I Pêtrôs 4:7-9
“Khei ‘năr wă jê̆ tôch boih na iĕm athei tơchĕng đon mă hơgei wă kơ kơchăng kơ tơdrong krao khan pơnam. Mă loi bơ̆n ‘nĕ hiơt kơ tơdrong ‘mêm mơnat…” (I Pêtrôs 4:7-8a)
Nơ̆r jet tơchĕng pơwao:
– Bơngai lui kăl kơ pơm tơdrong kiơ kơplah oei chang gô Kră Yang jur? yua kơ kiơ?
– Tơdrong arih ‘lơ̆ng kơplah chang gô Kră Yang jur thoi yơ?
– Lu bơ̆n hơmet lê̆ lu tơdrong kiơ wă chang gô Kră Yang jur?
‘Bok Pêtrôs khan tơbăt, “khei ‘năr wă jê̆ tôch bơih” (trong 7). Kră Yang Yêsu wă jê̆ jur bơih teng neng đei tơ’blŏk kơ lu kon pơlei Kră Yang athei arih chang gô. Bơngai lui chang gô Kră Yang jur athei pơm tơ’bôh hăm tơdrong arih wơ̆ tŏk ling lang lăm tơdrong ‘mêm Kră Yang ‘Bok Kei-Dei păng ‘mêm kơ bơngai nai thoi nơ̆r Kră Yang bơtho (Markôs 12:30-31). Yua kơ lăm năr tuch luch, lu bơ̆n gô roi dôm tơdrong đêl bơ̆n pơm kơplah oei arih gah sĕch akar. “yua kơ đĭ đăng bơ̆n ning-mônh gô dơ̆ng ‘bơ̆t anăp Yêsu Krist sek tơlang kiơ̆ kơ akâu bơ̆n pơm ‘lơ̆ng dah pơm kơnê̆, Sư apah kiơ̆ thoi noh.” (II Kôrintô 5:10).
Pêtrôs đei bơtho, ‘mêm kơ Kră Yang păng ‘mêm kơ bơngai nai kăl kơ tơ’bôh arih ‘lơ̆ng lĕch đơ̆ng lăm jơhngơ̆m. Mă minh, hăm Kră Yang, athei “Kơchăng kơ tơdrong krao khan pơnam” (trong 7). Krao khan ưh kơ trŏ khan kiơ̆ kơ tơdrong lui đĕch ôh, mălei nhen thoi dui jơhngơ̆m gah bơhngol, jơ̆ tơdrong tơ’bưh hăm Kră Yang ‘Bok Kei-Dei, hăm jơhngơ̆m hơgei kơchăng kral. ‘Nâu bơih tơdrong kăl kơ bơngai lui kơplah chang gô Kră Yang jur. Mă ‘bar, hăm kon bơngai, “Mă loi bơ̆n ‘nĕ hiơt kơ tơdrong ‘mêm mơnat, dah bơ̆n ‘mêm mơnat dih băl bơ̆n huay kơ jô̆ yo kơ tơdrong yoch bôl buăl ôh.” (trong 8). Lăp minh tơdrong ‘mêm Kră Yang ‘Bok Kei-Dei đĕch, lăm bơngai lui na tơgŭm bơ̆n mơnat kơ bôl buăl huay kơ jô̆ yo lơ wơ̆t kơ bơngai bu noh, thoi nơ̆r Kră Yang Yêsu đei bơtho (Mathiơ 18:21-22). Lu bơ̆n ‘bônh kơ pơma “’mêm mơnat” mălei tơdrong ‘mêm lăm Kră Yang athei pơm tơ’bôh mă hơđăl hloi: “Bơngai lui đơ̆ng tơmoi truh, bơ̆n athei sơng iŏk sư tơ hnam bơ̆n mă ‘lơ̆ng.” (trong 9). Athei sơng iŏk hăm jơhngơ̆m hiôk lu ‘nhŏng oh mă hơdai bơ̆n oei chang gô năr Kră Yang jur, yua kơ lu bơ̆n gô tơ’bơ̆p băl tơ dêh char ‘Bok Kei-Dei mưh Kră Yang Yêsu jur, chăl arih bơngai lui tơ ala teh âu oei tơchĕng lơ tơdrong gah mŭk tơmam bơngơ̆t kơ kơdih akâu păng hnam dơnŏ… mă khan lei ră, chăl arih ưh ơ sot, chăl ‘nâu gô hlôi hloh, chăl arih ‘nao, Kră Yang ăn kơplah Sư jur jơ̆ đei ling lang hlŏng hloi. Apinh Kră Yang ăn kơ bơ̆n hlôh wao păng kơchăng wă kơ băt bơ̆n kăl kơ pơm kiơ păng hơmet lê̆ tơdrong kiơ ăn kơ kơdih akâu păng hnam dơnŏ kơplah chang gô năr Kră Yang jur. Lu bơ̆n kăl kơ kơchăng krao khan, băt ‘mêm mơnat tơpă kơ bơngai nai hăm jơhngơ̆m hơlăng, păng lăp đon sơng iŏk dih băl lăm tơdrong ‘mêm Kră Yang. ‘Nâu kư̆m dai trong đei yua tơpă wă ră roi Tơdrong ‘Nao ‘Lơ̆ng dŏng pơklaih bơngai jum dăr kơ bơ̆n (Yôhan 13:34-35).
Ơ Kră Yang mă ‘mêm kơeng, apinh Ih tơ’blŏk kơ inh Kră Yang Yêsu wă jur wă kơ inh kơchăng, krao khan, arih băt ‘mêm dih băl, huay kơ jô̆ yo dih băl păng roi tơ’bôh Tơdrong ‘Nao ‘Lơ̆ng kơ rim bơngai. Apinh Ih tơgŭm chăl arih inh băt tơgŭm bơngai nai băt kơ Kră Yang păng lui sơng iŏk Ih, krao khan yua anăn Kră Yang Yêsu Krist, Amen.
Lu bơ̆n oei arih thoi yơ wă tơ’bôh jơhngơ̆m chang gô năr Kră Yang jur?
Đŏk Sơ̆p Hla bơar ‘Bok Kei-Dei lăm pêng sơnăm: Êskiên 18
Kênh Youtube BHKTHN:
