Klei Aê Diê Blŭ: I Y-Pêtrôs 4:3-6
Êlan kliăng: “Ƀiădah diñu srăng hưn klei diñu ngă kơ Pô kăp phat kđi phung hdĭp leh anăn phung djiê” (I Y-Pêtrôs 4:5)
Klei êmuh ksiêm mĭn: Ya ngă phung amâo đăo bi kngăr leh anăn blŭ klei jhat kơ phung đăo? Ya mnơ̆ng đru phung đăo ăt dôk kjăp hlăm klei đăo wăt tơdah tŭ klei arăng blŭ klei jhat? Klei srăng hưn bruă ngă leh kơ Khua Yang bi hriăm drei ya klei?
Hlăm I Y-Pêtrôs 4:1-2, Khua ƀĭng kna Y-Pêtrôs lač, Krist tŭ leh klei knap mñai kyua drei, kyuanăn, đăm drei lŏ hdĭp tui si klei mnuih tluh ôh ƀiădah tui si klei Aê Diê čiăng. Čiăng kơ klă hĭn, ñu yăl dliê ênŭm kơ klei hdĭp sa čô mnuih êlâo kơ gơ̆ jing sa čô mnuih đăo kơ Krist: “Man leh diih ngă mphŭn dô msĕ si klei phung amâo đăo khăp ngă, hdĭp hlăm klei čhŏ mrŏ, ngă klei kđeh tluh, kpiê ruă, klei ƀơ̆ng mnăm êgao hnơ̆ng, klei ngă tă tăn, leh anăn klei kkuh mpŭ soh kơ rup yang” (êlan 3). Ƀiădah klei hdĭp pô anăn bi mlih jing jăk kluôm dhuôm leh ñu đăo kơ Khua Yang Yêsu. Čiăng lač lui hĕ klei hdĭp tui si klei kđeh tluh, klei hdĭp hlăm klei soh, klei kpiê ruă, klei êgao hnơ̆ng, klei ngă tă tăn kyuanăn phung amâo đăo ôh srăng bi kngăr tơdah ƀuh phung đăo amâo lŏ bi mguôp mbĭt ôh hŏng diñu hlăm klei ngă tă tăn, klei ƀơ̆ng mnăm êgao hnơ̆ng leh anăn lui wăt klei kkuh mpŭ kơ rup yang mơh, kyuanăn diñu djă djik djak leh anăn blŭ klei jhat kơ phung đăo (êlan 4).
Klei bi mđĭ ai brei phung đăo dôk kjăp hlăm klei đăo nanao wăt tơdah tŭ klei arăng mưč jing kyuadah jih jang mnuih srăng dôk ti anăp jhưng phat kđi Krist. Ñu jing Pô mâo klei dưi phat kđi phung hdĭp leh anăn phung djiê (êlan 5). Kyuanăn, phung đăo sĭt suôr amâo srăng huĭ ôh, kyuadah Yêsu Krist jing Khua Phat Kđi kpă, “Kyuadah sĭt nik Aê Diê mĭn jing djŏ bi wĭt klei knap mñai kơ phung bi knap diih” (II Têsalônik 1:6). Mbĭt hŏng klei anăn, klei srăng hưn jih jang bruă pô ngă leh êjai dôk hdĭp ăt jing klei mtă brei pô lui wir Khua Yang, dôk kram hlăm klei soh kăp răng mơh. “Ƀiădah kăp răng nanao, leh anăn wah lač čiăng kơ diih mâo klei ktang dưi tlaih mơ̆ng jih klei srăng truh anăn, leh anăn dưi dôk dơ̆ng ti anăp Anak Mnuih” (Y-Luk 21:36).
Klei Khua ƀĭng kna Y-Pôl mtô bi hdơr kơ grăp čô drei snei: Khua Yang Yêsu tŭ leh klei knap kyua drei, snăn hdĭp bĕ kơ Khua Yang. Brei jih jang klei drei blŭ, bruă drei ngă bi mơak kơ Ñu. Čiăng drei kơ drei jhŏng hưn kơ Pô Kpă Ênô jih jang bruă drei ngă leh, snăn hruê anei brei drei ksiêm bĕ kơ klei hdĭp drei pô. Tơdah drei dôk “hdĭp hlăm klei čhŏ mrŏ, ngă klei kđeh tluh, kpiê ruă, klei ƀơ̆ng mnăm êgao hnơ̆ng, klei ngă tă tăn, leh anăn klei kkuh mpŭ soh kơ rup yang” (êlan 3), kmhal bĕ kơ klei soh, akâo kơ Khua Yang pap brei. Ƀiădah bi tơdah drei dôk tŭ klei arăng blŭ klei jhat, ngă klei bi kdơ̆ng kyua Anăn Khua Yang, ƀiădah drei ăt dôk sĭt suôr hŏng Khua Yang, snăn ăt ksŭng nao bĕ phă anăp kơ klei jing doh jăk. Jăk hĭn drei tŭ klei knap mñai leh anăn djiê kyua Khua Yang ti krah lăn ala anôk dôk jưh bhiâo anei, ƀiădah drei srăng mâo klei hdĭp hlŏng lar jăk mơak mbĭt hŏng Aê Diê (êlan 6).
Ya klei brei drei bi mlih hĕ čiăng kơ drei mâo klei jhŏng hưn jih jang bruă drei ngă leh kơ Khua Yang hlăm hruê Ñu lŏ hriê?
Wah lač: Ơ Khua Yang, đru kâo thâo kral klei awăt leh anăn klei soh kâo čiăng kơ kâo kmhal hĕ leh anăn êran hriê kơ Ih. Akâo Ama bi mrâo hlăm kâo ai tiê kpă čiăng kơ kâo mâo klei jhŏng hưn jih klei kâo ngă leh ti anăp Ih hlăm hruê Ih lŏ hriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
