drei dôk mĭn kơ phung anak čô Y-Kain? Ya klei mtă brei drei răng kơ klei hdĭp lui wir Khua Yang?
Leh mă tŭ klei bi kmhal ktrŏ kyua klei soh ñu ngă leh, mbĭt hŏng klei Aê Diê ƀuăn srăng răng mgang klei hdĭp ñu, Y-Kain “đuĕ mơ̆ng anăp Khua Yang” (êlan 16). Boh blŭ “đuĕ” anei amâo djŏ lač kơ klei bi kbưi anôk dôk ôh kyuadah Aê Diê dôk tar ƀar anôk, ƀiădah čiăng lač kơ klei sa čô mnuih lui wir Khua Yang, amâo dôk hlăm klei bi mguôp hŏng Ñu ôh. Êjai đuĕ hiu rưng, Y-Kain truh ti čar Nôt leh anăn dôk tinăn, mkŏ mjing klei hdĭp. Dlăng ti êngao, Y-Kain mâo klei hdĭp hơĭt, mâo boh tŭ dưn mơ̆ng ai ñu mă bruă. Ƀiădah mnơ̆ng yuôm hĭn ñu amâo mâo ôh, anăn jing klei bi mguôp hŏng Aê Diê, Pô Hrih Mjing ñu.
Y-Kain mâo anak čô, ênuk anei čuê kơ ênuk êdei, Thŭn mlan găn gao, phung anak čô ñu mkŏ mjing klei hdĭp mâo klei dhar kreh hĭn, jing phung mkŏ mjing leh anăn bi lar lu bruă ngă mdê mdê msĕ si: Y-Jaƀal dôk hlăm sang čhiăm leh anăn rông hlô mnơ̆ng (êlan 20). Y-Juƀal jing aê phŭn kơ phung pĕ brô̆ leh anăn ayŭ đĭng buôt (êlan 21). Y-Tuƀal-Kain jing pô tia mnơ̆ng hŏng kông leh anăn msei (êlan 22). Ƀiădah klei ênuah ênô mnuih ƀrư̆ hruê ƀrư̆ trŭn hĭn êjai. Y-Lamek jing pô tal êlâo hĭn dôk dua čô mô̆, ngă bi klăk hŏng hdră bi dôk ung mô̆ Aê Diê mjing leh. Amâo djŏ knŏng dŭm anăn ôh, ñu jing sa čô mnuih bi mdjiê mnuih mơh, wăt ñu bi mni mơh kơ klei jhat ƀai ñu ngă anăn, leh anăn akâo kơ klei dưi lŏ rŭ ênua (êlan 23-24)!
Tơdah lui wir klei bi mguôp hŏng Aê Diê, ti êngao klei hdĭp mnuih msĕ si mâo klei êđăp ênang, wăt mâo klei čăt jing hlăm lu mta bruă mơh. Ƀiădah anăn jing klei hdĭp knang kơ ai ktang pô, duah mnơ̆ng čiăng bi mđĭ pô, ngă tui si klei kđeh pô tluh, leh anăn srăng ngă klei wê čiăng dưi mă tŭ mnơ̆ng pô čiăng, srăng ngă jhat kơ pô mkăn tơdah ƀuh mâo klei bi huĭ kơ klei tŭ dưn ñu. Kyuanăn, wăt tơdah klei hdĭp mâo klei čăt đĭ hĭn, jing dhar kreh hĭn, ƀiădah lĕ klei jăk kơ klei hdĭp leh anăn kpă ênô hroh trŭn. Jih jang hdră êlan mơ̆ng klei knhâo mbruă amâo dưi bi mlih mnuih ôh kyuadah klei čiăng lač tinei jing kơ ai tiê. Mnuih srăng mâo klei bi mlih tơdah ñu duah êlâo hĭn “ƀuôn ala mtao Aê Diê leh anăn klei kpă ênô Ñu” (Y-Mathiơ 6:33). Leh anăn knŏng Khua Yang Yêsu yơh jing êlan lŏ wĭt kơ Aê Diê kyuadah Ñu lač: “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo” (Y-Yôhan 14:6).
Drei tui duah klei tŭ jing hlăm klei hdĭp anei hĕ amâodah dôk nanao hlăm klei bi mguôp hŏng Khua Yang?
Wah lač: Ơ Khua Yang, đru kâo dôk nanao hlăm klei bi mguôp jăk hŏng Ih. Đăm brei kâo jing mnuih tŭ jing ti anăp mnuih ƀiădah jing mnuih amâo tŭ ti anăp Ih ôh. Brei kâo duah Ih leh anăn ƀuôn ala mtao Ih êlâo hĭn, čiăng kơ klei hdĭp kâo dưi bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
