I Petus 4:7-9
Nqe cim:
“Nimno twb yuav txog lub sijhawm uas ib puas tsav yam hauv ntiajteb no puastsuaj. Yog li ntawd nej yuav tsum tswj nej lub siab, ceevfaj thiab nquag thov Vajtswv. Qhov uas tseemceeb tshaj plaws huv tibsi, yog nej ib leeg yuav tsum hlub ib leeg tiag tiag…” (I Petus 4:7-8a)
Lus nug xav:
– Cov ntseeg Yexus cheemtsum ua dabtsi thaum nyob tos tus Tswv rov qab los? Vim li cas?
– Qhov zoo ntawm kev ua neej nyob tos tus Tswv rov qab los qhia tawm zoo li cas?
– Peb npaj yam dabtsi nyob tos tus Tswv rov los?
Timthawj Petus ceebtoom, “Nimno twb yuav txog lub sijhawm uas ib puas tsav yam hauv ntiajteb no puastsuaj” (nqe 7). Tswv Yexus yuav rov qab los yog lub suab nrov qhia rau Vajtswv cov menyuam yuav tsum ua neej muaj tus cwjpwm nyob tos. Cov ntseeg nyob tos tus Tswv rov los yuav tsum qhia tawm lub neej loj hlob hauv txojkev hlub Vajtswv thiab hlub lwm tus ib yam li uas Tswv Yexus qhia (Malakaus 12:30-31). Vim lub sijhawm kawg, peb yuav tsum qhia txhua yam uas ua thaum tseem ua neej nyob ntiajteb no: “rau qhov peb txhua tus yuav tsum mus sawv ntawm Yexus Khetos lub xubntiag. Nws yuav taug peb zaj thiab muab nqi zog rau txhua tus raws li tej haujlwm uas sawvdaws tau ua los lawm, thaum sawvdaws tseem ua neej nyob no, tsis hais ua zoo lossis ua phem” (II Kauleethaus 5:10).
Timthawj Petus qhia, hlub tus Tswv thiab lwm tus cheemtsum qhia tawm qhov zoo hauv lub siab tuaj. Tim ib, ntsigtxog tus Tswv, cia li “ceevfaj thiab nquag thov Vajtswv” (nqe 7). Thov Vajtswv tsis yog kabke kev ntseeg tiamsis yog kev ua pa ntawm sab ntsujplig, yog txojkev sib raug zoo nrog Vajtswv los ntawm lub siab meej tseeb, ceevfaj. Nov yog qhov kev cheemtsum uas cheemtsum muaj rawv nyob hauv cov ntseeg nyob tos tus Tswv rov los. Tim ob, ntsigtxog tibneeg “ib leeg yuav tsum hlub ib leeg tiag tiag, rau qhov txojkev hlub npog tau txhua yam kev txhaum huv tibsi” (nqe 8). Tsuas yog muaj Vajtswv txojkev hlub nyob hauv tus ntseeg thiaj ua rau peb txaus siab zam txim tau ntau zaus rau lwm tus, ib yam li uas tus Tswv Yexus qhia (Mathais 18:21-22). Peb yoojyim hais “hlub”, tiamsis txojkev hlub hauv tus Tswv cheemtsum qhia tawm los ntawm kev ua haujlwm tawm: “Nej ib leeg yuav tsum zoo siab hlo hu ib leeg los tsev tsis txhob yws li” (nqe 9). Cia li txaus siab hu cov kwvtij ntseeg uas tabtom nrog peb tos ntsoov tus Tswv rov los, vim peb yuav sib ntsib hauv Vajtswv lub Tebchaws thaum Nws rov qab los.
Cov ntseeg Yexus kev ua neej nyob hauv ntiajteb yeej tseem muaj ntau yam yuav tsum txhawj txog kev ua neej rau yus thiab tsevneeg… Tiamsis lub neej uas nyob ib vuag xwb yuav dua mus, lub neej tshiab uas tus Tswv pub thaum Nws rov qab los thiaj nyob mus ibtxhis tsis kawg. Thov Vajtswv pub rau peb paub muaj tswvyim thiab ceevfaj, peb thiaj paub ua yam uas cheemtsum thiab paub npaj rau yus thiab tsevneeg thaum nyob tos tus Tswv rov qab los. Peb yuav tsum ceevfaj thiab thov Vajtswv, qhia tawm kev hlub tseeb rau txhua tus neeg los ntawm qhov peb zam txim, thiab zoo siab hlo hu lawv hauv tus Tswv txojkev hlub. Nov kuj yog lub tswvyim yuav qhia tau Txojmoo Zoo uas yog kev cawm rau cov neeg nyob ibncig peb (Yauhas 13:34-35).
Thov Vajtswv,
Vajtswv tus muaj kev hlub. Thov Koj qhia nyuam yaus nco ntsoov tias tus Tswv yuav rov qab los kom paub ceevfaj, thov Vajtswv, sib hlub, zam txim thiab qhia Txojmoo Zoo rau txhua tus. Thov Koj pab kom nyuam yaus kev ua neej coj tau ntau leej los paub tus Tswv thiab ntseeg Nws. Nyuam yaus tuav Tswv Yexus lub npe thov, Amees.
Peb tabtom ua neej zoo li cas kom qhia tawm lub siab tos ntsoov tus Tswv rov qab los?
Nyeem Vajluskub hauv peb lub xyoos: Exekees 18
Kênh Youtube BHKTHN:
